တီုင်ဌာနကောန်အီပ်ုန်ဟြေဲႈဒါင်းဟိုက်ဇာရ်ဂဲ ရေဲန်ဇီုင်းကာန် ဒဲႈဟာဝ်းလော်င်ပိင်ငျာ ဘည်ပ္လေဲဝ်လူည်ႇအခွါင်းအရေး ခေဲင်ရဝ်ဂါင်၊ လံပ်ခေါခါႇကာည်း ကောန်အီပ်ုန်၊ ဘည်ပျောတခိူည်းရဟောမ်ရမာကာည်း ကောန်အီပ်ုန်၊ လံပ်ပိင်ငျာ ကာည်းကောန်အီပ်ုန်၊ အရေးခံင်ယိူည်ႇကာည်း ကောန်အီပ်ုန်၊ ဘည်ကောန်အီပ်ုန်ခံတ်ဇေဝ်း၊ လံပ်ဘြောင်ရိူန်းခြီရ်ကာည်း ကောန်အီပ်ုန်၊ အခွါင်းအရေးကာည်း ကောန်အီပ်ုန်၊ ဘည်ကောန်အီပ်ုန် ဘိူန်းဘ္လူတ်ဟောမ်ဂြိုခြီုင်ဥစ္စာ၊ ဘည်ကကာ်ႈအဆာင်းရဟောမ်ရမာ ဘည်အခွါင်းအရေး ကောန်ဒဲႇ၊ ဘည်ခ္လါည်းအဆာက်အူကိူရ် ဟိုက်နှာတေဲင်၊ ဘည်ဒဲႈပိင်ငျာကဆီုဝ်လိင်ကာည်း ဘည်ခေါခါႇအဆီုပ်ခြိူဝ်းကဲနီန်။

ကောင်ဆံရ်ဇီုင်းပိင်ငျာကုင်တအာင်း-TLECဂဲ ဆာ်ႈအွံရ်ရေဲန်ပ္လေါည် လံပ်ပိင်ငျာကာည်း ပ္လေါည်ဒဲႈဆု တကောန်ကျောင်ဂဲ ကနာည်ဆန်ုမ်ပနောဘေဲႇ 2025-2026 ပလှံင်အိုမ်ယ်ုရ်၊ အိူင်အိုမ်ယ်ုရ်၊ ခေဲင်ကုင်တအာင်း။

ပ္လေါည်ပ္လိုတ်ႎါင်ပနောနီန် ဖုင်ဘေဲႇတအာင်း-TLAဂဲ ဆာ်ႈအွံရ်ဟောည်ႇ‌ရေဲန်ဟာဝ်း ပရဝ်ပါင်လဲင် ခည်မိုႈ ကျံရ်အာရ် ဆငည်း(2)ဒိူန်။ ႎါင်ပနောဒီန် အီဟိုက်မိုႈ စဝ်ဆာင်ခါ(1)ပါး၊ ကောန်အီမာည်း(13)အီး ကာည်း ကောန်အီပ်ုန်(34) ကစုကပိုမ်ဂေါည်(48)အီး ဟိုက်ဒေဲႈပနော။

ကနာည်ရိူန်းဒူး လံပ်ပိင်ငျာကုင်တအာင်း ကောင်ဆံရ်ဇီုင်းပိင်ငျာကုင်တအာင်း-TLEC ဂဲ ဆာ်ႈအွံရ်ႎိူဝ်ႈဟာဝ်း ထီတအာင်း လိူဝ်ႈ(32)နီန် ခည်မိုႈ ကျံရ်အာရ် ဆငည်း(1) အခိင်ခီညှာဒိူန် ပလှံင်အိုမ်ယ်ုရ်၊ ခေဲင်ကုင်တအာင်း။

ဖုင်ခေါႇခါႇကောင်ဆံရ်ကုင်တအာင်း (THC) ဆာ်ႈဟိုရ်ပ္လူႈဆဒိ ကနာည်နံင်ပ္လါန်ဘေဲႇဒါကြောႈ တအီနံင်ဟိုက်ကျောင် ငိူပ်မေန်းခေါခါႇ ကာည်း ကျောင်ကောလေတ်သိပ္ပံခေါႇခါႇ(CNHS)၊ ADN Program (Batch-2) လိူဝ်ႈ (2) ပ္လူႈဆဒိတဂဲ ဒေဲႈပ္လါန်ဘေဲႇ ဘံန်မိုႈကျံရ်အာရ် ဆငည်း(2)နီန်အောႏ။