ႎါင်ပနောပဇာရ်ပ်ုန်နံပ်ဆမား ပဲန်တာဆြာ/ယာဆြာနီန် ဇူႈႎိူဝ်ႈဟာဝ်း ဘံန်ဟောည်ႇဒေဲႈ ကျံရ်ဖိုန် ဆငည်း(21)ဒိူန် ရောတ် ကျံရ်ဖံန် ဆငည်း(2)ဒိူန် ပဟာဝ်းလှေင်(12)ကျံရ်။ ခေဲင်ႎါင်ပနောနီန် တာဆြာ/ယာဆြာ ကစုကပိုမ်ဂေါည်(23)အီး ဟိုက်ဒေဲႈပနော။

ကုင်တအာင်း၊ အိူင်ရူကော၊ လှံင်ရူကော၊ တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ဆပဲဆငါး ဆာ်ႈအွံရ် ဝီရ်ဘြဲဆားဒေင်အ်ုန်အီလူလှဲဝ်ႏ ခေဲင်ဇံင် မောကံပ်ပဲန်ဒေင်ကွန်ကရစ် နှာင်းကူန်ရဝ်မာဂါင်ဂဲ ကံပ်ဘိူန်းဒေဒါဟာဝ်းဝီရ်ငှိူည်တောန်ဆငည်း။

ပ်ုန်ကယေင်ႎိူဝ်ႈဟာဝ်းထီတအာင်း ကနာည်ရိူန်းဒူးလံပ်ပိင်ငျာကုင်တအာင်း ပ္လေါည်ႎိူဝ်ႈထီ လိူဝ်ႈ(35)နီန် ဂေါႇမိုႈအာဝ်မိူဝ်ႈ အီဘိူန်းဟာဝ်း ဆုဒါင်း(500)ဆဲန်နီန် အီဘိူန်းဟာဝ်းဆုဒါင်းနံပါတ်အာရ်(300)ဆဲန်မိုႈ လိုည်းနန္ဒာထူန်း အီဂေါည်လှံင်ကုင်ငှေါ။

ကုင်တအာင်း ခေဲင်ကျံရ်ဖိုန်နီး ဖုင်ပလိက်ကုင်တအာင်းဂဲ ဘိူန်းတိုည်းတိုအီး ကဇိူရ်ႈကယံင်းခံင်ယိူည်ႇ(4)အီး ကာည်း တိုအီးခံင်ယိူည်ႇ(10)အီး ပလှံင်အေဲမ်ခြီရ်၊ လှံင်မိူင်းလိုင်း၊ လှံင်အိုမ်ယ်ုရ် ကာည်း လှံင်ကုင်ငှေါအောႏ။

ခေဲင်လှံင်ရူကော ကျံရ်ဖိုန်၊ ဆငည်း(30)ဒိူန် အခိင်ရဆံန်(11:30)နြီ ကားတာင်ကူမ် ဇူႈပရဝ်ဟိုမှိုင်းလေႈ ကဒါႇ လှံင်ရူကော ဘ်ုန်‌ရောတ်တဒေင်ကကာႈအူဒီန် ဇူႈကဒါႇလူမ်ပလိက် မောင်းဒေဲႈကညားဆဲင်ကယ်ဒီန် စီပဲန်ကဒူႈဟာဝ်းကဆီုဝ်ဒီန်အောႏ။