ကောင်ဆံရ်ဇီုင်းပိင်ငျာကုင်တအာင်း-TLECဂဲ ဇူႈႎိူဝ်ႈဟာဝ်းကျောင်ပနောဘေဲႇ ခည်မိုႈ ကျံရ်တောရ် ဆငည်း(8)ဒိူန် ဂဲဆာ်ႈဟိုရ်ပ္လူႈဆဒိဒါႈ ဘည်ကဆီုဝ်ကူန်မာကောန်ဒဲႇဂဲ အီညှံမ်အာပ်ကောန်ဒဲႇ ဟိုက်ကျောင်ဂဲဒိူန် ဘိူန်းအူန်းရောတ်ဒေဲႈအာပ်ဟာဝ်း။ ကျောင်ပနောဘေဲႇ ပ်ုန်ႎိူဝ်ႈဟာဝ်းခေဲင် (400)ကျောင်လှိူဝ်းနီန် ကောန်ကျောင်အီဟိုက်ဂေါည်(5)မူန်လှိူဝ်း။

ဘည်ဘာည်းအ်ုန်မိုႈ ကျံရ်တောရ်၊ ဆငည်း(13)၊ အခိင်ရမှိူဝ်(၁10:30)ထာန်နီ တာဝေယံခင်းထူန်း ကာည်း အီပ်ုန်အ်ုန် ပဲန်ပဋိပက္ခကအေ့ကဇာဝ်း။ ‌ဂေါပ်ဘည်ဒီန် တာလှမျိုး အီမိုႈကူန်အီပ်ုန်ဒီန် စိလီပ်ဒံန်ခြဲ ကနာည်နှာင်းဂါရ်အာဝ်ပဲန်ကအေ့ကဇာဝ်း။

ကုင်တအာင်း၊ အိူင်အိုမ်ယ်ုရ်၊ ပလှံင်အိုမ်ယ်ုရ် တီုင်ဘြောင်ချှာင် ဆာ်ႈအွံရ်ရေဲန်ဟောည်ႇပ္လေါည်ႎါင်ပနော ဇီုင်းကာန်လူမ်စြေးဇံင် ကာည်း စြေးခမို မောကံပ်ဘယ်ရေဲန်ဇီုင်းကာန် လံပ်ဘြောင်ချှာင် ကတီးကရီး ခည်မိုႈ ကျံရ်တောရ် ဆငည်း(15)ဒိူန်အောႏ။

ကုင်တအာင်း၊ အိူင်ရူကော၊ ပလှံင်အိုမ်ငျံရ်၊ ကျံရ်တောရ် ဆငည်း(14)ဒိူန် ဖုင်ပလိက်ကုင်တအာင်း ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပဇာရ်ဇီုင်းကာန်တားပလိက်လှံင် လိူဝ်ႈ(1) ပ်ုန်ကယေင်ႎိူဝ်ႈဟာဝ်း ႎါင်ပနောနီန်မိုႈ မောကံပ်ဘယ်ပဇာရ်ဆာ်ႈအွံရ် ဖုင်ပလိက်ကုင်တအာင်း၊ မောကံပ်ဆမားဇီုင်းကာန် ကတီးကရီး ကာည်း မောကံပ်နံပ်ပိင်ငျာ ဥပဒေ ကတာရ်ႈဒါင်းဇာရ်မှယ်နီန် ႎိူဝ်ႈပနောဟာဝ်း လှေင်(3)ကျံရ်အောႏ။