ကျံရ်တီမ် ဆငည်း(21) အခိင်ဘံန်ဆံန်(2:20)မိနေတ်ဒိူန် အာဝ်မိူဝ်ႈပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပ္လေဘျုင် ပလိုင်ဟျံင်အျံရ်တိုဆံတ် ရဝ်ဖြားအိုည်ဆူ။

ကျံရ်တီမ် ဆငည်း(20) အခိင်ရဆံန်(1:30)နြီဒိူန် အာဝ်မိူဝ်ႈမ ပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ပ်ုန်ကယေင်တေဲင် ကူန်ရဝ်မာဂါင်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ထာန်ဇံန်(250)(2)ပိုင်း။

ဘံန်‌ဟောည်ႇဒေဲႈ ကျံရ်တီမ်၊ ဆငည်း(16) အခိင်ခီညှာ(8:00)နြီ၊ ဖုင်ပလိက်ကုင်တအာင်းဂဲ ဘိူန်းဆဒါင် စီဟာဝ်းစေတ်မေန်း ပဂါင်ဂေါည် တာညီပူး ဘိူန်းအဆာက်(42)ဆန်ုမ် ကာည်း တာညီဟိန်း ဘိူန်းအဆာက်(56)ဆန်ုမ် တိုည်းကဂေါပ်တောပ် ခံင်ယိူည်ႇဘည်ဒီန်အောႏ။

ကျံရ်တာရ် ဆငည်း(16) အခိင် ခီညှာ(7)နြီဒိူန် ပလှံင်မိုဂူႈ၊ ပဇံင်အိုင်ကိုင် ဘည်အာဝ်မိူဝ်ႈကတီုက်ကပဴင်ဘည်ဒီန်မာ် ဆီုက်ဘြာန်ဇေဝ်ဂဲ ဒါယာင်ပ်ုရ် ကယေင်ပဴင်တေဲင်​ဒီဂေါည်ကူန်ရဝ်မာဂါင်ဂဲတောန်ဆငည်း ဆိက်ပ္လေဘျုင် လံက်ဟာဝ်း ကောန်အီပ်ုန်(1)အီး ကတူႈဘာတ် ၊ ဂါင်(5)ဂါင် ကာည်း ကား(1)ကြောင် လူလှဲဝ်ႏဟာဝ်း။

ဖုင်ပလိက်လှံင်ကုင်တအာင်းဂဲ ရေဲန်ဇီုင်းကာန်စေတ်ဆေး ဒီဟာဝ်းဝီရ်ဂီုန်းကူန်ရဝ်မာဂါင်ဂဲ၊ ရေဲန်ဇီုင်းကာန်စေတ်ဆေးဟာဝ်း မိူဝ်ႈ အာဝ်မိူဝ်ႈ အီးတာင်ဒေဲႈခံင်ယိူည်ႇကာည်း စေတ်ဆေးဟာဝ်း မိူဝ်ႈ အာဝ်မိူဝ်ႈအီးတာင်ဒေဲႈကူမ်ပ်ုန်ထိင်ဘိအူန်း အီအာဝ်ဘိူန်းထုက်ရိူရ်ႈလေႈကဲနီန်။

ပဲန်ငံရ်က္လိုႇဟာဝ်းဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပျံတ်ယံတ်ငံရ်ဂဲ ကာည်း ကူန်ရဝ်မာဂါင်ဂဲ ကစုကပိုမ် ဘယ်ပျံတ်ယံတ်ဟာဝ်းငံရ် အခိင်ရဆံန်(12:27)မိနေတ်ဒိူန်အောႏ။

ဘံန်ဟောည်ႇဒေဲႈ ကျံရ်တီမ် ဆငည်း(5)ဒိူန် တိုအီးဘြားကဲ ရီန်းဒေလီပ်ဘြားဂြို ခေဲင်ဂါင် ကဝ်အီမိုႈ ကညာဂါင်တာမျိုးမီန်းထူန်း အဆာက်ဘိူန်း(56)ဆန်ုမ်ကဲ၊ ဝါည်ဒီန် ကညာဂါင်စီယိူဝ်း တိုအီဘြားကဲဒီန် ဒါဘိုတ်ကိုႈဟာဝ်း ကိင်ကညာဂါင်ယံမ်းဟာဝ်းပွံတ်ဒေ။

ဘံန်ဟောည်ႇဒေဲႈ ကျံရ်တီမ် ဆငည်း(9) အခိင် ခီညှာ(10:20)ဒိူန် ဖုင်ပလိက်ကုင်တအာင်းဂဲ အခိင်ရေဲန်ဇီုင်းကာန်စေတ်ဆေး ပဂီတ်ကပုလေလုဒိူန် ဘိူန်းတိုည်းတိုအီးဒါခံင်ယိူည်ႇ အီမာည်း တားကျော်မို အဆာက်(33)ဆန်ုမ် ယိူဝ်းကဂေါပ်တောပ်ဘိုး ဖိင်လူည်းဟံပ်အူန်း ခေဲင်ကဘဲဝ်ဒဲႇ(1)ကဘဲဝ်ဘည်ဒီန်။

ပ်ုန်ဘိူန်းတိုည်းအီမာည်းကဲဒီန်မိုႈ တာဆျှောလီန်း အဆာက်ဘိူန်း(26)ဆန်ုမ်၊ တာလီန်ချှာန့် အဆာက်ဘိူန်း(23)ဆန်ုမ်၊ မံင်အံင်ဟေင် အအာက်(20)ဆန်ုမ် ကာည်း တာအံင်မေင် (ဒါ်ႈ) (တာအည်ကုလား)၊ ကဇေန်နီန်း ဖုင်ပလိက်လှံင်ကုင်တအာင်း တိုည်းအူန်းကဲ နှာင်းတိူဝ်ႈလာည်း ဟာဝ်းအရေးတောပ်လိူည် ဘည်ဥပဒေ တီုက်ယာႈအရေးခံင်ယိူည်ႇအောႏ။