တအာင်းပြည်၊ တပ်မဟာ (၂)နယ်မြေ၊ ကျောက်မဲမြို့နယ်၊ ပန်ပေါင်းကျေးရွာတွင် စစ်ကောင်စီတပ်မှ တိုက်ပွဲဖြစ်ပွားခြင်းမရှိဘဲ ဒရုန်း (၃)စီးဖြင့် ဗုံး (၃)လုံး လာရောက်ကြဲချတိုက်ခိုက်မှုကြောင့် ပြည်သူလူထုနေအိမ်တစ်လုံး ထိမှန်ပျက်စီးခဲ့ပါသည်။

တအာင်းပြည်၊ တပ်မဟာ (၄)နယ်မြေ၊ မိုးကုတ်မြို့အရှေ့ပိုင်း၊ ရွှေလိပ်ပြာဟိုတယ်တွင် စစ်ကောင်စီတပ်မှ တိုက်ပွဲဖြစ်ပွားခြင်းမရှိဘဲ လေကြောင်းဖြင့် ပေါင် (၂၅၀)ဗုံး (၂)လုံး လာရောက်ကြဲချတိုက်ခိုက်မှုကြောင့် အမျိုးသား (၁)ဦးသေဆုံးခဲ့ပြီး (၃)ဦးထိခိုက်ဒဏ်ရာရရှိခဲ့ပါသည်။

တအာင်းပြည်၊ တပ်မဟာ (၇)နယ်မြေ၊ နမ့်ခမ်းခရိုင်၊ မူဆယ်မြို့နယ်၊ မော်တောင်းကျေးရွာတွင် ကားနှင့် ဆိုင်ကယ်ယာဉ်တိုက်မှုဖြစ်ပွားခဲ့ပြီးအမျိုးသားတစ်ဦး ပြင်းထန်ဒဏ်ရာရရှိခဲ့သည်။

တအာင်းပြည်၊ တပ်မဟာ (၉)နယ်မြေ၊ နမ့်ဆန်မြို့နယ်၊ အထက်မန်လွယ်ကျေးရွာတွင် မိခင်ဖြစ်သူနှင့် ၎င်း၏သမီးသည် ပိုးသတ်ဆေးသောက်ပြီး ကိုယ်ကိုသတ်သေရာတွင်မိခင်ဖြစ်သူမှ သေဆုံးသွားခဲ့ပါသည်။

တအာင်းပြည်၊ မိုးကုတ်နှင့် သီပေါမြို့နယ်တွင် ပလောင်ပြည်နယ်လွတ်မြောက်ရေးတပ်ဦး PSLF/TNLA တအာင်းပြည် မြို့နယ်ရဲတပ်ဖွဲ့မှ မူးယစ်ဆေးဝါးသုံးစွဲသူ (၆)ဦးနှင့်သုံးစွဲသူ (၇)ဦးတို့ကို ဖမ်းဆီးရမိခဲ့ပါသည်။

တအာင်းပြည်၊ တပ်မဟာ (၇)နယ်မြေ၊ နမ့်ခမ်းခရိုင်၊ မူဆယ်မြို့နယ်၊ မန့်ခုံကန်ကျေးရွာတွင် ဆိုလာပြားမှတစ်ဆင့် ဝါယာကြိုးရှော့ဖြစ်ပြီး နေအိမ် (၁)အိမ်မီးလောင်မှုဖြစ်ပွားသွားခဲ့သည်။

တအာင်းပြည်၊ တပ်မဟာ (၇)နယ်မြေ၊ မူဆယ်မြို့နယ်၊ နမ့်ပေါ်တံတားအနီးတွင် ကြက်သွန်ဖြူတင်ဆောင်လာသည့်ယာဥ်တစ်စီးသည် ဘရိတ်ပေါက်ပြီး တိမ်းမှောက်မှုဖြစ်ပွားခဲ့ပါသည်။

တအာင်းပြည်၊ ကျောက်မဲနှင့် နမ္မတူမြို့နယ်တွင် ပလောင်ပြည်နယ်လွတ်မြောက်ရေးတပ်ဦး PSLF/TNLA တအာင်းပြည် မြို့နယ်ရဲတပ်ဖွဲ့မှ မူးယစ်ဆေးဝါးသုံးစွဲသူအမျိုးသား (၄)ဦးနှင့် ရောင်းဝယ်သူ (၂)ဦးတို့ကို ဖမ်းဆီးရမိခဲ့သည်။

တအာင်းပြည်၊ တပ်မဟာ (၂)နယ်မြေ၊ သီပေါမြို့တွင် စစ်ကောင်စီတပ်မှ လေကြောင်းဖြင့် ပေါင်(၅၀၀) ဗုံးထပ်မံကြဲချတိုက်ခိုက်ခဲ့သည်။