05 February 2026

ပ္လေါည်ႎိူဝ်ႈထီ လိူဝ်ႈ(32)နီန် အီဘိူန်းဟာဝ်း ဆုဒါင်း(500)ဆဲန်မိုႈ ကိုခဲတ်တူန် အီဂေါည်ပလှံင်မိုဂူႈ

အိုမ်ယ်ုရ်၊ ကျံရ်အာရ် ဆငည်း(4)

ဆဒါင်ကုင်တအာင်း

ပ်ုန်ကယေင်ႎိူဝ်ဟာဝ်းထီတအာင်း ကနာည်လံပ်ပိင်ငျာကုင်တအာင်း ပ္လေါည်ႎိူဝ်ႈထီ လိူဝ်ႈ(32)နီန် အီဘိူန်းဟဝ်း ဆုဒါင်း(500)ဆဲန်မိုႈ ကိုခဲတ်တူန် အီဂေါည်ပလှံင်မိုဂူႈ။

ကနာည်ရိူန်းဒူး လံပ်ပိင်ငျာကုင်တအာင်း ကောင်ဆံရ်ဇီုင်းပိင်ငျာကုင်တအာင်း-TLEC ဂဲ ဆာ်ႈအွံရ်ႎိူဝ်ႈဟာဝ်း ထီတအာင်း လိူဝ်ႈ(32)နီန် ခည်မိုႈ ကျံရ်အာရ် ဆငည်း(1) အခိင်ခီညှာဒိူန် ပလှံင်အိုမ်ယ်ုရ်၊ ခေဲင်ကုင်တအာင်း။

အက္ခရာဆုဒါင်း(500)ဆဲန်မိုႈ (B-56410) ဆဲဒါ ဆု(500)ဆဲန် အ်ုန်တောပ်ဘိုး ဆု(100)ဆဲန် အူဆု၊ ဆု(50)ဆဲန် အူဆု၊ ဆု(30)ဆဲန် အူဆု၊ ဆု(10)ဆဲန် အူဆု၊ ဆု(5)ဆဲန် ဖိုန်ဆု၊ ဆု(2)ဆဲန် အိုည်ကိူရ်ဆု၊ ဆဲႈဒါႇဆုကဲနီန် ချဒဲႈဟာဝ်းဘိုး အက္ခရာဆုဂဏန်းအီကနှေရ်နှာဘံန်း(4)ပိုင်း ကာည်း အီကနှေရ်နှာဘံန်း(3)ပိုင်း တဆု(500)ဆဲန် တဆု(500)ဆဲန်ကာည်း ဆု(100)ဆဲန်၊ မိုႈဘိုး  အက္ခရာအီအာဝ်ကနှေရ် ဂဏန်းအီကနှေရ်(5)ပိုင်း တဆု(2)ဆဲန်အောႏ။

ဆဲႈဒီန် နံင်ချဒဲႈဟာဝ်းဘိုး တကနာည်းအီယံင်းထီဂဲ ဆုပ်ုန်ပေါက်(2)ခေဲင်ပယာႈ၊ ဆုပ်ုန်ချဒဲႈဟာဝ်း (2)ခေဲင်ပယာႈနီန် အာဝ်မိုႈစိ နံင်တိူဝ်ႈလာည်းခေဲင်အီပေါက်ကဲနီန် မိုႈလူမ်ထီကဲ ချဒဲႈဟာဝ်း။

ဘံန်ဟောည်ႇဒေဲႈ ဆန်ုမ်2025၊ ကျံရ်(12) ပ္လေါည်ႎိူဝ်ႈထီ လိူဝ်ႈ(31)ဒိူန်မာ် အီဘိူန်းဟာဝ်းဆုဒါင်း (500)ဆဲန် အက္ခရာအ်ုန်မိုႈ (B-03574)  ယာမျအေး ဂေါည်ရဝ်နံမ်လီန်း၊ ခမိုမာန်လာန်း၊ လှံင်အိုမ်ယ်ုရ်။

ကောင်ဆံရ်ဇီုင်းပိင်ငျာကုင်တအာင်း-TLEC ဂဲ ဘံန်ဟောည်ႇဒေဲႈ ဆန်ုမ်ပနောဘေဲႇ 2024-2025ဒိူန် ဘယ်ႎိူဝ်ႈဟာဝ်း ကျောင်ပနောဘေဲႇ(600)ကျောင်လှိူဝ်း၊ ကောန်ကျောင်အီဟိုက်ဂေါည် (66000)အီးလေႈ ကာည်း တာဆြာ/ယာဆြာအီပနောဂေါည်(3500)အီးလေႈ၊ ဆာ်မိုႈ ဆန်ုမ်ပနောဘေဲႇ 2025-2026နီန် ရီန်းရဲတ်ဆီုပ်ႎိူဝ်ႈဟာဝ်း ကျောင်အီကီုတ် ခေဲင်လှံင်ဂဲဒိူန်အောႏ။

ဂေါႇဘည်ဒီန် ပ်ုန်လိုရိူန်းဒူး အီကီုတ်ကနာည်ကျောင်ဂဲဒီန် ကာည်း ရိူန်းရူႈကျံရ် ကနာည်တာဆြာ/ယာဆာဂဲ ရိူန်းပ်ုန်ဘိူန်းယံင်းထီတအာင်းနီန် စီကဇောည်ဒဲႈဟာဝ်းကနာည်ဂဲ၊ ဘည်ကဆီုဝ်ကူန်ရဝ်မာဂါင်ဂဲ အီဂေါည်ခေဲင်အရာပ်အရာအယ်ကဲနီန် ဆာ်အယ်ဆိင်ကဇောည်ထီဝ်း လံပ်ပိင်ငျာကောန်ကျောင်ဂဲ မှာန်းအယ်ကဇောည် ထိုးဒဲႈထီတအာင်းနီန်အောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း