ပကုင်တအာင်း ခေဲင်အူနှာ ဖုင်ပလိက်လှံင်ကုင်တအာင်းဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ အီမာည်း(2)ကာည်း တိုအီးဒါခံင်ယိူည်ႇ(8)အီး
05 June 2026
ပကုင်တအာင်း ခေဲင်အူနှာ ဖုင်ပလိက်လှံင်ကုင်တအာင်းဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ အီမာည်း(2)ကာည်း တိုအီးဒါခံင်ယိူည်ႇ(8)အီး
အိုမ်ယ်ုရ်၊ ကျံရ်တောရ် ဆငည်း(5)
ဆဒါင်ကုင်တအာင်း
ကုင်တအာင်း၊ လှံင်အိုမ်ယ်ုရ်၊ လှံင်မိူင်လိုင် ကာည်း လှံင်မာဝ်းႎံင်း ခေဲင်ကျံရ်ဖံန်ရဘံန်းဆူတ် ဖုင်ပလိက်လှံင်ကုင်တအာင်း ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇအီမာည်း(2)အီး ကာည်း တိုအီးဒါခံင်ယိူည်ႇခံင်ယိူည်ႇ(8)အီး။
ပလှံင်အိုမ်ယ်ုရ် ဘံန်ဟောည်ႇဒေဲႈ ခေဲင်ကျံရ်ဖံန်ရဘံန်းဆူတ် အခိင်ဖုင်ပလိက်လှံင်ကုင်တအာင်း ရေဲန်ဇီုင်းကာန်တီုက်ယာႈအရေးခံင်ယိူည်ႇ ခေဲင်ရဝ်ဘိူန်းတိုည်း တိုအီးဒါခံင်ယိူည်ႇ တာဆော်လူန် အဆာက်(43)ဆန်ုမ် ၊ တာတာန်းဖေ အဆာက်(54)ဆန်ုမ်၊ တာနေထူန်း အဆာက်(54)ဆန်ုမ်၊ တာမံင်တာန်း အဆာက်(36)ဆန်ုမ်၊ မံင်ဟေင်မီန်း အဆာက်(20)ဆန်ုမ် ကာည်း တိုအီးဒါခံင်ယိူည်ႇ တာနဲင်မီန်း အဆာက်(54)ဆန်ုမ် ကဂေါပ်တောပ် ဖိင်လူည်းဂေါည်(0.3)ဂရမ် ကာည်း ကအာင်ဆနံမ်းဂိူဝ်ႈ(13)ကအာင်။
မိုႈဘိုး ပရဝ်ပါင်ခါ၊ လှံင်မိူင်လိုင် ဂေါႇမိုႈယိူဝ်းတငါဝ်းဆဒါင်ဒါႈမိူဝ်ႈ အီကဇိူရ်ႈကယံင်းခံင်ယိူည်ႇ ဖုင်ပလိက်လှံင်ဂဲ စီဟာဝ်းစေတ်ဆေး ဘိူန်းတိုည်း တာအတာန်း အဆာက်(49)ဆန်ုမ် ကဂေါပ်တောပ် ကအာင်ဆနံမ်းဂိူဝ်ႈ(11)ထူပ်။ ဒါႇခူဒီန် ဘိူန်းတိုည်းဘိုး တိုအီးဒါခံင်ယိူည်ႇ ဆာည်းစော်ဆာ အဆာက်(20)ဆန်ုမ် ကာည်း အဆာည်း အဆာက်(20)ဆန်ုမ်။
ဆဲႈဒါႇဒီန် ဘံန်ဟောည်ႇဒေဲႈ ကျံရ်ဖံန် ဆငည်း(31)ဒိူန်မာ် အခိင်ဖုင်ပလိက်လှံင်ကုင်တအာင်း ရေဲန်ဇီုင်းကာန်စေတ်ဆေး ပရဝ်ဟူကွံတ်၊ ပလှံင်မာဝ်းႎံင်း ဘိူန်းတိုည်းတိုအီးဒါခံင်ယိူည်ႇ ကဝ်အီဇီုဝ် တာအံင်မျာတ် အဆာက်(26)ဆန်ုမ် ။
ပ်ုန်ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇကဲဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA နှာင်းဆီုပ်တိူဝ်ႈလာည်းဟာဝ်းအရေး တောပ်လိူည်ဘည်ဥပဒေ တီုက်ယာႈအရေးခံင်ယိူည်ႇ၊ ဆာ်မိုႈ တိုအီးဒါကဲဒီန် စီနံင်တိုန်းဟာဝ်းကဲဘြဲဆားအကျံင် ပဂါင်ဆငါး။
ဘည်ကဆီုဝ် တံပ်အွံရ်ပ်ုန်လောတ်ကပီုန်တအာင်း-PSLF/TNLA ရေဲန်ဟာဝ်းဇီုင်းကာန် တီုက်ယာႈအရေးခံင်ယိူည်ႇနီန်ဒါင်းဒါင်း။ ဆဲႈဒါႇဒီန် ဆီုပ်ရေဲန်ဟာဝ်း မောကံပ်တိုအီး ဒါခံင်ယိူည်ႇကဲနီန် ကာည်း တိုအီးကဇိူရ်ႈကယံင်းခံင်ယိူည်ႇဟြာည်ကမာ်ႈ၊ မောကံပ်ဘယ်ထိင်ခြဲဒဲႈ ဘံန်နံင်ဒေဲႈ ကောန်ဒဲႇဂဲ ကာည်း မောကံပ်ဘယ်လံပ်ဘ္လီုက်လှူပ်တြားဥပဒေ၊ မောကံပ်ပဇာရ်ဒဲႈ လံပ်ကတ်ုမ်တိုအီးအယ် ဂေါည်ယေန်ငံင်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists