ဖုင်ပလိက်ကုင်တအာင်းဂဲ လာည်အရေး တကညားလူည်ႇအမှုငံန်တေဲင်ကောန်အီပ်ုန်အဆာက်ညှံမ်နိုက် ကောန်အီမာည်း(2)အီး
16 June 2026
ဖုင်ပလိက်ကုင်တအာင်းဂဲ လာည်အရေး တကညားလူည်ႇအမှုငံန်တေဲင်ကောန်အီပ်ုန်အဆာက်ညှံမ်နိုက် ကောန်အီမာည်း(2)အီး
အိုမ်ယ်ုရ်၊ ကျံရ်တောရ်၊ ဆငည်း(16)
ဆဒါင်ကုင်တအာင်း
ကုင်တအာင်း၊ လှံင်အိုမ်ယ်ုရ် ကာည်း ပလှံင်အေဲမ်ခြီရ် ဖုင်ပလိက်ကုင်တအာင်းဂဲ လာည်အရေး တကညားလူည်ႇအမှုငံန်တေဲင်ကောန်အီပ်ုန်အဆာက်ညှံမ်နိုက် ကောန်အီမာည်း(2)အီး။
ဘံန်ဟောည်ႇဒေဲႈ ကျံရ်ဖံန်၊ ဆငည်း(28) ခေဲင်လှံင်အိုမ်ယ်ုရ် အခိင်ကူန်မာကောန်ဒဲႇဟာဝ်းပဇီုင်း ကောန်အီမာည်းအူအီး ဘိူန်းအဆာက်(37)ဆန်ုမ်ထာန်နီန် လူည်ႇဟာဝ်းအမှုငံန်တေဲင်ကောန်အီပ်ုန်ဒဲႇ ဘိူန်းအဆာက်(7)ဆန်ုမ်ဒီန်အောႏ။
ဘံန်ဟောည်ႇဒေဲႈ ခေါခါႇကောန်အီပ်ုန်ဒဲႇဒီန်မာ် အာဝ်ပဲန် ဂေါပ်ဘည်ဒီန် ကူန်မာအ်ုန် စိဟာဝ်းတိုည်းပယုင်ဆနံမ် စေတ်မေန်းယိူဝ်ႇကတူႈခံမ်လူည်ႇအမှုငံန် တိုန်းဆဒါင်တဖုင်ပလိက်ကုင်တအာင်း ဝိူဝ်ႈဟာဝ်းအမှုဒီန်အောႏ။
မိုႈဘို ပလှံင်အေဲမ်ခြီရ်မာ် ဘံန်ဟောည်ႇဒေဲႈ ကျံရ်ဖံန်၊ ဆငည်း(23) ကောန်အီမာည်းအူအီး ဘိူန်းအဆာက်(18)ဆန်ုမ် လူည်ႇဟာဝ်းအမှုငံန်တေဲင် ကောန်အီပ်ုန် ဘိူန်းအဆာက်(16)ဆန်ုမ်အောႏ။
ဘ်ုန်ကူန်မာကောန်ဒဲႇဒီန်ယိူဝ်း တိုန်းဆဒါင်ဝိူဝ်ႈဟာဝ်းအမှု တဖုင်ပလိက်ကုင်တအာင်းဂဲ ဖုင်ပလိက်ကုင်တအာင်းဂဲမာ် စေတ်မေန်း တိုည်းထိင်ခြဲဟာဝ်း ကညားအီလူည်ႇအမှာငံန်ဒီန်အောႏ။
ဆဲႈဒီန် ဖုင်ပလိက်ကုင်တအာင်းဂဲ တိုည်းထိင်ခြဲအူန်း ကညားလူည်ႇအမှုငံန်တေဲင်ကောန်အီပ်ုန်အဆာက်ညှံမ်နိုက် ကောန်အီမာည်းအာရ်အီးဒီန် နှာင်းလာည်းဟာဝ်းအရေး တောပ်ဘည်ဥပဒေ အမှုငံန်လာလီဘည်တေဲင်ကောန်အီပိုန်ဒဲႇ။
ဘံန်ဟောည်ႇဒေဲႈ ကျံရ်ဖံန်၊ ဆငည်း(9)မာ် ပလှံင်အိုမ်ယ်ုရ်၊ ပရဝ်အူရဝ်ဒီန် ကောန်အီမာည်းအူအီး လူည်ႇအမှုငံန်တေဲင်ကောန်အီပ်ုန်အဆာက်ညှံမ်နိုက်အူအီးဒီန်မာ် ဖုင်ပလိက်ကုင်တအာင်းဂဲ လာည်းဟာဝ်းအရေးတိုည်းထိင်ခြဲအူန်း ဟြာင်းဟိုက် မလူမ်လံပ်ဘ္လံက်ချှာင်တြားဥပဒေ စေတ်မေန်းဟာဝ်း။
ကနာည်ထိင်ခြဲ တေဲင်လံပ်နာဘာည်း တေဲင်ကောန်အီပ်ုန်အဆာက်ညှံမ်နိုက်နီး ကူန်ရဝ်မာဂါင်ဂဲ လိုကဖြောမ်ကရောမ် ရေဲန်ဟာဝ်းဇီုင်းကာန်။ ဆာ်ယိူဝ်းပ်ုန်ထံင်နောႈ လိုတိုန်းဟိုက်ဆဒါင် ချာ်န်းချာ်န်း။
#PSLF/TNLA
#တီုင်ပ္လေႈလေႈဆဒါင်
Comment Lists