ကုင်တအာင်း၊ ခေဲင်ကျံရ်ဖံန်နီန်၊ အိူင်အေဲမ်ခြီရ် ကာည်း အိူင်အိုမ်ယ်ုရ် ဖုင်ပလိက်ကုင်တအာင်းဂဲ ဘိူန်းတိုကညားကဲကဇိူရ်ႈကယံင်းခံင်ယိူည်ႇ ကောန်အီမာည်း(4)အီး၊ ကောန်အီပ်ုန်(1)အီး ကာည်း ကညားအီဒါခံင်ယိူည်ႇ(16)အီး ခေဲင်လှံင်။

ကုင်တအာင်း၊ လှံင်အိုမ်ယ်ုရ်၊ လှံင်မိူင်လိုင် ကာည်း လှံင်မာဝ်းႎံင်း ခေဲင်ကျံရ်ဖံန်ရဘံန်းဆူတ် ဖုင်ပလိက်လှံင်ကုင်တအာင်း ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇအီမာည်း(2)အီး ကာည်း တိုအီးဒါခံင်ယိူည်ႇခံင်ယိူည်ႇ(8)အီး။

ကခံပ်ကယည်ပ္လေါည်ဒီန် တာမ်အီအွံရ်(1) ကောင်ဆံရ်ကုင်တအာင်း ဒီဒီမိုခံမ်၊ အီမိုႈ နာယက ဖုင်ရေဲန်ယံင်းမျံမ်တအာင်း တားအံင်ဇီး၊ အီအွံရ် တားအံင်နာည်ဝူန်း၊ ကညာအီရေဲန်မျံမ်ဂဲ၊ ကညာအီရေဲန်ဘြောင်ရိူန်းခြီရ်ဂဲ၊ အီရံပ်ဇီုင်းကပ္လိူင်တီုင်ဌာနဂဲ ကာည်း ကူန်ရဝ်မာဂါင်ဂဲ ကစုကပိုမ်ဂေါည်(200)လှိူဝ်း ဟိုက်‌ရောတ်ဒေဲႈ။

အီဘိူန်းဒေဲႈဇီုဝ်ဒါင်းခနားခြိူဝ်းမျိုးတအာင်း ကညာအီကိက်ဆချံင် “ဆငည်းဟိုက်ဇိုက်ဇား” တာဆြာတားမျာတ်ထူန်း အဆာက်(77)ဆန်ုမ် ယိူဝ်းတငါဝ်းတဘဝ်ရမာဂဲက္လာင်းဒါႈ ခည်မိုႈ ကျံရ်ဖံန် ဆငည်း(18) အခိင်ရမှိူဝ်(9:45)မိနေတ်ဒိူန် တောပ်လိူည်ဘာည်းမိုႈ ရောဂါတိုအီးဒါင်း အ်ုန်ခ္လါည်းဇာတ်လေႈဟာဝ်းဒေင်ဒိုင်း ပဂေါည်ဂါင်ဂဲ ရဝ်ခေးနီင်း လှံင်လာဆေဝ်အောႏ။

ကောင်ဆံရ်တီုင်ခေါခါႇကုင်တအာင်း (THC)ဂဲ ဆာ်ႈဟိုရ်ပ္လူႈဆဒိ တကူန်ရဝ်မာဂါင်ဂဲ အီဂေါည်ခေဲင်ကုင်တအာင်း ကာည်း ကဒါႇရဝ်မာ် တိုဆံက်ပ်ုန်ဟျံင်တဂါင် ဆာ်ႈမိုႈ အျံင်၊ လေ့၊ တိုဆံတ်တောန်နဲ ဆာ်ယံမ်းဂီုန်း၊ ဆာ်ႈယံမ်းကစုမာ် တိုန်းဆဒါင်ချာ်န်းချာ်န်း တဂါင်ခေါခါႇ အီဒံတ်တရဝ်ဂါင်။

ကုင်တအာင်း၊ အိူင်အိုမ်ယ်ုရ်၊ ပလှံင်အိုမ်ယ်ုရ် ခေဲင်ဆန်ုမ်2025 ပရဝ်အူရဝ်ဒီန် ပဲန်ဟာဝ်း ကောန်အီမာည်း(1)အီး လူည်ႇအမှုဇံန်တေဲင်ကောန်အီပ်ုန် အဆာက်ညှံမ်နိုက် ဖုင်ပလိက်ကုင်တအာင်းဂဲတိုည်းထိင်ခြဲဟာဝ်းအူန်း ကညားအီလူည်ႇအမှုငံန်တေဲင် ကောန်အီပ်ုန်။

ကောင်ဆံရ်ခေါခါႇကုင်တအာင်း (Ta'angland Health Council THC)ဂဲ ဆာ်ႈဟိုရ်ပ္လူႈဆဒိ တကူန်ရဝ်မာဂါင်ဂဲ အီဂေါည်ခေဲင်ကုင်တအာင်း ဘည်လိုအူန်းမိူဝ်ႈဆဒိ အန္တရာယ်အီဆမားလ ဒေင်ခြီတ်ဖိူမ် ဒဲႈအန္တရာယ်ဒါင်းဒါင်း ရောတ်စာ်မ်းတတိုပိုင်းအဆာက် ကာည်း ဇူႈတနှာည် ဆမားကတံက်ပဲန်ရောဂါ ဖိူမ်ဖ်ုမ် ပ်ုန်ဒါႈႎါႇရာဟာန်တာဗိုင်းရပ်စ် ဘည်ပဲန်ဒေဲႈတေဲင်ကံမ်ဖာ ကာည်း ကုင်အီဟံရ် ကဇေန်နီး။

ဘံန်ဟောည်ဒေဲႈ ကျံရ်ဖိုန် ဆငည်း(24)ဒိူန် အခိင်ဖုင်ပလိက်လှံင်ဂဲ ရေဲန်ဇီုင်းကာန် တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးကဇိူရ်ႈကယံင်း ယာယေနု အဆာက်(56)ဆန်ုမ် ကာည်း တာအံင်ခဲင် အဆာက်(29)ဆန်ုမ် ကဂေါပ်တောပ် ကအာင်ဆနံမ်ဂိူဝ်ႈ(590)ကအာင်၊ ဖိင်လူည်းဟံပ်ခေဲင်က္လောက်ဆပ်ပျာ (1)က္လောက်။

ဘည်မိုႈဘာည်းဘည်အ်ုန် အခိင် ခီညှာ(10:00)နြီထာန်နီး မာည်းအိုက်မောက် ဘိူန်းအဆာက်(18)ဆန်ုမ် ကာည်း မာည်းအိုက်လဝ ဘိူန်းအဆာက်(22)ဆန်ုမ် ဂါရ်အာရ်အီးဒီန် တိူဝ်ႈဒိူန်ပ္လေဘျုင်(80 မမ)ခေဲင်ဂါင် ဘ်ုန်ဂါရ်ကာမ် ပ္လေဘျုင်ဒီန်စီပဒူႈလံက်ဟာဝ်းဂါရ်ယံမ်းဟာဝ်းပွံတ် ဒီပဲန်အမှုကဆီုဝ်ဒီန်အောႏ။