25 October 2025

ပရဝ်ကော်ပေါင် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ်  ရောတ်ဒေဲႈပဴင်ပ္လေဘျုင်  လံက် စဝ်ဒါင်းအီအံက်ကျောင်လောန်ဟာဝ်း ၊ စဝ်ဆာင်ခါ(5)ပါး၊ ကောန်ဒဲႇအူအီး ကာည်း တာဂံတ်(1)အီးကတူႈဘာတ်

မိူင်လိုင်၊ ကျံရ်အူကိူရ် ဆငည်း(25)

ဆဒါင်ကုင်တအာင်း

ကုင်တအာင်း၊ အိူင်မိုဂူႈ၊ လှံင်မိူင်လိုင်၊ ပရဝ်ကော်ပေါင် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ်  ရောတ်ဒေဲႈပဴင်ပ္လေဘျုင်  လံက် စဝ်ဒါင်းအီအံက်ခေဲင်ကျောင် လောန်ဟာဝ်း ၊ စဝ်ဆာင်ခါ(5)ပါး၊ ကောန်ဒဲႇအူအီး ကာည်း တာဂံတ်(1)အီး ကတူႈဘာတ်။

ဘည်မိုႈအ်ုန် ဆငည်း(24) အခိင်စူန်အံပ်(3:57)မနေဲတ်ဒိူန် ဂေါႇဆီုက်ဘြာန်‌ဇေဝ်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ထာန်ဇံန်(500)(1)ပိုင်းဘည်ဒီန် စီလံက် စဝ်ဒါင်းအီအံက်ခေဲင်ကျောင်စဝ် အဆာက်(70)ဆန်ုမ် ဝါတော်ဘိူန်း (50)ဝါ လောန်ဟာဝ်း။ မိုႈဘိုး စဝ်အာည်းကျန် အဆာက်(18)ဆန်ုမ်၊ စဝ်ကုမ္မရ အဆာက် (17)ဆန်ုမ်၊ စဝ်ဩရသ အဆာက်( 14)ဆန်ုမ်၊ စဝ်ဝိရိယ အဆာက်(13)ဆန်ုမ်၊ စဝ်စန္ဒိဘ အဆာက်(13)ဆန်ုမ်၊ မံင်အာည်းတီန် အဆာက်(4) ဆန်ုမ်ကာည်း တာကျန်ဒိ အဆာက်(96)ဆန်ုမ် ကတူႈဘာတ်၊ ဂါင်(2)ဂါင်၊ ကျောင်စဝ် အူကျောင် ကာည်း ႎှါင်းကျောင်(1)ႎှါင်း လူလှဲဝ်ႏဟာဝ်း။

ခေဲင်ကျံရ်အူကိူရ် ဇူႈဆငည်း(1)ရောတ် ဆငည်း (24)နီန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ်ရောတ်ဒေဲႈပဴင်ပ္လေဘျုင် ပလှံင်ရူကော(2)လိူဝ်ႈ၊ ပလှံင်မာဝ်းႎံင်း (2)လိူဝ်ႈ၊ လှံင်ဆဘော (6)လိူဝ်ႈ၊ လှံင်ကုင်ငှေါ(3)လိူဝ်ႈ၊ လှံင်မိူင်လိုင် (4)လိူဝ်ႈ၊ လှံင်အိုမ်ယ်ုရ် (6)လိူဝ်ႈ၊ လှံင်အိုမ်ငျံရ် (6)လိူဝ်ႈ၊ လှံင်မှိူမ်မီုတ်(3)လိူဝ်ႈ ကာည်း လှံက်မိုဂူႈ (4)လိူဝ်ႈ ကစုကပိုမ် ဟည်မိုႈ(36)လိူဝ်ႈ။

ဂေါႇပ္လေဘျုင်ပဴင်ဆီုက်ဘြာန်ဇဝ်ဂဲဘည်ဒီန် လံက်ဟာဝ်း ကောန်ကညောမ် (10)အီး၊ ကောန်အီမာည်း (16)အီး၊ ကောန်အီပ်ုန်(21)အီးယံမ်း ကစုကပိုမ် (47)အီးယံမ်း၊ ကောန်ဒဲႇ(25)အီး၊ အီမာည်း(19)အီး၊ ကောန်အီပ်ုန်(19)အီး ၊ စဝ်ဆာင်ခါ(2)ပါး ကတူႈဘာတ် ကစုကပိုမ် အီကတူဘာတ်‌ဂေါည် (65)အီး၊ ဂါင်ဂေါည်(170)ဂါင်၊ ကျောင်ပနောဘေဲႇ (5)ကျောင်၊ ကျောင်စဝ် (6)ကျောင်၊ ႎှါင်းကျောင်(8)ႎှါင်း ၊ ဂါင်ႎါႈ(6)ဂါင်၊ ဂါင်ဆဲင်(5)ဆဲင်၊  ယုင်စာက်မျံမ် (1)ယုင်၊ ဆဲင်ကယ် (4)ကြောင်၊ ကား (10)ကြောင် လူလှဲဝ်ႏဟာဝ်း။  

ဂေါႇဆီုက်ဘြာန်ဇေဝ်ဂဲ ဂီုည်လည်ဒေပဴင်ဟာဝ်း ပ္လေဘျုင်ဘည်နီန် ဘည်ကဆီုဝ်ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လံပ်ဆီုက်နာန်းနီန်း၊ လိုရေဲန်အူန်းမိူဝ်ႈ ရဒေင်ဒီဒံန်ခြဲ၊ ကနာည်နံင်ဒဝ်းလောတ် ဘိုန်းဒါႇယာင်ပ်ုရ်ပဴင် ဆီုက်ဘြာန်ဇေဝ်ဂဲနီန်းအောႏ။ 

ကညာအာဏာဆီုက်ဘြာန်ဇေဝ်ဂဲနီန် အာဝ်ႎါ်န်းလိူည် ခေဲင်ကုင်တအာင်းနီန် ပ်ုန်ဖုင်ကောန်တီုင်ကုင်အီးဘားနာက်လာက်ဂဲ ကာည်း ဖုင်ယိူဝ်ႇတီုက်ႎှီုန်းဂဲ တီုက်ဘိူန်းဆီမ်းဟာဝ်း ဒီလှံင်ကဲနီန်မာ် ဂဲဒါယာင်ပ်ုရ်၊ ပ္လေဒါင်း ကာည်း ဒရိုင်း လည်ဒေပဴင်ပ္လေဲဝ်လူည်ႇဟာဝ်း အီုင်ဂ္လံတ်ဆီုက် တေဲင်ကူန်ရဝ်မာဂါင်ဂဲအောႏ။

#PSLF/TN

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း