ဟောည်ႇဘိူန်းဒီရ်ႈ ပံပ်ဘေဲႇ ပ်ုန်ထုက်ရိူရ်ႈလေႈ PSLF/TNLAတီုင်ပ္လေႈလေႈဆဒါင် ခေဲင်ဆန်ုမ်2026၊ ကျံရ်တာရ်အောႏ
ဒီရ်;ကဇေန်နီးပ်ုန်ဒီရ်;ဂီုန်း
ဟောည်ႇဘိူန်းဒီရ်ႈ ပံပ်ဘေဲႇ ပ်ုန်ထုက်ရိူရ်ႈလေႈ PSLF/TNLAတီုင်ပ္လေႈလေႈဆဒါင် ခေဲင်ဆန်ုမ်2026၊ ကျံရ်တာရ်အောႏ
ကုင်တအာင်း၊ ပလှံင်အေဲမ်ခြီရ် ကျံရ်တာရ် ဆငည်း(30)ဒိူန် ဂေါႇဘြည်က္လာည်းဒါင်း ႎါည်ပဲန်အိုမ်ဒါင်းလှူပ် ခေဲင်လှံင်အေဲမ်ခြီရ် ဖုင်ပျံတ်ယံတ်ငံရ်ဂဲ၊ ဖုင်ဆပဲဆငါးဂဲကာည်း တာဘြောင်ချှာင်ဇံင်ဂဲ ကပိုမ်ဒေရေဲန်ဆာင်လာင်းႎီုန်ဟာဝ်း ကတာည်းက္လျံတ်ညာင် အီကီုတ်တေဲင်ဒေင်။
ဆန်ုမ်2026၊ ကျံရ်တီမ် ဆငည်း(1)ဒိူန် ကောင်ဆံရ်ခေါခါကုင်တအာင်း- THC ပ္လိူရ်ႈဒါႈ ဇူႈတောႇဟိုက်ကျောင် လိူဝ်ႈအာရ် ပ်ုန်နှာင်းႎိူဝ်ႈဟာဝ်း ရခြူမ်ကောင်ဆံရ် ခေါခါႇကုင်တအာင်း- THC ကျောင်“Tealand Institutes of Health-TIH” ကနာည်ဘွည်ႇပိင်ငျာဆနံမ်း [Bachelor of Medicine, Bachelor of Surgery (M.B.,B.S)]။
ကုင်တအာင်း၊ လှံင်မိူင်းလိုင်၊ ခမိုညောင်ထောက်၊ ရဝ်နားမျော် တံပ်အွံရ်ပ်ုန်လောတ်ကပီုန်တအာင်း-PSLF/TNLA တီုင်လံပ်ဘ္လံက်ချှာင်တြားဥပဒေဂဲ ဘ္လံက်ချတံမ်ကဘဲမ် (7)ဆန်ုမ် ပ်ုန်ဘိူန်းတိုည်းအူန်း ယာခီန်ကြည် ဘိူန်းအဆာက်(59)ဆန်ုမ် ကရိူရ်ႈကယံင်းခံင်ယိူည်ႇ အောႏ။
ဘည်မိုႈဘာည်းဘည်အ်ုန် ဘံန်ဟောည်ႇဒေဲႈ ကျံရ်တာရ်၊ ဆငည်း(28)ဒိူန် တာဆာန်းခံမ်း ဂေါည်ဒေဒါပဂါင် ခေဲင်ရဝ် ဒါႎံရ်ဖျောႇဒေယံမ်းရာင်ဒေ။ ဘံန် ကူန်ရဝ်မာဂါင်ယိူဝ်းအ်ုန် စိတိုန်းဆဒါင် တဖုင်ပလိက်ကုင်တအာင်းဂဲအောႏ။
ဘည်တိူဝ်ႈကနေဲႈလှိုပ်ဂုင် ကြောႈဖာဆာတအာင်း၊ ဘေဲႇတအာင်းကာည်း ထုင်မှိူမ်ဂြူခ်ြုမ် ကူန်မာအယ် ခြိူဝ်းမျိုးတအာင်း ဘည်ရောတ်စာ်မ်းဒေဲႈ ပဲန်ပ်ုန်ကအာ်မ်းဆငည်း ဘေဲႇတအာင်း ကရောပ်နိုက်လ(54)ဆန်ုမ်နီန် အီဂေါည်ခေဲင်ကုင်တအာင်း တောန်ဒီတောန်လှံင်၊ တီုင်ဌာနဂဲ၊ ကျောင်ပ်ုန်ႎိူဝ်ႈဟာဝ်း ကောင်ဆံရ်ဇီုင်းပိင်ငျာခြိူဝ်း တအာင်း-TLECကဲနီန်ကာည်း အီရောတ်ပကုင်အီဟံရ်ကဲမာ် ရေဲန်ဟောည်ဟာဝ်း ပ္လေါည်လှိုပ်ဂုင်ဆငည်းဘေဲႇတအာင်း ဟိူင်ဟိူင်ဆာဆာ။
ဘည်တိူရ်ႈလိူရ်ႈယိူဝ်းပုင်အရာင်နီန်မိုႈ ဘည်ရောတ်စာ်မ်းဒေဲႈ ကျံရ်ဘြဂဲတ် ဆငည်း(30)ဒိူန် ရေဲန်တောပ်ဟာဝ်းကူန်ရဝ်မာဂါင်ဂဲ ဟိူင်ဟိူင်ဆာဆာ ပ္လေါည်လှိုပ်ဂုင်ဆငည်းဘေဲႇတအာင်း ကရောပ်နိုက်လ(54)ဆန်ုမ် ပလှံင်အေဲမ်ခြီရ်၊ ခေဲင်ကုင်တအာင်းအောႏ။
ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ် ပရဝ်အူရဝ်ဒီန် တာထူန်းလို အူအီး လူည်ႇအမှုငံန် တေဲင်ကောန်အီပ်ုန် အဆာက်ညှံမ်နိုက်အူအီး တံပ်အွံရ်ပ်ုန်လောက်ကပီုန်တအာင်း PSLF/TNLA လူမ်လံပ်ဘ္လံက်ချှာင်တြားဥပဒေဂဲ နှာင်းလာည်ဟာဝ်းအရေး ဘ္လံက်ချတံမ်ကဘဲမ် (10)ဆန်ုမ်။
ဘည်ပဲန်ဟာဝ်းငံရ်ကဆူမ်းဒီန် ကျံရ်တာရ်၊ ဆငည်း(30)ဒိူန် အခိင်ခီညှာ(10:30)နြီလေႈထာန်နီန် တာတာန်းလူ ကာည်း အီပ်ုန်အ်ုန် မိူဝ်ႈလောင်ဇီုင်းကာန်ဒီဟံရ် အခိင်ဂါရ်ဟာဝ်းဘည်ဒီန် ငံရ်ပ်ုန်ပုတ်အူန်းဒီန် ဇူႈက္လိုႇဟာဝ်း ဂါင် တာအိုက်နု ကာည်း ယာရှောက်ဟွမ် မာ် ကဆူမ်းတောပ်ဟာဝ်းခေဲင် ဂါင်(3)ဂါင်ဒီန်။
ကုင်တအာင်း၊ ခေဲင်လှံင်အေဲမ်ခြီရ် ကျံရ်တာရ်၊ ဆငည်း(28) ရောတ် ဆငည်း(29) တံပ်အွံရ်ပ်ုန်လောတ်ကပီုန်တအာင်းPSLF/TNLA ဖုင်ဘေဲႇတအာင်း-TLAဂဲ ဆော်အွံရ် ရေဲန်ဟောည်ႇဟာဝ်းပါင်မိုန်ဒါင်း ကနာည်ထိင်ခြဲပဇာရ် ဘေဲႇတအာင်း ကာည်း ထုင်မှိူမ်ဘေဲႇဘာန်း။
ကျံရ်ပူရ် ဆငည်း (31)ဒိူန်း တံပ်အွံရ်ပ်ုန်လောတ်ကပီုန်တအာင်း PSLF/TNLA ဟည်ဘိူန်းဒေဆီမ်းဟာဝ်း လှံင်မိူင်မီတ် ဂဲရေဲန်ဟာဝ်းဇီုင်းကာန်ဘြောင်ချှာင် ရောတ်အူနှား အယ်ဟောည်ႇဝီရ်ယိူဝ်းအယ်တိူရ်ႈ ဘည်အရာင်ရည်းကပါ်ႇကပံန် ကူန်ရဝ်မာဂါင်အီဂေါည်လှံင်မိူင်မီတ်ဂဲ
(အရာင်ပုင်)
