ကညာအီကိက်ဆချံင် “ဆငည်းဟိုက်ဇိုက်ဇား” တာဆြာတားမျာတ်ထူန်း ခ္လါည်းဇာတ်လေႈဒေင်ဒိုင်း
20 May 2026
ကညာအီကိက်ဆချံင် “ဆငည်းဟိုက်ဇိုက်ဇား” တာဆြာတားမျာတ်ထူန်း ခ္လါည်းဇာတ်လေႈဒေင်ဒိုင်း
အိုမ်ယ်ုရ်၊ ကျံရ်ဖံန် ဆငည်း(20)
ဆဒါင်ကုင်တအာင်း
အီဘိူန်းဒေဲႈဇီုဝ်ဒါင်းခနားခြိူဝ်းမျိုးတအာင်း ကညာအီကိက်ဆချံင် “ဆငည်းဟိုက်ဇိုက်ဇား” တာဆြာတားမျာတ်ထူန်း အဆာက်(77)ဆန်ုမ် ယိူဝ်းတငါဝ်းတဘဝ်ရမာဂဲက္လာင်းဒါႈ ခည်မိုႈ ကျံရ်ဖံန် ဆငည်း(18) အခိင်ရမှိူဝ်(9:45)မိနေတ်ဒိူန် တောပ်လိူည်ဘာည်းမိုႈ ရောဂါတိုအီးဒါင်း အ်ုန်ခ္လါည်းဇာတ်လေႈဟာဝ်းဒေင်ဒိုင်း ပဂေါည်ဂါင်ဂဲ ရဝ်ခေးနီင်း လှံင်လာဆေဝ်အောႏ။
ကညာအီကိက်ဆချံင် တာဆြာတားမျာတ်ထူန်းနီန် အ်ုန်မိုႈအီကိက်ဒေဲႈဆချံင် “ဆငည်းဟိုက်ဇိုက်ဇား” ဆာ်ႈဟိုရ်နောႈဖိူမ် ဒဲႈခြိူဝ်းမျိုးတအာင်းအယ်ပါ်ဒိုႇဒိုည်ႇ ကဖြောမ်ကရောမ်ဒေဲႈ၊ ဆချံင်ပုက်လှေနီန် အ်ုန်ဒဲႈအီးနံပ်ဂီုန်းဘိူန်းဒေဲႈဇီုဝ်ဒါင်း ရောတ်ကဇေန်နီးမာ် အ်ုန်မိူဝ်ႈဇီုဝ်အူန်း ခေဲင်နောႈဖိူမ် ခြိူဝ်းမျိုးတအာင်းအယ်ပါ်ဒိုႇဒိုည်ႇ။ ဆချံင်နီန် မိုႈပ်ုန်ဒါႈ ခြိူဝ်းမျိုးတအာင်းအယ်တဆေ အခိင်ရေဲန်ပါင်ပျောပါင်တခိူည်း ကာည်း ကခံပ်ကယည် ပါင်ကမိုန်ကဲနီန်အောႏ။
ဆဲႈဒါႇဒီန် တာဆြာတားမျာတ်ထူန်းနီန် အီနံပ်ဒေဲႈဂီုန်း ဂေါႇအ်ုန်မိူဝ်ႈနောႈ ခါမ်စာအနုပိင်ငျာ တေဲင်ဂီတ၊ မိူဝ်ႈဟံမ်းပေန် ကာည်း ဘည်ဆမားကြောႈက္လာင်း တေဲင်ကူန်ရဝ်မာဂါင် အီဒဲႈရဲင်ဒဲႈဘ္လောမ်ဂဲ အာည်ႇခ္လါည်းဟာဝ်းဇာတ် အ်ုန်ရံပ်ဇီုင်းကပ္လိူင် နာယက ဖုင်ဘေဲႇဘာန်း ကာည်း ထုင်မှိူမ်တအာင်း ပလှံင်လာဆေဝ်။ ဆဲႈဒါႇဒီန် ကဆီုဝ်ယဲ တိူဝ်ႈကနေဲႈရနောအူန်း ဘည်ဟံပ်ရဲင် ဟံပ်ဘ္လောမ်ရေဲန်ဒေဲႈဇီုင်းကာန် ကနာည်ခြိူဝ်းမျိုးတအာင်း ဇိုချီုင်ဇိုဇာတ်ဂေါည်အ်ုန်။
အီခ္လါည်းဇာတ်လေႈဟာဝ်းဒေင်ဒိုင်း တာဆြာတားမျာတ်ထူန်းနီန် ယိူဝ်းတငါဝ်းတဘဝ်ရမာအ်ုန်ဂဲဒါႈ ဘံန်မိုႈ ကျံရ်ဖံန် ဆငည်း(22)ဒိူန် နံင်ရေဲန်ဟာဝ်းပ္လေါည်ကခံပ်ကယည်စျာပနအ်ုန်အောႏ။
ကညာအီကိက်ဆချံင် တာဆြာတားမျာတ်ထူန်း ဘိူည်ခ္လါည်းဟာဝ်းဇာတ်မာ် ပ်ုန်ကိက်ပ္လေႈအူန်းအ်ုန် ဆချံင် “ဆငည်းဟိုက်ဇိုက်ဇား” နီန် အ်ုန်ကီုတ်ပဲန်အူန်း ပ်ုန်ကအာ်မ်းထုင်ရိုဘိုဇေန် ကနာည်လောကဂီတတအာင်း နံင်ဆီုပ်မိူဝ်ႈဟာဝ်းအူန်း ခေဲင်နောႈဖိူမ် ခြိူဝ်းမျိုးတအာင်းပါ်ဒိုႇဒိုည်ႇ။ ဆဲႈဒါႇဒီန် ဘည်ကဆီုဝ် တံပ်အွံရ်ပ်ုန်လောတ်ကပီုန်တအာင်း-PSLF/TNLA မာ် ပ္လိူရ်ႈနှဲဒါႈ ပဲန်အူန်းနောႈခေဲမ့် ဒါင်းဒါင်းတောပ် အီကီုတ်အူန်းဘဝ်ရမာအ်ုန်ဂဲအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists