ပလှံင်အိုမ်ယ်ုရ် ရေဲန်ဟောည်ႇဟာဝ်း ဆငည်းမျံမ်ပါ်ကံမ်ဖာ လိူဝ်ႈ(1) ကနာည်ပဇာရ်ငေါႈခံန်မျံမ် ခေဲင်အရာပ်အရာတအာင်း
23 May 2026
ပလှံင်အိုမ်ယ်ုရ် ရေဲန်ဟောည်ႇဟာဝ်း ဆငည်းမျံမ်ပါ်ကံမ်ဖာ လိူဝ်ႈ(1) ကနာည်ပဇာရ်ငေါႈခံန်မျံမ် ခေဲင်အရာပ်အရာတအာင်း
အိုမ်ယ်ုရ်၊ ကျံရ်ဖံန် ဆငည်း(23)
ဆဒါင်ကုင်တအာင်း
ဖုင်ရေဲန်ယံင်းမျံမ်တအာင်းဂဲ ဆာ်ႈအွံရ် ရေဲန်ဟာဝ်းပ္လေါည်ဆငည်းမျံမ်ပါ်ကံမ်ဖာ (International Tea Day) လိူဝ်ႈ(1) ခည်မိုႈ ကျံရ်ဖံန် ဆငည်း(21)ဒိူန် ပလှံင်အိုမ်ယ်ုရ်၊ အိူင်အိုမ်ယ်ုရ်၊ ခေဲင်ကုင်တအာင်း။
ကခံပ်ကယည်ပ္လေါည်ဒီန် တာမ်အီအွံရ်(1) ကောင်ဆံရ်ကုင်တအာင်း ဒီဒီမိုခံမ်၊ အီမိုႈ နာယက ဖုင်ရေဲန်ယံင်းမျံမ်တအာင်း တားအံင်ဇီး၊ အီအွံရ် တားအံင်နာည်ဝူန်း၊ ကညာအီရေဲန်မျံမ်ဂဲ၊ ကညာအီရေဲန်ဘြောင်ရိူန်းခြီရ်ဂဲ၊ အီရံပ်ဇီုင်းကပ္လိူင်တီုင်ဌာနဂဲ ကာည်း ကူန်ရဝ်မာဂါင်ဂဲ ကစုကပိုမ်ဂေါည်(200)လှိူဝ်း ဟိုက်ရောတ်ဒေဲႈ။
အီရံပ်ဇီုင်းကပ္လိူင်ဂဲ က္လာင်းဒါႈ ပ်ုန်ကယေင် ဘယ်ရေဲန်ဟာဝ်းဆငည်းမျံမ်ပါ်ကံမ်ဖာ လိူဝ်ႈ(1) ပလှံင်အိုမ်ယ်ုရ်နီန်မိုႈ ဘည်ထုက်လေႈကူမ် ခေဲင်အရာပ်အရာတအာင်း မောကံပ်ဘိူန်းငေါႈခံန်မျံမ် ကာည်း မောကံပ်ဘယ်ပဇာရ်ထုက်လေႈ ငေါႈခံန်မျံမ်မှယ်နီန်။
ဖုင်ရေဲန်ယံင်းမျံမ်တအာင်း နာယက တားအံင်ဇီး က္လာင်းဒါႈ “ ဇီုင်းကာန်မျံမ်နီန် မိုႈသယံဇာတအူလှေ ဒါင်းဒါင်းအ်ုန်မိုႈဒီကဒံတ် ထုင်မှိူမ်၊ ရိုးရာဓလေ့ ကာည်း ဇီုင်းကာန်ဟျံင်တိုပိုင်း ခြိူဝ်းမျိုးတအာင်း။ ဘည်ကယေင်ရေဲန်ဟာဝ်း ဆငည်းမျံမ်ပါ်ကံမ်ဖာ လိူဝ်ႈ(1) ပလှံင်အိုမ်ယ်ုရ်နီန်မိုႈ မောကံပ်ဘယ်ပဇာရ်ငေါႈခံန်မျံမ် ခေဲင်အရာပ်အရာ ကာည်း နှာင်းဘယ်ကတာရ်ႈဟာဝ်း ခေဲင်ကုင်ကပိုမ်မျံမ်မာ ကာည်း ကုင်အီဟံရ်”အောႏ။
ကခံပ်ကယည်ဆငည်းမျံမ်ပါ်ကံမ်ဖာနီန် နာယက တားအံင်ဇီး ကဘ္လာင်းဟာဝ်း ဘည်မိုႈ ဆမဴင်ဆငည်းမျံမ်ပါ်ကံမ်ဖာ ကာည်း ဘည်မိုႈဘည်ဘာည်း ထုင်ရိုဘိုဇေန်မျံမ်၊ ႎါည်ဒီန် ဖုင်အီအွံရ် တားအံင်နာည်ဝူန်း ကမိုန်က္လာင်းဟာဝ်း ဘည်မိုႈဘည်ဘာည်း တီႇဆ်ုမ်ထုက်လေႈမျံမ် ခေဲင်အရာပ်အရာတအာင်း၊ ဘည်လိုပဇာရ်အိုမ်ဇံန် ကာည်း ဘည်လိုပဇာရ်ငေါႈခံန်မျံမ် ခေဲင်ကုင်မျံမ်မာကာည်း ကုင်အီဟံရ်။
ဆဲႈဒီန် ရေဲန်ဟာဝ်းပ္လေါည်ကခံပ်ကယည်ကခေ့ကတား မျံမ်အီမ်း၊ က္လာင်ခါင်မျံမ် ကာည်း Green Teaကဲနီန်၊ အီမိုႈကညာပိင်ငျာဆျှီန်ဂဲ ပဲန်ဒဲင်ပ္လ ချဒဲႈဟာဝ်းဆု။
ခေဲင်ကခံပ်ကယည်ပ္လေါည်နီန် တာရ်ႈနှဲဟာဝ်း မျံမ်ခေါႈ မျံမ်ပ်ုန်ထုက်လေႈကုမ္ပဏီဂဲ ခေဲင်အရာပ်အရာတအာင်း၊ Green Tea၊ Red Tea၊ မျံမ်ခေါႈငါမ်၊ မျံမ်အီမ်း၊ မျံမ်လု ကာည်း ညောတ်မျံမ် ပ်ုန်ထုက်လေႈခေဲင်အရာပ်အရာတောန်နဲ၊ အီပေါရောတ်ဒေဲႈ ကူန်ရဝ်မာဂါင်ဂဲမာ် တျံင်တခေါရ်ဟာဝ်းတိူရ်ႈ ဘည်မိုႈအိုမ်ဇံန်မျံမ် ကာည်း ပျြံင်အိုမ်မျံမ် ပ်ုန်ထုက်လေႈ ခေဲင်အရာပ်အရာတအာင်း။
ဆငည်းမျံမ်ပါ်ကံမ်ဖာနီန် တောန်ဆန်ုမ် ရေဲန်ဟာဝ်း ကျံရ်ဖံန် ဆငည်း(21) ဘည်ကယေင် ရေဲန်ဟာဝ်း တေဲင်ကုင်ကံမ်ဖာနီန်မိုႈ အခါန်းကဏ္ဍ ဘည်ရေဲန်ထုက်လေႈမျံမ်ဂဲ၊ ဘည်အရေးဒါင်းဇီုင်းကာန်မျံမ် ကနာည်ဘြောင်ရိူန်းခြီရ် ကာည်း မောအီးကံပ်တိူဝ်ႈကနေဲႈမှယ်ဒေဲႈ ထုင်ရိုဘိုဇေန်မျံမ်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists