ကုင်တအာင်း၊ အိူင်အိုမ်ယ်ုရ်၊ ပလှံင်ကုင်ငှေါ ဂေါႇဘြည်က္လာည်းဒါင်းဆေ ပဲန်အိုမ်ဒါင်းလှူပ် ဟာဝ်းဒေင်လူလှဲဝ်ႏ တီုင်ဌာနလှံင်ကုင်ငှေါဂဲ စီရေဲန်ဇီုင်းကာန်ကပိုမ်ဒေႎီရ်ဘြဲဆား ဒေင်အ်ုန်အီလူလှဲဝ်ႏကဲဒီန်အောႏ။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ် တံပ်အွံရ်ပ်ုန်လောတ်ကပီုန်တအာင်း PSLF/TNLA ကော်မတီဆပဲဆငါးလှံင်အိုမ်ယ်ုရ်ဂဲ တောပ်စေတ်ဆေ ကနံဝ်ဘည်‌ရေဲန်ဇီုင်းကာန် ကာည်း ရေဲန်ဒဲႈကနံဝ်ဇီုင်းကာန် ကျံရ်တာရ်၊ ဆငည်း(9) ရောတ် ဆငည်း(12)။

ပလှံင်ရူကော ဂေါႇလှည်အိုမ်ဒါင်းဒူႈ တံင်ဘ္လောမ်ထာက်ငံရ် စိပဲန်ဂေႈဟာဝ်း တံပ်အွံရ်ပ်ုန်လောတ်ကပီုန်တအာင်း- PSLF/TNLA လူမ်အီန်ဂျင်နီယာငံရ်ရာင်လှံင်ဂဲ ႎီရ်ဘြဲဆာဒဲႈဟောည်ႇ ကျံရ်တာရ်၊ ဆငည်း(8)၊ အခိင် စူမ်အံပ်(4:30)နြီ။

ခေဲင်ကုင်တအာင်း ဂေါႇဘည်က္လာည်းတောန်ဆငည်း ကဒါႇ လှံင်အိုမ်ငျံရ်၊ လှံင်အေဲမ်ခြီရ် ကာည်း ခေဲင်လှံင်မိူင်းလိုင် တဝ်လှာပ်ုန်တီႇဆ်ုမ် ကူန်ရဝ်မာဂါင်ဂဲ ကတူႈလူလှဲဝ်ႏဆူမ်းဟာဝ်းဒိုႇအောႏ။

ရဝ်ပါင်ခါဒဲႇ၊ ခနားရဝ်လောည်ကာန် ဒေင်ဒါင်းဟာဝ်း ခေဲင်ရဝ်‌ဖာဒဲန် တာလှံင်ဂဲအီရံပ်ကပ္လိူင်ဂဲ ဆာ်အွံရ် ကူန်ရဝ်မာဂါင်ဂဲ တောႈတံင်‌ဟေဘ်ုပ်ဘ္ဘီုတ်ဟာဝ်းဒိုႇဒေင်၊ ကံပ်ဟာဝ်းညျှိူဝ်တောပ်ဒေင်ဒါင်း ရေဲန်ဟာဝ်းဒေင်ပဲန်မာဝ်းက္လဲတ်။

ဆိင်ပ္လူဒဲႈဆဒိ တကောန်တဘိုတ်အယ်ဂဲ ဘိူန်းဟြာင်းဟိုက် ပ်ုန်နံင်ႎိူဝ်ႈဟာဝ်း PSLF/TNLA ကျောင်-Ta’angland Chinese Language Center (TCLC) ကျောင်ပနောဘေဲႇခယ် ကုင်တအာင်း Diploma in Chinese Language လိူဝ်ႈ(2) ကနာည်ဟိုက်ႎါင်ပနော နှာင်းတောႇဟာဝ်း ကောန်ႎါင်ပနော အီ‌‌ဂေါည်ခေဲင်ကုင်တအာင်းနီန် ကနာည်ဘယ်ရိူရ်ႈဒေင်ပ်ုန်နံင်ဒဲႈပိင်ငျာ ကာည်း ကနာည်ဘယ်ပဇာရ်ပ်ုန်နံပ်ပ်ုန်ဆမား ကယေင်ႎိူဝ်ႈဟာဝ်း။

ကုင်တအာင်း၊ အိူင်ရူကော၊ အခိင်ဖုင်ပလိက်ကုင်တအာင်းဂဲ စေတ်မေန်း‌ရေဲန်ဇီုင်းကာန်တီုက်ယာ်ႈ အရေးခံင်ယိူည်ႇ ဘိူန်းတိုည်း ကောန်အီမာည်း(1)အီး ကရိူရ်ႈကယံင်း ဂြူစာက်ဆမားပဒူႈ၊ ဆာနာတ်အာဝ်လီပ်တြား ကာည်း ခံင်ယိူည် ခေဲင်ပလှံင်အိုမ်ငျံရ်။

ကပါင်းဖီုက်လျှံင်ဇီုင်းပိင်ငျာခြိူဝ်းတအာင်း (Ta'ang Education Academy - TEA)ဂဲ ပ်ုန်ထုတ်ရိူရ်ႈလေႈ ဇီုဝ်တောပ်ခေဲင်စရာင်း ကစုကပိုမ်(၁၁၈)အီးဒီန် ဘိူန်းဟိုက် ခေဲင်ဆန်ုမ်ပနောဘေဲႇ 2026-2027 ႎါင်ပနော ပဲန်တာဆြာ/ယာဆြာ ကျောင်ဒီပလိုမာ(Diploma in Teacher Education-DTED) လိူဝ်ႈ(4)နီန် TEA ထုတ်ရိူရ်ႈလေႈ ကျံရ်တာရ်၊ ဆငည်း(8)ဒိူန်အောႏ။