နမ့်ခမ်းမြို့နယ်၊ ကျန့်ကွင်းကျေးရွာ၌ အောက်တိုဘာလ ၃၀ ရက်နေ့က တအာင်းပြည်မြို့နယ်ရဲတပ်ဖွဲ့က မူးယစ်ဆေးဝါးရောင်းဝယ်သူ အမျိုးသားတစ်ဦး၏ နေအိမ်မှ ဘိန်းဖြူ၊ ဘိန်းမဲနှင့် ယာမဆေးပြားများ ဖမ်းဆီးရမိခဲ့ပြီး၊ အလားတူ အောက်တိုဘာလ ၂၁ ရက်ကလည်း နမ္မတူမြို့နယ်တွင် မူးယစ်ဆေးဝါးနှင့်အတူ အမျိုးသားနှစ်ဦးကို ဖမ်းဆီးရမိခဲ့သည်။

တအာင်းပြည်ပညာရေးကောင်စီ - TLEC က ပညာရေးကဏ္ဍ ရေရှည်ဖွံ့ဖြိုးတိုးတက်ရေး၊ ဝန်ထမ်းများ ရာထူးတိုးမြှင့်ခန့်ထားရေးနှင့် အပြောင်းအရွှေ့ဆိုင်ရာ မူဝါဒများကို ပိုမိုနားလည်သဘောပေါက်စေရန် ရည်ရွယ်၍ နမ့်ခမ်း၊ မန်တုံ၊ နမ္မတူ၊ နမ့်ဆန်နှင့် ကျောက်မဲမြို့နယ်တို့ရှိ ပညာရေးဝန်ထမ်းများနှင့် အောက်တိုဘာလအတွင်း တွေ့ဆုံဆွေးနွေးပွဲများ ကျင်းပပြုလုပ်ခဲ့သည်။

တအာင်းပြည်၊ နမ့်ဆန်မြို့နယ်တွင် အောက်တိုဘာလအတွင်း ယာဉ်တိုက်မှုနှင့် ယာဉ်တိမ်းမှောက်မှု (၃) ကြိမ်ဖြစ်ပွားခဲ့ရာ ခရီးသည်ယာဉ်နှင့် ကားတိမ်းမှောက်မှုများကြောင့် လူ (၁) ဦးသေဆုံးပြီး (၆) ဦး ထိခိုက်ဒဏ်ရာရရှိခဲ့ကာ ဒေသခံပြည်သူများအနေဖြင့် ယာဉ်မောင်းနှင်ရာတွင် အထူးသတိပြုဂရုစိုက်ကြရန်လိုအပ်သည်။

တအာင်းပြည်အတွင်းရှိ နမ္မတူ၊ မိုင်းဝီး၊ မန်တုံနှင့် နမ့်ဆန်မြို့တို့၌ ဒေသဖွံ့ဖြိုးရေး၊ လမ်းပန်းဆက်သွယ်ရေးကောင်းမွန်ရေးနှင့် မြို့ပြသန့်ရှင်းသာယာလှပရေးတို့အတွက် PSLF/TNLA ဌာနဆိုင်ရာများနှင့် ဒေသခံပြည်သူများ ပူးပေါင်းကာ လမ်းများဖောက်လုပ်ပြုပြင်ခြင်း၊ တံတားဆေးသုတ်ခြင်း၊ ကျောင်းပတ်ဝန်းကျင်နှင့် ရေမြောင်းများ ရှင်းလင်းခြင်းလုပ်ငန်းများကို စုပေါင်းဆောင်ရွက်ခဲ့ကြသည်။