ကုင်တအာင်း၊ အိူင်အိုမ်ယ်ုရ်၊ ပလှံင်အိုမ်ယ်ုရ် ခေဲင်ဆန်ုမ်2025 ပရဝ်အူရဝ်ဒီန် ပဲန်ဟာဝ်း ကောန်အီမာည်း(1)အီး လူည်ႇအမှုဇံန်တေဲင်ကောန်အီပ်ုန် အဆာက်ညှံမ်နိုက် ဖုင်ပလိက်ကုင်တအာင်းဂဲတိုည်းထိင်ခြဲဟာဝ်းအူန်း ကညားအီလူည်ႇအမှုငံန်တေဲင် ကောန်အီပ်ုန်။

ကောင်ဆံရ်ခေါခါႇကုင်တအာင်း (Ta'angland Health Council THC)ဂဲ ဆာ်ႈဟိုရ်ပ္လူႈဆဒိ တကူန်ရဝ်မာဂါင်ဂဲ အီဂေါည်ခေဲင်ကုင်တအာင်း ဘည်လိုအူန်းမိူဝ်ႈဆဒိ အန္တရာယ်အီဆမားလ ဒေင်ခြီတ်ဖိူမ် ဒဲႈအန္တရာယ်ဒါင်းဒါင်း ရောတ်စာ်မ်းတတိုပိုင်းအဆာက် ကာည်း ဇူႈတနှာည် ဆမားကတံက်ပဲန်ရောဂါ ဖိူမ်ဖ်ုမ် ပ်ုန်ဒါႈႎါႇရာဟာန်တာဗိုင်းရပ်စ် ဘည်ပဲန်ဒေဲႈတေဲင်ကံမ်ဖာ ကာည်း ကုင်အီဟံရ် ကဇေန်နီး။

ဘံန်ဟောည်ဒေဲႈ ကျံရ်ဖိုန် ဆငည်း(24)ဒိူန် အခိင်ဖုင်ပလိက်လှံင်ဂဲ ရေဲန်ဇီုင်းကာန် တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးကဇိူရ်ႈကယံင်း ယာယေနု အဆာက်(56)ဆန်ုမ် ကာည်း တာအံင်ခဲင် အဆာက်(29)ဆန်ုမ် ကဂေါပ်တောပ် ကအာင်ဆနံမ်ဂိူဝ်ႈ(590)ကအာင်၊ ဖိင်လူည်းဟံပ်ခေဲင်က္လောက်ဆပ်ပျာ (1)က္လောက်။

ပလှံင်အေဲမ်ခြီရ်၊ ဘံန်ဟောည်ႇ ကျံရ်ဖံန်၊ ဆငည်း(2) ဖုင်ပလိက်ကုင်တအာင်းဂဲ ရေဲန်ဇီုင်းကာန်စေတ်မေန်းဟာဝ်းခေဲင်အရာပ်အရာ ဘိူန်းတိုည်း ကညားအီဒါခံင်ယိူည်ႇ တာမောကျိူက်ဖေ့ ဘိူန်းအဆာက်(40)ဆန်ုမ်၊ တာအာကိုင် ဘိူန်းအဆာက်(32)ဆန်ုမ် ကာည်း တာဇော်မျိုးထူန် ဘိူန်းအဆာက်(30)ဆန်ုမ်အောႏ။

ဘည်မိုႈဘာည်းဘည်အ်ုန် အခိင် ခီညှာ(10:00)နြီထာန်နီး မာည်းအိုက်မောက် ဘိူန်းအဆာက်(18)ဆန်ုမ် ကာည်း မာည်းအိုက်လဝ ဘိူန်းအဆာက်(22)ဆန်ုမ် ဂါရ်အာရ်အီးဒီန် တိူဝ်ႈဒိူန်ပ္လေဘျုင်(80 မမ)ခေဲင်ဂါင် ဘ်ုန်ဂါရ်ကာမ် ပ္လေဘျုင်ဒီန်စီပဒူႈလံက်ဟာဝ်းဂါရ်ယံမ်းဟာဝ်းပွံတ် ဒီပဲန်အမှုကဆီုဝ်ဒီန်အောႏ။

ဘည်မိုႈအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(23) အခိင်စူန်အံပ်(4:30)နြီဒိူန် ကဝ်အီဇီုဝ် ဆာည်နော်ဝမ်းလဲင် အဆာက်(6)ဆန်ုမ် ဇူႈတဂါင် ဘလေႈဒေဲႈ က္လေင်ယာန် အခိင်ရောတ်တဒေင်ဒါင်းအူဒီ ကာည်း အီကောႈစာက်ထည်းနား(ဂီုင်) တာအချီတ် ပဲန်ကဒူႈဟာဝ်း။

ဖုင်ပလိက်ကုင်တအာင်းဂဲ ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ ကောန်အီမာည်း(1)အီး ကာည်း တိုအီးဒါခံင်ယိူည်ႇ(7)အီး ပလှံင်အေဲမ်ခြီရ်၊ အိူင်အေဲမ်ခြီရ်။

ကုင်တအာင်း၊ အိူင်အိုမ်ယ်ုရ်၊ ပလှံင်ကုင်ငှေါ ခေဲင်ကျံရ်အိုည်နီန် ဖုင်ပလိက်ကုင်တအာင်း ဘိူန်းတိုည်းတိုအီးဒါခံင်ယိူည်ႇ(19)အီး ကာည်း တိုအီးကဇိူရ်ႈကယံင်းခံင်ယိူည်ႇ(2)အီး။