ပ္လေါည်ပ္လိုတ်ႎါင်ပနောနီန် ဖုင်ဘေဲႇတအာင်း-TLAဂဲ ဆာ်ႈအွံရ်ဟောည်ႇ‌ရေဲန်ဟာဝ်း ပရဝ်ပါင်လဲင် ခည်မိုႈ ကျံရ်အာရ် ဆငည်း(2)ဒိူန်။ ႎါင်ပနောဒီန် အီဟိုက်မိုႈ စဝ်ဆာင်ခါ(1)ပါး၊ ကောန်အီမာည်း(13)အီး ကာည်း ကောန်အီပ်ုန်(34) ကစုကပိုမ်ဂေါည်(48)အီး ဟိုက်ဒေဲႈပနော။

ကနာည်ရိူန်းဒူး လံပ်ပိင်ငျာကုင်တအာင်း ကောင်ဆံရ်ဇီုင်းပိင်ငျာကုင်တအာင်း-TLEC ဂဲ ဆာ်ႈအွံရ်ႎိူဝ်ႈဟာဝ်း ထီတအာင်း လိူဝ်ႈ(32)နီန် ခည်မိုႈ ကျံရ်အာရ် ဆငည်း(1) အခိင်ခီညှာဒိူန် ပလှံင်အိုမ်ယ်ုရ်၊ ခေဲင်ကုင်တအာင်း။

ဖုင်ခေါႇခါႇကောင်ဆံရ်ကုင်တအာင်း (THC) ဆာ်ႈဟိုရ်ပ္လူႈဆဒိ ကနာည်နံင်ပ္လါန်ဘေဲႇဒါကြောႈ တအီနံင်ဟိုက်ကျောင် ငိူပ်မေန်းခေါခါႇ ကာည်း ကျောင်ကောလေတ်သိပ္ပံခေါႇခါႇ(CNHS)၊ ADN Program (Batch-2) လိူဝ်ႈ (2) ပ္လူႈဆဒိတဂဲ ဒေဲႈပ္လါန်ဘေဲႇ ဘံန်မိုႈကျံရ်အာရ် ဆငည်း(2)နီန်အောႏ။

ပ္လေါည်နီး ဘံန်ဟောည်ႇဒေဲႈ ကျံရ်အူ၊ ဆငည်း23 အခိင်(9:00) ဇူႈရေဲန်ဟာဝ်း ခေဲင်ပ္လေါည်လံပ်ပိင်ငျာ ကာည်း ပ္လေါည်ဒဲဆုနီး တံပ်အွံရ်ပ်ုန်လောတ်ကပီုန်တအာင်း PSLF/TNLA တားတီုင်အွံရ်ဆီုက် တားဟိူဝ်ပ္လါင်၊ အီရံပ်ဇီုင်းကပ္လိူင်-TLEC၊ အီရံပ်ဇီုင်းကပ္လိူင်ခေဲင်တီုင်ဌာန ကာည်း တားဘြောင်ရဝ်ဂဲ တံမ်းဟာဝ်းကြောႈက္လာင်း ကစုကပိုမ် တိုအီးဂေါည် (100)အီးဟိုက်ရောက်အောႏ။

ဘည်မိုႈအ်ုန် ကျံရ်အူ ဆငည်း(22)အမှိူဝ်ဒိူန် အခိင်ရဆံန်(2:50)မိနေတ် ပကျောင်အံက် စဝ်ဝိဇာရပရိယတ္တိ ႎံရ်ငံရ်ဝါယာပဲန်ဆျှော ပဲန်ငံရ်က္လိုႇဟာဝ်းကျောင်အူကျောင်။