ဘည်ရောတ်စာ်မ်းဒေဲႈ “ဆငည်းတီုက်ယာႈအရေးခံင်ယိူည်ႇပါ်ကံမ်ဖာ” ဘည်ကဆီုဝ် တံပ်အွံရ်ပ်ုန်လောတ်ကပီုန်တအာင်း- PSLF/TNLA ရေဲန်တောပ် ဇီုင်းကာန်တီုက်ယာႈအရေးခံင်ယိူည်ႇ တေဲင်ကံမ်ဖာနီန် ဇူႈပွံတ်ဆန်ုမ်2024 ရောတ်စာ်မ်း ဆန်ုမ်2025 ခေဲင်ဇိုချီုင်ဘြည်(2)ဆန်ုမ်နီန် ပ်ုန်ဘိူန်းတိုည်းအူန်း အရေးခံင်ယိူည်ႇ (20)ဘီလီယံလှိူဝ်းကဲနီန် တိုက်လူလှဲဝ်ႏႎီုန်ဟာဝ်းရအာည်ႇကူန်ရဝ်မာဂါင်ဂဲ ကျံရ်တောရ်၊ ဆငည်း(26) ပလှံင်အိုမ်ယ်ုရ်။

ဆန်ုမ်2026၊ ကျံရ်တောရ် ဆငည်း(26)နီန် လှိုပ်ဂုင်ဘည်ရောတ်စာ်မ်းဒေဲႈ ဆငည်းတီုက်ယာႈအရေးခံင်ယိူည်ႇပါ်ကံမ်ဖာ တံပ်အွံရ်ပ်ုန်လောတ်ကပီုန်တအာင်း-PSLF/TNLA တိုက်ပ်ုန်လူလှဲဝ်ႏႎီုန်အရေးခံင်ယိူည်ႇ ရအာည်ႇကူန်ရဝ်မာဂါင်ဂဲ ပ်ုန်ဘိူန်းတိုည်းအူန်း ခေဲင်ဆန်ုမ်(2024၊ 2025) ငေါႈခံန်တာန်းဖိုးအ်ုန်မိူဝ်ႈ ရိူန်းဘြာန် (20)ဘီလီယံလှိူဝ်း ပလှံင်အိုမ်ယ်ုရ်၊ အိူင်အိုမ်ယ်ုရ်၊ ကုင်တအာင်း။

ဘံန်ဟောည်ႇဒေဲႈ ကျံရ်ဖံန်၊ ဆငည်း(28) ခေဲင်လှံင်အိုမ်ယ်ုရ် အခိင်ကူန်မာကောန်ဒဲႇဟာဝ်းပဇီုင်း ကောန်အီမာည်းအူအီး ဘိူန်းအဆာက်(37)ဆန်ုမ်ထာန်နီန် လူည်ႇဟာဝ်းအမှုငံန်တေဲင်ကောန်အီပ်ုန်ဒဲႇ ဘိူန်းအဆာက်(7)ဆန်ုမ်ဒီန်အောႏ။

ယဲအီမိုႈ တီုင်ပ္လေႈလေႈဆဒါင် စေတ်ဆေးယိူဝ်း မိူဝ်ႈအီဒါဇီုဝ် ဖုင်းကပါဝ်း PSLF/TNLA၊ Logo၊ လာင်ယာန် ကာည်း ဘည်မိုႈဘည်ဘာည်း ႎိူဝ်ႈဒါအကောင့်ငါည် Facebook တေဲင်အောန်လဴင် ဒါဇီုဝ် "PSLF/TNLA News" နီန် ႎိူဝ်ႈဒါငါည်Pageကျာအူလှေ အီရေဲန် Follower တPageဂဲ အ်ုန်ဂေါည် (3,500)လှိဝ်း၊ အ်ုန်ကိက်ရေဲန်ဘည်မိုႈ ဖုင်ကပါဝ်း PSLF/TNLA ဟြာင်းဆဒါင်ကျာ၊ ဆဒါင်ကလူည်ႇ ကာည်း ရေဲန်ကိက်ကဆာင်းဟာဝ်းဘည်တဂေန်းအ်ုန် တေဲင်အောန်လဴင် ဘည်မိုႈဘည်ဘာည်း ဘည်ယိူဝ်းအ်ုန်ရာင်ဒေ။

ကုင်တအာင်း၊ ခေဲင်ကျံရ်ဖံန်နီန်၊ အိူင်အေဲမ်ခြီရ် ကာည်း အိူင်အိုမ်ယ်ုရ် ဖုင်ပလိက်ကုင်တအာင်းဂဲ ဘိူန်းတိုကညားကဲကဇိူရ်ႈကယံင်းခံင်ယိူည်ႇ ကောန်အီမာည်း(4)အီး၊ ကောန်အီပ်ုန်(1)အီး ကာည်း ကညားအီဒါခံင်ယိူည်ႇ(16)အီး ခေဲင်လှံင်။

ကုင်တအာင်း၊ လှံင်အိုမ်ယ်ုရ်၊ လှံင်မိူင်လိုင် ကာည်း လှံင်မာဝ်းႎံင်း ခေဲင်ကျံရ်ဖံန်ရဘံန်းဆူတ် ဖုင်ပလိက်လှံင်ကုင်တအာင်း ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇအီမာည်း(2)အီး ကာည်း တိုအီးဒါခံင်ယိူည်ႇခံင်ယိူည်ႇ(8)အီး။