ပ်ုန်နံင်ႎိူဝ်ႈဟာဝ်းကျောင် “Tealand Medical School” အီဂေါည်ရခြူမ် ဖုင်ခေါခါႇ ကောင်ဆံရ်ကုင်တအာင်း ဘွည်ႇပိင်ငျာဆနံမ်း Bachelor of Medicine, Bachelor of Surgery (M.B.B.S) ကနာည်လိူဝ်ႈ(1)နီန် ခေဲင်ပ်ုန်ဟြာင်း ပနိုက်ဟံပ် ခေဲင်Email ကဲအီဘိူန်းပ္လါန်ကဲဒိူန် ဟည်တိုန်း‌ပ္လေႈအူန်းဘေဲႇဒါ TMS Student Code Noအောႏ။

အခိင်ဖုင်ပလိက်ကုင်တအာင်း ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါခံင်ယိူည်ႇ အီပ်ုန်(1)အီးကာည်း အီမာည်း(5)အီး ပလှံင်အေဲမ်ငူည်၊ အိူင်အေဲမ်ခြီရ်၊ ခေဲင်ကုင်တအာင်းအောႏ။

ကျံရ်အာရ်၊ ဆငည်း(12) အခိင်ရမှိဝ်(7:30)နြီ ဖုင်ပလိက်ကုင်တအာင်းဂဲ ဘိူန်းဆဒါင် ဒါ်ႈ တာဝူန်စော ဘိူန်းအဆာက်(36)ဆန်ုမ် မိူဝ်ႈခံင်ယိူည်ႇႎံင် (4)ထုတ်၊ ထုတ်ဒဲ့(22)ထုတ် ကစုကပိုမ် ထာန်ဇံန်(1462.6)ဂရမ် ကာည်း ပယာယီမွှေး ခံင်ယိူည်ႇလူည် ဂေါည် (126.4)ဂရမ် တောပ် ကအာင်ယာမ(113.6)ဂရမ်) ဘိူန်းတိုည်းဟာဝ်းအောႏ။

ကုင်တအာင်း၊ အိူင်အိုမ်ယ်ုရ်၊ အိူင်မာဝ်းႎံင်း၊ အိူင်မိုဂူႈ၊ အိူင်ကိုက်ခည်း၊ အိူင်အေဲမ်ခြီရ်ကာည်း လှံင်မိူင်ယော်ကဲနီန် ခေဲင်ဆန်ုမ်2025 ဖုင်ပလိက်ကုင်တအာင်း ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ (316)အီးကာည်း တိုအီးဒါခံင်ယိူည်ႇ (2155)အီး။

အခိင်ဖုင်ပလိက်ကုင်တအာင်း လှံင်အေဲမ်ငူည်ဂဲ ရေဲန်ဇီုင်းကာန်စေတ်ဆေးဒိူန် ဘိူန်းတိုည်းတိုအီး ဒါခံင်ယိူည်ႇ (4)အီး ပလှံင်အေဲမ်ငူည်၊ အိူင်အေဲမ်ခြီရ်၊ ခေဲင်ကုင်တအာင်းအောႏ။

ႎါင်ပနော ပ်ုန်ႎိူဝ်ႈဟာဝ်း ဖုင်တီုင်ခေါခါႇကောင်ဆံရ် ကုင်တအာင်း-THCဂဲ ပ္လေါည်ပ္လါန်ဘေဲႇဒါဟံမ်း အခွါင်းဘိူန်းလီပ် ကျောင်ကောလေတ်သိပ္ပံ လံပ်ခေါခါႇ ကာည်း အီငိူပ်မေန်းဆူနာ လိူဝ်ႈ(2)နီး ကောန်ႎါင်ပနော ဂေါည်(45)အီး အောႏ။

ဆန်ုမ်2026၊ ကျံရ်အူ၊ ဆငည်း(12)ဒိူန် ရောတ်စာ်မ်း ဆငည်း ခြိူဝ်းတအာင်းယိူဝ်ႇတီုက်ႎှီုန်း နိုက်လ(63)ဆန်ုမ် ‌ဂေါႇမိုႈတိူဝ်ႈကနေဲႈဆငည်းခြိူဝ်းတအာင်းယိူဝ်ႇတီုက်ႎှီုန်းနီး PSLF/TNLA ပ္လေႈဒဲႈဘိူန်းလောတ်လာပ် တတိုအီးဇောႈကဘေဲမ်(15)အီး ကာည်း ပယောမ်ဒဲႈအီုင်ဂ္လံတ် တတိုအီးဇောႈကဘေဲမ်(55)အီး။

ခေဲင်ကျံရ်ကိူရ်အာရ်နီန် ဖုင်ပလိက်ကုင်တအာင်း ဘိူန်းတိုည်းတိုအီးကဇိူရ်ႈကယံင်း ခံင်ယိူည်ႇ (6)အီးကာည်း တိုအီးဒါခံင်ယိူည်ႇ(24) ခေဲင်ကုင်တအာင်း အီမိုႈ လှံင်အေဲမ်ခြီရ်၊ အေဲမ်ငူည်၊ ကိုက်ခည်းကာည်း လှံင်မိူင်လိုင်ကဲနီန်အောႏ။

ခေဲင်အူနှာ ဖုင်ပလိက်ကုင်တအာင်း ဘိူန်းတိုည်းတိုအီးဒါခံင်ယိူည်ႇ အီမာည်း(15)အီး ပလှံင်ကုင်ငှေါ၊ အိူင်အိုမ်ယ်ုရ်၊ ခေဲင်ကုင်တအာင်းအောႏ။