ကုင်တအာင်း၊ အိူင်အိုမ်ယ်ုရ်၊ အိူင်မာဝ်းႎံင်း၊ အိူင်မိုဂူႈ၊ အိူင်ကိုက်ခည်း၊ အိူင်အေဲမ်ခြီရ်ကာည်း လှံင်မိူင်ယော်ကဲနီန် ခေဲင်ဆန်ုမ်2025 ဖုင်ပလိက်ကုင်တအာင်း ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ (316)အီးကာည်း တိုအီးဒါခံင်ယိူည်ႇ (2155)အီး။

အခိင်ဖုင်ပလိက်ကုင်တအာင်း လှံင်အေဲမ်ငူည်ဂဲ ရေဲန်ဇီုင်းကာန်စေတ်ဆေးဒိူန် ဘိူန်းတိုည်းတိုအီး ဒါခံင်ယိူည်ႇ (4)အီး ပလှံင်အေဲမ်ငူည်၊ အိူင်အေဲမ်ခြီရ်၊ ခေဲင်ကုင်တအာင်းအောႏ။

ႎါင်ပနော ပ်ုန်ႎိူဝ်ႈဟာဝ်း ဖုင်တီုင်ခေါခါႇကောင်ဆံရ် ကုင်တအာင်း-THCဂဲ ပ္လေါည်ပ္လါန်ဘေဲႇဒါဟံမ်း အခွါင်းဘိူန်းလီပ် ကျောင်ကောလေတ်သိပ္ပံ လံပ်ခေါခါႇ ကာည်း အီငိူပ်မေန်းဆူနာ လိူဝ်ႈ(2)နီး ကောန်ႎါင်ပနော ဂေါည်(45)အီး အောႏ။

ဆန်ုမ်2026၊ ကျံရ်အူ၊ ဆငည်း(12)ဒိူန် ရောတ်စာ်မ်း ဆငည်း ခြိူဝ်းတအာင်းယိူဝ်ႇတီုက်ႎှီုန်း နိုက်လ(63)ဆန်ုမ် ‌ဂေါႇမိုႈတိူဝ်ႈကနေဲႈဆငည်းခြိူဝ်းတအာင်းယိူဝ်ႇတီုက်ႎှီုန်းနီး PSLF/TNLA ပ္လေႈဒဲႈဘိူန်းလောတ်လာပ် တတိုအီးဇောႈကဘေဲမ်(15)အီး ကာည်း ပယောမ်ဒဲႈအီုင်ဂ္လံတ် တတိုအီးဇောႈကဘေဲမ်(55)အီး။

ခေဲင်ကျံရ်ကိူရ်အာရ်နီန် ဖုင်ပလိက်ကုင်တအာင်း ဘိူန်းတိုည်းတိုအီးကဇိူရ်ႈကယံင်း ခံင်ယိူည်ႇ (6)အီးကာည်း တိုအီးဒါခံင်ယိူည်ႇ(24) ခေဲင်ကုင်တအာင်း အီမိုႈ လှံင်အေဲမ်ခြီရ်၊ အေဲမ်ငူည်၊ ကိုက်ခည်းကာည်း လှံင်မိူင်လိုင်ကဲနီန်အောႏ။

ခေဲင်အူနှာ ဖုင်ပလိက်ကုင်တအာင်း ဘိူန်းတိုည်းတိုအီးဒါခံင်ယိူည်ႇ အီမာည်း(15)အီး ပလှံင်ကုင်ငှေါ၊ အိူင်အိုမ်ယ်ုရ်၊ ခေဲင်ကုင်တအာင်းအောႏ။

အခိင်ဖုင်ပလိက်ကုင်တအာင်း ရေဲန်ဇီုင်းကာန်လံပ်ကတ်ုမ် ခေဲင်အရာပ်အရာကာည်း လံပ်ဘ္လီုက်တြားဥပဒေ ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ(3)အီးကာည်း တိုအီးဒါ(1)အီး ပလှံင်မိူင်လိုင်ကာည်း လှံင်ကုင်ငှေါ၊ ခေဲင်ကုင်တအာင်းအောႏ။

ဘည်မိုႈအ်ုန် ဘံန်ဟောည်ႇဒေဲႈ ကျံရ်ကိူရ်အာရ် ဆငည်း(14) အခိင်ရမှိူဝ်(8:00)နြီဒိူန် ကဝ်အီဇီုဝ် မာည်းအံင်ထေး အဆာက်(24)ဆန်ုမ် ႎါည်အ်ုန်တျံင်ဘာႈမံဝ်း အ်ုန်စီလီပ်အီတ်ခေဲင်ဂါင် ကောန်အီပ်ုန်ဒဲႇဂဲဒီန်။