ဆဒါင် ခေဲင်ကုင်တအာင်း နှာင်းကတာရ်;ဒေဝိူဝ်;ဟာဝ်း ကျောင်ပနောဘေဲ, (500)ကျောင်လေ;
28 March 2024
ဆဒါင် ခေဲင်ကုင်တအာင်း နှာင်းကတာရ်;ဒေဝိူဝ်;ဟာဝ်း ကျောင်ပနောဘေဲ, (500)ကျောင်လေ;
ဆန်ုမ်2024၊ ကျံရ်အိုည် ဆငည်း (11)
ကုင်တအာင်း၊ ကျံရ်အိုည် ဆငည်း (9)ဒိူန်း ကာ်မ်မတီဇီုင်းပိင်ငျာခြိူဝ်းတအာင်း-TNECဂဲ ထုက်ပြံတ်လေ;ဒါ; ဆန်ုမ်နံင်ဒေဲ; 2024-2025 ခေဲင်ကုင်တအာင်းအယ် နှာင်းကတာရ်;ဒေဝိူဝ်;ဟာဝ်း ကျောင်ပနောဘေဲ, (500)ကျောင်လေ;အောႏ။
ခည်မို; ကျံရ်အိုည် ဆငည်း(2) ရောတ် ဆငည်း (7)ဒိူန်း ကာ်မ်မတီဇီုင်းပိင်ငျာခြိူဝ်းတအာင်း- TNECဂဲ ရေဲန်ဟာဝ်း ပါင်ကမိုန်ကရောတ်ဆန်ုမ် ကာည်း ဆန်ုမ်ပိင်ငျာ အီနံင်ရောတ်ဒေဲ;ဒီန် ကနာည်ဖုင်ကပါင်း ကတာရ်;ဟိုက်ဇာရ် ဒီကမိုန်ဇီုင်း ကနာည်နံင် ဘယ်ရေဲန်ဒဲ; ကဏ္ဍ လံပ်ပိင်ငျာ ကူန်ရဝ်မာဂါင်ဂဲ နှာင်းကဝါ; ခဲင်ကုင်တအာင်း ကာည်း ဂေါ,မို;နံင်ရိူရ်;ဟာဝ်းလံပ်ပိင်ငျာ တီုင်ရျံရ်;အရာပ် ကနာည်းလံပ်ပိင်ငျာတီုင်ရျံရ်; ကောန်ခြိူဝ်း ကူန်ရဝ်မာဂါင်ဂဲ ပါ်ဒို,ဒိုည်,ဘိူန်းလီပ်ကရောမ်ကာ်မ်မတီဇီုင်းပိင်ငျာခြိူဝ်းတအာင်း -TNECနီန် စီဝီရ်ခ္လါည်းအ်ုန်ပဲန် ကောင်ဆံရ်ဇီုင်းပိင်ငျာကုင်တအာင်း-TLECအောႏ။
ခေဲင်ပါင်ပ္လါ,ဘေဲ,ဒီန် စီတောပ်ဒါ; ခေဲင်ကုင်တအာင်း ကနာည်လံပ်ပိင်ငျာ နံင်ကတာရ်;ဟြေဲ;ဒါင်းဇာရ် နံင်ရီတ်ရဲတ်ဒေဝိူဝ်;ဟာဝ်း လံပ်ပိင်ငျာချှံန်ဇာရ်၊ ကနာည်နံင်ပေန်ဒေဲ; တက္ကသိုလ် နံင်ကတာ်န်းကဓျံန်း၊ နံင်ဖီုက်လျံင်ပိင်ငျာကောန်ဒဲ,၊ ဖဲက်ဒရယ် မူဝါဒလံပ်ပိင်ငျာ၊ ကျောင်အီမို;မူဝါဒ ဘေဲ,ကူန်တာဖာဆာကဲဒီန် စီဘယ်ဒေဘ္လံက်ချ ခေဲင်ပါင်ကမိုန်ဒီန်အောႏ။
ကနာည်ဆန်ုမ် 2024-2025 နှာင်းကတာ;ဒေဝိူဝ်;ဟာဝ်း ကျောင်ပနောဘေဲ,(550)ခါန်း ကနာည်နံင်ပနော နံင်ရီတ်ရဲတ်ဒေဆီုပ်တခေါရ်ဟာဝ်း ဆြာ/ဆြာမ ဂဲအီလီပ် CDM ခေဲင်ကုင်ဘြာန်ကဲနီန်ပါ်ဒို,ဒိုည်,အောႏ။
ကဲအီမို; ဆြာ/ဆြာမ CDMဂဲမာ် ဒဲ;ပယ်ဆမားဒါးအခွါင်းအရေး ကျောင်ပ်ုန်ဝိူဝ်;အူန်းယဲ၊ ကနာည်နံင်ပနောလာည်းဘေဲ, ဆိင်ဒဲ; ဆြာ/ဆြာမအယ် ဂဲအီလီပ် CDM ခေဲင်ကုင်တအာင်းကဲနီန် ကဖြောမ်ကရောမ်လီပ် ကာည်း လှံင်တောန်လှံင် အီဂေါည် ခေဲင်ကုင်တအာင်း ကနာည်လိုဖီုက်လျံင်ပိင်ငျာကောန်ဒဲ,ဂဲအောႏ။
ကျောင်ပနောဘေဲ,အီဟောည်, ဒေဲ; ဆန်ုမ် 2023-2024 ကာ်မ်မတီဇီုင်းပိင်ငျာခြိူဝ်းတအာင်း-TNECဂဲ ဘယ်ဒေဝိူဝ်;ဟာဝ်း ကျောင်(380)လေ; ဆြာ/ဆြာမ အီပနောဂေါည် (1500) လေ; ဘယ်ဒေပနောဟာဝ်းထာန်ဒီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists