ကုင်တအာင်း၊ လှံင်အိုမ်ယ်ုရ်၊ ခမိုကျောက်ဖြူဒါင်း ရဝ်ကျောက်ဖြူ၊ ရဝ်ကျောက်ခေါင်း၊ ပ္လေါင်ဘြာန်၊ ရဝ်ဆိုရ်အိုည်ကိူရ်ဂဲ ကစုကပိုမ်ရဲင်ဘ္လောမ်ဒေ လှံင်အိုမ်ယ်ုရ်၊ ဇံင်မာန်မိုင် ကာည်း ရဝ်ဆိုရ်အိုည်ကိူရ် ကူန်ရဝ်မာဂါင်ဂဲ ကစုကပိုမ်ရဲင်ဘ္လောမ်ဒေ ဘြဲဆာဒေင်ကောန်ကရီတ် ဒီလူလှဲဝ်ႈ ႎီရ်ပျိူဝ်ႇရာင်ဒေ။
ဒီရ်;ကဇေန်နီး
ကုင်တအာင်း၊ အိူင်အေဲမ်ခြီရ်၊ လှံင်အေဲမ်ခြီရ်၊ ပရဝ်မာန်အော်င် အခိင်ဖုင်ကောန်တဘိုက်ရဝ်ဂဲ ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါ အီမာည်း(4)အီး ဟောည်ႇအာပ်ဒဲႈဟာဝ်း တဖုင်ပလိက်လှံင်အေဲမ်ခြီရ်။
တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ကာ်မ်မတီတီုက်ယာႈအရေးခံင်ယိူည်ႇ ကာည်း ကူန်ရဝ်မာဂါင်ဂဲ ရေဲန်ပါင်ကတူႈကငျား ဘည်ကဆီုဝ်ကဆဲင် ဇီုင်းကာန်တီုက်ယာႈအရေးခံင်ယိူည်ႇ ပလှံင်အိုမ်ယ်ုရ်၊ လှံင်အေဲမ်ခြီရ် ကာည်း လှံင်အိုမ်ငျံရ်၊ ခေဲင်ကုင်တအာင်း။
ကုင်တအာင်း၊ အိူင်အေဲမ်ခြီရ်၊ လှံင်အေဲမ်ခြီရ်၊ ပရဝ်ကောင် ဘံန်ဟောည်ႇဒေဲႈ ကျံရ်ဖံန် ဆငည်း(30)ဒိူန် ဂေါႇဘည်ပဲန်ယာမ်ဇ်ုမ်ႏငျားဒေကလူည်ႇပဒူႈ ကူန်ရဝ်မာဂါင်ဂဲ အီကတူႈလံက်ချှူမ်ဟာဝ်း ကနာည်နံင်ဘယ်ႎီရ်ပျိူဝ်ႇယိူဝ်ႇ ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇ ရဝ်ကောင်တံပ်ဂဲ ဟံပ်ရဲင်ဟံပ်ဘ္လောမ်ရီန်းရဲတ်ရေဲန်ဒဲႈဟာဝ်း ပ်ုန်လိုကဇောည်ထာ့်ဒဲႈ ကာည်း ရေဲန်ဒဲႈဟာဝ်း ဇီုင်းကာန်ႎီရ်ပျိူဝ်ႇယိူဝ်ႇ ဘည်ကတူႈချှူမ်ချှံန်မှောချှံန်အ်ုန် ဘည်ကဇေန်နီး ရေဲန်ဟောည်ႇဟာဝ်း ဇီုင်းကာန်ကဇောည်ထာ့်ဒဲႈ ချှံန်ရဘံန်းဆူတ်ဆူတ်အောႏ။
ဘည်မိုႈဘာည်းဘည်အ်ုန် ဘံန်ဟာည်ႇဒေဲႈ ကျံရ်တောရ်၊ ဆငည်း(29)၊ အခိင်စူမ်အံပ်(4:30)နြီ တာအံင်ကျော်အူး ဘိူန်းအဆာက်(29)ဆန်ုမ် စိုန်ဟာဝ်းကားဇံင်တောပ်ကဆော ပဂါင်ဒီဘြဲဆာကားဖြာဒါင်း ပလှံင်အိုမ်ယ်ုရ်၊ အ်ုန်စိုန်ကားလေႈဟာဝ်းပွံတ် ကဒါႇလှံင်ဆဘော။
လောင်ရေဲန်ပါင်ကတူႈကငျားဒီန် ဖုင်ရိူရ်ႈတီႇဆ်ုမ်မျံမ်ဂဲ ဘိူည်ရေဲန်ဟာဝ်းလောင်မျံမ်ပဲန်ငါည်ရာင်မာ် ဂေါႇမိုႈအီရေဲန်ဟောမ်မျံမ်ဂဲ တခေါရ်တောပ်ရေဲန်ဟာဝ်းမာ်အာဝ်မိူဝ်ႈ၊ ပ်ုန်ပ္လချအူန်းခေါပြာႇ အီကဆီုဝ်ကဆဲင်လောင်မျံမ်မာ် ကဲအာဝ်တောပ်။ ဂေါပ်ဘည်ဒီန် နှာင်းရဲင်ဘ္လောမ်အာဝ်လိုဒိုႇဂီန်း တောပ်ဟာဝ်းဒေင်နီပိင်ငျာ ရေဲန်ဟာဝ်းမျံမ်အောႏ။
ပ်ုန်ဒီရ်;ဂီုန်း
