လှိုပ်ဂုင်ဆငည်းတီုက်ယာႈအရေးခံင်ယိူည်ႇပါ်ကံမ်ဖာ တိုက်ပ်ုန်လူလှဲဝ်ႏႎီုန် အရေးခံင်ယိူည်ႇ ပ်ုန်ဘိူန်းတိုည်းအူန်း (20)ဘီလီယံလှိူဝ်း ပလှံင်အိုမ်ယ်ုရ်
27 June 2026
လှိုပ်ဂုင်ဆငည်းတီုက်ယာႈအရေးခံင်ယိူည်ႇပါ်ကံမ်ဖာ တိုက်ပ်ုန်လူလှဲဝ်ႏႎီုန် အရေးခံင်ယိူည်ႇ ပ်ုန်ဘိူန်းတိုည်းအူန်း (20)ဘီလီယံလှိူဝ်း ပလှံင်အိုမ်ယ်ုရ်
အိုမ်ယ်ုရ်၊ ကျံရ်တောရ် ဆငည်း(27)
ဆဒါင်ကုင်တအာင်း
ဆန်ုမ်2026၊ ကျံရ်တောရ် ဆငည်း(26)နီန် လှိုပ်ဂုင်ဘည်ရောတ်စာ်မ်းဒေဲႈ ဆငည်းတီုက်ယာႈအရေးခံင်ယိူည်ႇပါ်ကံမ်ဖာ တံပ်အွံရ်ပ်ုန်လောတ်ကပီုန်တအာင်း-PSLF/TNLA တိုက်ပ်ုန်လူလှဲဝ်ႏႎီုန်အရေးခံင်ယိူည်ႇ ရအာည်ႇကူန်ရဝ်မာဂါင်ဂဲ ပ်ုန်ဘိူန်းတိုည်းအူန်း ခေဲင်ဆန်ုမ်(2024၊ 2025) ငေါႈခံန်တာန်းဖိုးအ်ုန်မိူဝ်ႈ ရိူန်းဘြာန် (20)ဘီလီယံလှိူဝ်း ပလှံင်အိုမ်ယ်ုရ်၊ အိူင်အိုမ်ယ်ုရ်၊ ကုင်တအာင်း။
ပ္လေါည်ကခံပ်ကယည်နီန် PSLF/TNLAတာမ်တားတီုင်အွံရ်(1) တာမ်ခူန်ချုဒါင်း တားဇိုက်ဇာရ်၊ တားတီုင်ဘြောင်ချှာင် ခူန်အွံရ်ချု တားဂူႈဇာရ်၊ တာမ်တားတီုင်အွံရ်ဆီုက် ခူန်အွံရ်ချု တားဂေါင်ဆဲင်၊ တားတီုင်ကဆီုပ်ခြိူဝ်းမျိုးအီဟံရ် ခူန်အွံရ်ဒါင်း တားမိုဟေင်၊ တားတီုင်အွံရ်ပလိက် ခူန်အွံရ်ဒါင်း တားကုင်ခြီရ် ၊ အီရံပ်ဇီုင်းကပ္လိူင်တီုင်ဌာနဂဲ ကာည်း ကူန်ရဝ်မာဂါင်ဂဲ ကစုကပိုမ်ဂေါည် (1000)အီးလှိူဝ်း ဟိုက်ရောတ်ဒေဲႈအောႏ။
ကခံပ်ကယည်ပ္လေါည်နီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA တာမ်တားတီုင်အွံရ်(1) တာမ်ခူန်ချုဒါင်း တားဇိုက်ဇာရ် က္လာင်းကြောႈတံမ်းဒါႈ “ ကနာည်အရေးခံင်ယိူည်ႇ နံင်ဟြာည်ကမာ်ႈ ခေဲင်အရာပ်အရာအယ်နီန် အာဝ်မိုႈလိူည် ဇီုင်းကပ္လိူင်ဖုင်ကပါင်းအာဏာဂဲအူလှေ ကူန်ရဝ်မာဂါင်ဂဲမာ် လိုကဖြောမ်ကရောမ် ရေဲန်ဟာဝ်းဒါင်းဒါင်း။ ဆဲႈဒီန် ဆာ်အယ်ယိူဝ်းမိူဝ်ႈအီကဇိူရ်ႈကယံင်းခံင်ယိူည်ႇ ခေဲင်ဇံင်၊ ခေဲင်ရဝ်ကာည်း ခေဲင်အရာပ်အရာအယ်ကဲနီန် လိုကဖြောမ်ကရောမ် တိုန်းဟိုက်ဆဒါင်ချာ်န်းချာ်န်း တိုအီရံပ်ဇိုင်းကပ္လိူင်ဂဲ”အောႏ။
ႎါည်ဒီန် PSLF/TNLA တိုက်ပ်ုန်လူလှဲဝ်ႏႎီုန်ဟာဝ်း အရေးခံင်ယိူည်ႇ ရအာည်ႇကူန်ရဝ်မာဂါင်ဂဲ ပ်ုန်ဘိူန်းတိုည်းအူန်း ခေဲင်ဆန်ုမ်(2024၊ 2025) ဇိုချီုင်ဘြည်(2)ဆန်ုမ် ဖိင်လူည်း(108.74)kg၊ ကအာင်ဆနံမ်ယာမ(616.3)kg၊ ကာည်း ဖိင်ႎံင်း(19.409)kg။ ပ်ုန်တိုက်လူလှဲဝ်ႏႎီုန်ဟာဝ်း အရေးခံင်ယိူည်ႇကဲဒီန် ကစုကပိုမ်ငေါႈခံန်အ်ုန်မိူဝ်ႈ ရိူန်းဘြာန်(20)ဘီလီယံလှိူဝ်းအောႏ။
တံပ်အွံရ်ပ်ုန်လောတ်ကပီုန်တအာင်း-PSLF/TNLA ဇူႈပွံတ်ဆန်ုမ်(2012)ဒိူန် ရေဲန်ဒေဲႈဟာဝ်းဇီုင်း တီုက်ယာႈအရေးခံင်ယိူည်ႇနီန်ဒါင်းဒါင်း ဇူႈဆန်ုမ်(2012)ရောတ်စာ်မ်း(2025)ဒိူန် ဇိုချီုင်ဘြည်(13) ဆန်ုမ်နီန် ဘယ်ဒေတီုက်ယာႈတိုက်လူလှဲဝ်ႏႎီုန် ဖိင်လူည်း(701.1)kg၊ ဖိင်လူည်းကဲန်(25)kg၊ ဖိင်ႎံင်း(356.01)kg ကာည်း ကအာင်ဆနံမ်ယာမ(2,602.36)kg။ ဆဲႈဒါႇဒီန် ဘယ်ဒေတောႈ ပ်ုန်လူလှဲဝ်ႏႎီုန်လိုင်းဖိင်(5,313.01)ဧက ကာည်း ဘယ်ဒေဝီရ်ဘြဲဆားဒဲႈအကျံင် တတိုအီးဒါခံင်ယိူည်ႇဂဲ (11,337) အီးအောႏ။
မိုႈဘိုး ခည်မိုႈဆန်ုမ်2023ဒိူန်မာ် လှိုပ်ဂုင်ဆငည်းတီုက်ယာႈအရေးခံင်ယိူည်ႇ PSLF/TNLA တိုက်ပ်ုန်လူလှဲဝ်ႏႎီုန်ဟာဝ်း အရေးခံင်ယိူည်ႇပ်ုန်ဘိူန်းတိုည်းအူန်း ရအာည်ႇကူန်ရဝ်မာဂါင်ဂဲ ပရဝ်ကော်င်ႎည်း၊ လှံင်အေဲမ်ခြီရ် ကစုကပိုမ်ငေါႈခံန်အ်ုန်မိုႈ ရိူန်း(82)သန်းလှိူဝ်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists