ကောင်ဆံရ်ဇီုင်းပိင်ငျာကုင်တအာင်း-TLEC ပ္လိူရ်ႈလေႈဒါႈ ပ်ုန်ကယေင်မောကံပ် ကောန်ကျောင်အီအံင်(12)ဂဲ ခေဲင်ကုင်တအာင်းနီန် ကာည်း မောကံပ်ဘယ်ခီုတ် ပိင်ငျာချှံန်ဇာရ် ဘည်ပ္လအူန်းကုင်ကံမ်ဖာ ကောန်ကျောင်ဂဲ အီမိူဝ်ႈကီန်းဒည်း ကနာည်ဘိူန်းဒေဆီုပ်ပနောလာည်းပိင်ငျာချှံန်ဇာရ် ဇူႈတောႇကောန်ကျောင် ကနာည်ဟိုက်ႎါင်ပနော ကျောင် GED လိူဝ်ႈ(1) လှေင်(15)ကျံရ် ပ်ုန်ကပိုမ်ႎိူဝ်ႈဟာဝ်း BEAM Education Foundation ကာည်း ကောင်ဆံရ်ဇီုင်းပိင်ငျာကုင်တအာင်း-TLEC ။

ပ္လါႇဘေဲႇအီဟြာင်းဟိုက် ကနာည်ႎါင်ပနောကျောင်နီန် ဟည်လာက်ခါမ် ခည်မိုႈကျံရ်တာရ် ဆငည်း(15)ဒိူန် ဟည်စေတ်မေန်းရံရ်ႈဟောည်ႇဟာဝ်း တောပ်လိူည်ဘည်ပ္လအူန်း အိုမ်လှတာန်းဘေဲႇ ခေဲင်အဆာက်(18)ဆန်ုမ်ရောတ် အဆာက်(30)ဆန်ုမ် ကောန်တဘိုက်(36)အီး။

ကုင်တအာင်း၊ ပလှံင်အိုမ်ငျံရ် ကာည်း ခေဲင်လှံင်ရူကော အခိင်ဖုင်ပလိက်ကုင်တအာင်းဂဲ ရေဲန်ဇီုင်းကာန်တီုက်ယာ်ႈအရေးခံင်ယိူည်ႇ စိဘိူန်းတိုည်း တိုအီးဒါခံင်ယိူည်ႇ (11)အီး ခေဲင်ဒီန် အ်ုန်တောပ်ဘိုကောန်အီပ်ုန်အူအီး။

ခေဲင်ကုင်တအာင်း၊ ဖုင်ကဇောည်ဥပဒေတအာင်း- TLAFဂဲ ကယေင် ဒဲႈဟာဝ်းႎါင်ပနောပ္လံက်တံင်ဇူႈလောင်ဥပဒေနီန် မောဘယ်ပြိူဝ်ႈပျေဲႈလေႈ ဖုင်ယေန်ငံင် ဒါရဒေင်ဥပဒေဘည်ငိူပ်မေန်းဒံန်ခြဲ ကာည်း ပျဆနာတောန်နဲမာ် ဒါရဒေင်ဥပဒေကဇောည် စိဇူႈတောႇဟာဝ်း ကောန်တဘိုတ်ဂဲအီတောႇနောႈ ကျံရ်တီမ်၊ ဆငည်း(3) စိရိူရ်ႈလေႈပ္လါဘေဲႇအောႏ။

ဖုင်ဆျှိုည်ဖီမျေဂဲ ပ္လိူရ်ႈလေႈဒါႈ ဇူႈတောႇကောန်ကျောင် ကနာည်ဟိုက်ႎါင်ပနော ကျောင်ဒီပလိုမာပိင်ငျာကညာဘေဲႇဆဒါင် (Diploma in journalism) လိူဝ်ႈ(1) ပ်ုန်နံင်ဆာ်ႈအွံရ်ႎိူဝ်ႈဟာဝ်းဖုင်ဆျှိုည်ဖီမျေဆဒါင်အေဂျင်ဆီ-SPMဂဲ ကနာည်ဘယ်ပြိူဝ်ႈ ပျေဲႈလေႈ ကောန်တဘိုက်ဂဲ ကညာဆဒါင်ချဲမ် ခေဲင်ကုင်တအာင်းနီန်အောႏ။

ဖုင်ပလိက်ကုင်တအာင်းဂဲ ဘိူန်းတိုည်း တိုအီးကရိူရ်ႈကယံင်းခံင်ယိူည်ႇ (4)အီး၊ အီဒါခံင်ယိူည်ႇ(4)အီး ကာည်း အီမိူဝ်ႈအူန်းခံင်ယိူည်ႇ(3)အီး ကုင်တအာင်း၊ ခေဲင်ကျံရ်တာရ်နီန် လှံင်အေဲမ်ငူည်၊ လှံင်အိုမ်ငျံရ်၊ လှံင်အေဲမ်ခြီရ်၊ လှံင်မိူင်းလိုင်။