ကုင်တအာင်း၊ အိုမ်ယ်ုရ်၊ အိုမ်ငျံရ်၊ ရူကော၊ ဆဘော၊ အေဲမ်ခြီရ် ကာည်း မူစယ် ခေဲင်ကျံရ်တီမ်ဒိူန် ဖုင်ပလိက်ကုင်တအာင်းဂဲ ဘိူန်းဒေတိုည်း တိုအီးကဇိူရ်ႈကယံင်းခံင်ယိူည်ႇ(6)အီး ကာည်း တိုအီးဒါခံင်ယိူည်ႇ(43)အီး။

ဆငည်း(4)အမှိူဝ်ဒိူန် အခိင်ရဆံန်(12:28)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ပရဝ်တီုင်ဟျော လှံင်အိုမ်ယ်ုရ် လံက်ဟာဝ်း ကောန်ဒဲႇ မံင်ဆေယျအံင် အဆာက်(10)ဆန်ုမ်ကာည်း မံင်ထူန်းမျိုးအံင် အဆာက်(13)ဆန်ုမ်ယံမ်း၊ လံက်ဟာဝ်းဘိုး မမျဲတ်ဝူန်းချှဲယ် အဆာက်(10)ဆန်ုမ်၊ မခီန်ယုမေ အဆာက်(12)ဆန်ုမ်၊ မသန္တာဆိုး အဆာက်(9)ဆန်ုမ် မခီန်လပျေ့နှီင်း အဆာက်(12)ဆန်ုမ်၊ မထိုည်းယီ အဆာက်(13)ဆန်ုမ်၊ မံင်ခန့်သူရိုန်မီန်း အဆာက်(14)ဆန်ုမ်ကာည်း တာတောင်တာန်း အဆာက်(40)ဆန်ုမ်၊ တာဖိုးဆျှံန်း အဆာက်(60)ဆန်ုမ်ကာည်း တာပံန်စာန်း အဆာက်(60)ဆန်ုမ် ကဲ (9)အီး ကတူဖေးဘာတ်၊ ဒါႇခူဒီန် ဂါင်ဂေါည်ကူန်ရဝ်မာဂါင်ဂဲ (16)ဂါင်မာ် လံက်လူလှဲဝ်ႏဟာဝ်း။

ဘံန်ဟောည်ႇဒေဲႈ ကျံရ်အူကိူရ် ဆငည်း(2) အခိင်စူန်အံပ်(3)နြီဒိူန် ကဝ်အီဇီုဝ် မဆျှိုည်ညေင် အဆာက်(8)ဆန်ုမ် ဂေါည်ခေဲင်ဇံင်(8) အခိင်ဝီရ်ဒေဲႈ ပ‌ကျောင်ရောတ်တဒေင်ဂေါက်ကွင်း (ဒီငါ်ႈဂေါက်)ဒိူန် မိူဝ်ႈအီမာည်းအူအီး တောႇဟာဝ်းအ်ုန်ခေဲင်ယူပ် ပ္လေဲဝ်လူည်ႇအမှုငံန် ပယံမ်းဟာဝ်းအ်ုန်ဘည်ဒီန်အောႏ။

ကျံရ်အူကိူရ် ဆငည်း(4) အခိင်ခီညှာ(7:49)မိနေတ်ဒိူန် ဆီုက်ဘြာန်ဇေဝ် ဒါဇဲတ်ႎှည်တာ ရောတ်ဒေဲႈပဴင်ဘိုး ပ္လေဘျုင် ထာန်ဇံန်(250)(2)ပိုင်း ခေဲင်တံပ်ဆခါန်းပြီမ်ဂေါည်ဂဲအာည်ႇနီန် ပရဝ်မာန်ဟဲ။

ကျံရ်အူကိူရ် ဆငည်း(2) အခိင်ရမှိူဝ်(10:15)မိနေတ်ဒိူန် ပလှံင်ဆဘော၊ ရဝ်ဆာန်ဖေက် ဆီုက်ဘြာန်ဇေဝ်ဂဲ ကယေင်ခည်း ဒါယာင်ပ်ုရ် ရောတ်ဒေဲႈပဴင်ထဲင်ပ္လေဘျုင် ဇောႈပဒူႈဟာဝ်း ဒီအီတ်ကဒံတ်ဟောတယ်ကုမုဒြာ စီလံက်ဟာဝ်း ဟောတယ်ကုမုဒြာ လူလှဲဝ်ႏဒို,။

ပ်ုန်ကယေင်ႎိူဝ်ႈဟာဝ်းထီတအာင်း ကနာည်လံပ်ပိင်ငျာ ကုင်တအာင်း ပ္လေါည်ႎိူဝ်ႈထီ လိူဝ်ႈ(28)နီန် အီဘိူန်းဟာဝ်း ဆုဒါင်း(500)ဆဲန်မိုႈ ယာအပီးအီဂေါည် ပရဝ်ကုင်ကမာည်း ခမိုကုင်ကမာည်း၊ လှံင်အိုမ်ယ်ုရ်။

ဂေါႇဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ထာန်ဇံန်(500) လံက်အီမာည်း(1)အီးကာည်း အီပ်ုန်(3)အီး ယံမ်းဟာဝ်း၊ တောပ်ဘိုးကောန်ဒဲႇ(1)အီး ၊ အီမာည်း(2)အီးကာည်း အီပ်ုန်(2)အီး ကတူႈဘာတ်။

ကုင်တအာင်း ခေဲင်ကျံရ်တီမ်ဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ပဴင်ပ္လေဒါင်းကာည်း ဒါဒရိုင်း ပဴင်ပ္လေဘျုင် ပလှံင်မာဝ်းဓံင်း (10)လိူဝ်ႈ၊ ပလှံင်ဆဘော (1)လိူဝ်ႈ ၊ လှံင်မိုဂူႈ(2)လိူဝ်ႈ ကာည်း မိူင်လိုင် (1)လိူဝ်ႈ လံက်ဟာဝ်း ကောန်အီမာည်း(3)အီးယံမ်း၊ အီမာည်း(1)အီး ကာည်း ကောန်အီပ်ုန် (4)အီး ကတူႈဘာတ် ဂါင်(45)ဂါင်၊ ကျောင်ပနောဘေဲ(1)ကျောင် ကျောင်စဝ်(2)၊ ဓှါင်းဆုင်ဆာမ်(1)ကျောင်၊ ဂါင်ဓါႈ(2)ဂါင် ကာည်း ကား(1)ကြောင် ကတူႈဆိက်ပ္လေဘျုင်လံက် လူလှဲဝ်ႏဟာဝ်း။

ဘည်မိုႈအ်ုန် ကျံရ်အူကိူရ် ဆငည်းအဒိူဝ်း အခိင်ခီညှာဇေဝ်း(7:20)မနေဲတ်ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါယာင်ပ်ုရ် ရောတ် ဒေဲႈပဴင်ပ္လေဘျုင် ပလှံင်အိုမ်ငျံရ်(1)ပိုင်းကာည်း လှံင်ရူကာ (4)ပိုင်း။