ပ္လါႇဘေဲႇနီန်မိုႈ ဇူႈ ခေဲင်ကျံရ်အာရ်နီန် နှာင်းတောဟာဝ်းအီဟိုက်ကျောင် ပ်ုန်နှာင်းႎိူဝ်ႈကျောင်“Tealand Medical School” ကနာည်ဘွည်ႇပိင်ငျာဆနံမ်း [Bachelor of Medicine, Bachelor of Surgery (M.B.,B.S)] အီဂေါည်ရခြူမ်ဖုင်ခေါခါႇကောင်ဆံရ်ကုင်တအာင်း။

ဆန်ုမ်2025 ခေဲင်အူဆန်ုမ်နီန် PSLF/TNLA တီုင်ဘြောင်ချှာင်ဂဲ ပ်ုန်ကယေင်ရေဲန်ဟာဝ်းဇီုင်းကာန်အရာပ်အရာပ် မောကံပ်ကတာရ်ဒါင်းဟိုက်ဇာရ်ကာည်း မောကူန်ရဝ်မာဂါင်ဂဲ ဘိူန်းဟာဝ်းဝီရ်ငှိည်ခေဲင်အိူင်အိုမ်ယ်ုမ်၊ အိူင်မာဝ်းႎံင်း၊ အိူင်မိုဂူႈ၊ အိူင်ကိုက်ခည်းကာည်း အိူင်အေဲမ်ခြီရ်ဟောည်ႇဘယ်ရေဲန်ဟာဝ်း ကပုကာည်း ဒေင် ဘည်ပ္လချှာင် ကစုကပိုမ် (248)လှေ။

ကောန်ကျောင်အီပ္လါန်ဘေဲႇဒါကြောႈ တဖုင်ခေါခါႇ ကောင်ဆံရ်ကုင်တအာင်း(THC)၊ အီငိူပ်မေန်းခေါခါႇကာည်း ကျောင်ကောလေတ်သိပ္ပံခေါခါႇ(CNHS)၊ ADN Program လိူဝ်ႈ(2)နီန် ကောန်ကျောင်အီအံင် ကောန်အီပ်ုန်(33)အီးကာည်း ကောန်အီမာည်း(5)အီး ကစုကပိုမ်ဂေါည်(38)အီး။

တံပ်အွံရ်ပ်ုန်လောတ်ကပီုန်တအာင်း-PSLF/TNLA လူမ်တီုင်ဘြောင်ချှာင်ဂဲ ဆာ်ႈအွံရ်ရေဲန်ပါင်ကတူႈကငျားတောပ်ကာ်မ်မတီလှံင်ဂဲကာည်း တာဘြောင်ချှာင်ဇံင်ဂဲ ကျံရ်အာရ်၊ ဆငည်း(5)ဒိူန် ပလှံင်မိူင်လိုင်၊အိူင်မာဝ်ႎံင်း၊ ခေဲင်ကုင်တအာင်း။