တအာင်းပြည်အတွင်း တအာင်းလူငယ်များ၏ အနာဂတ်ပညာရေးလမ်းကြောင်းများ ဖော်ဆောင်ပေးနိုင်ရန်နှင့် လူ့စွမ်းအားအရင်းအမြစ်များ ဖွံ့ဖြိုးတိုးတက်လာစေရန် ရည်ရွယ်၍ Ta’angland Chinese Language Center (TCLC) မှ ဦးဆောင်ဖွင့်လှစ်မည့် တရုတ်ဘာသာစကားဒီပလိုမာ (Diploma in Chinese Language) သင်တန်း အပတ်စဉ် (၂) အတွက် ရွေးချယ်ခံရသူ သင်တန်းသား၊သူ (၅၇) ဦး၏ အင်တာဗျူးဖြေဆိုမည့် ရက်နှင့်အချိန်များကို အသိပေးအပ်ပါသည်။

နမ့်ခမ်းမြို့၊ တအာင်းပြည်တွင် PSLF/TNLA အုပ်ချုပ်မှုအောက်ရှိ ဌာနဆိုင်ရာဝန်ထမ်းများ တအာင်းဘာသာစကား အခြေခံကျွမ်းကျင်စွာ အသုံးပြုနိုင်ရေးအတွက် တအာင်းစာအဖွဲ့-TLA မှ အခြေခံတအာင်းစာသင်တန်းကို စက်တင်ဘာ ၁၄ ရက်တွင် စတင်ဖွင့်လှစ်ခဲ့ရာ သင်တန်းသူ ၁၇ ဦးနှင့် သင်တန်းသား ၂၃ ဦး စုစုပေါင်း ၄၀ ဦး တက်ရောက်သင်ယူလျက်ရှိပြီး တစ်လတာကာလအတွင်း ရုံးလုပ်ငန်းဆိုင်ရာများတွင် အသုံးပြုနိုင်ရန်နှင့် မှန်ကန်စွာ ဖတ်ရှုရေးသားတတ်မြောက်စေရေး သင်ကြားပေးသွားမည်ဖြစ်သည်။

တအာင်းပြည် နမ့်ဆန်နှင့် မိုင်းငေါ့မြို့နယ်များတွင် PSLF/TNLA ၏ မူးယစ်ဆေးဝါးတိုက်ဖျက်ရေးလုပ်ငန်းများအတွင်း မူးယစ်ဆေးဝါးရောင်းဝယ်သူ ၁ ဦးနှင့် သုံးစွဲသူ ၂ ဦးကို ဖမ်းဆီးရမိခဲ့ပြီး ဘိန်းဖြူ ၃.၁ ဂရမ်၊ ယာမဆေးပြား ၁,၀၂၈ ပြား၊ ငွေကျပ် ၆၅၀,၀၀၀ နှင့် ဆက်စပ်ပစ္စည်းများ သိမ်းဆည်းရမိကာ ဥပဒေနှင့်အညီ အရေးယူခြင်းနှင့် ပြန်လည်ပြုပြင်ရေး၊ အသိပညာပေးလုပ်ငန်းများ ဆက်လက်ဆောင်ရွက်သွားမည်ဖြစ်သည်။

တအာင်းပြည်၊ နမ့်ဆန်မြို့နယ်တွင် TLEC မှ ၂၀၂၆-၂၀၂၇ ပညာသင်နှစ်အတွက် စွမ်းရည်အခြေပြုသင်ရိုးညွှန်းတမ်း၊ ကိုယ်ပိုင်စစ်ဆေးအကဲဖြတ်ခြင်းစနစ်နှင့် Teacher Manual၊ Education Policy ဆိုင်ရာများကို သက်ဆိုင်သူများအား တွေ့ဆုံရှင်းလင်းဆွေးနွေးခဲ့ပြီး ကျောင်းသား/သူများ၏ သင်ယူမှုအရည်အသွေးမြှင့်တင်ရေးနှင့် ပညာရေးလုပ်ငန်းစဉ်တွင် သက်ဆိုင်သူများ၏ ပူးပေါင်းပါဝင်မှုအားကောင်းစေရန် ရည်ရွယ်ခဲ့သည်။

နမ့်ခမ်းမြို့တွင် ဆေးဝါးရောင်းချမှုများ စနစ်တကျရှိစေရန်နှင့် ပြည်သူများ ဘေးကင်းစိတ်ချရသော ဆေးဝါးများ ဝယ်ယူသုံးစွဲနိုင်စေရန် ရည်ရွယ်၍ အစားအသောက်နှင့် ဆေးဝါးကြီးကြပ်ရေးကော်မတီမှ စက်တင်ဘာလ (၁၅) ရက်နေ့တွင် ဆေးဆိုင်များအား ကွင်းဆင်းစစ်ဆေးခဲ့ပြီး စပ်ဆေးနှင့် သက်တမ်းလွန်ဆေးဝါးများ ရောင်းချမှုမရှိစေရေးအတွက် လိုအပ်သည့် စီမံဆောင်ရွက်မှုများ ပြုလုပ်ခဲ့သည်။