ပရဝ်မာန်အော်င် အခိင်ဖုင်ကောန်တဘိုက်ရဝ်ဂဲ ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါ(4)အီး
10 July 2026
ပရဝ်မာန်အော်င် အခိင်ဖုင်ကောန်တဘိုက်ရဝ်ဂဲ ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါ(4)အီး
အိုမ်ယ်ုရ်၊ ကျံရ်ပူရ် ဆငည်း(10)
ဆဒါင်ကုင်တအာင်း
ကုင်တအာင်း၊ အိူင်အေဲမ်ခြီရ်၊ လှံင်အေဲမ်ခြီရ်၊ ပရဝ်မာန်အော်င် အခိင်ဖုင်ကောန်တဘိုက်ရဝ်ဂဲ ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါ အီမာည်း(4)အီး ဟောည်ႇအာပ်ဒဲႈဟာဝ်း တဖုင်ပလိက်လှံင်အေဲမ်ခြီရ်။
ဖုင်ကောန်တဘိုက်ရဝ်ဂဲ ဘံန်ဟောည်ႇဒေဲႈ ကျံရ်ပူရ် ဆငည်း(6)ဒိူန် အခိင်ဂဲရေဲန်ဇီုင်းကာန်စေတ်ဆေး အီကဆီုဝ်ကဆဲင်အရေးခံင်ယိူည်ႇခေဲင်ရဝ်ဒိူန် ဘိူန်းတိုည်းတာအံင်မို အဆာက်(52)ဆန်ုမ်၊ တာယည်တိုး အဆာက်(38)ဆန်ုမ်၊ တာတာန်းအူး အဆာက်(31)ဆန်ုမ် ကာည်း တာအနဲင် အဆာက်(48)ဆန်ုမ်။
တိုအီးဒါခံင်ယိူည်ႇကဲနီန် မိုႈကောန်တဘိုက်ရဝ်ဂဲ ဘိူန်းတိုည်းထိင်အူန်းဂဲ။ ႎါည်ဒီန် ဂဲဟြာင်းဟိုက်တဖုင်ပလိက်လှံင်အေဲမ်ခြီရ် အခိင်ဖုင်ပလိက်ဂဲ တိုည်းဟာဝ်းစေတ်ဆေးတိူရ်ႈကဲ(4)အီးနီန် ဘည်စေတ်ဆေးယိူဝ်းဒါႈကဲဒါအူန်းခံင်ယိူည်ႇ။
ဖုင်ပလိက်ကုင်တအာင်း လှံင်အေဲမ်ခြီရ် တိုည်းထိင်အူန်းဂဲ နံင်တိူဝ်ႈလာည်းဟာဝ်းအရေး တောပ်လိူည်ဘည်ဥပဒေ တီုက်ယာႈအရေးခံင်ယိူည်ႇ PSLF/TNLA နံင်တိုန်းဟာဝ်းကဲႎီရ်ဘြဲဆားအကျံင် ပဂါင်ဆငါး ကာည်း ရေဲန်ဟာဝ်းဇီုင်းကာန် ကခံပ်ကယည်ဘည်ဒဲႈလောင်ပိင်ငျာကဲနီန်။
ကဆီုဝ်တံပ်အွံရ်ပ်ုန်လောတ်ကပီုန်တအာင်း-PSLF/TNLA ရေဲန်ဟာဝ်းဇီုင်းကာန်တီုက်ယာႈအရေးခံင်ယိူည်ႇ ဒဲႈအ်ုန်မိုႈဇီုင်းဒါင်းအူလှေ ။ ဆဲႈဒီန် ရေဲန်ဒဲႈဟာဝ်း ဘည်တိုအီးဒါခံင်ယိူည်ႇ ကာည်း တိုအီးကဇိူရ်ႈကယံင်းခံင်ယိူည်ႇကဲနီန် မောကံပ်ဟြာည်ကမာ်ႈ၊ ရေဲန်ဇီုင်းကာန်မောကံပ်ဘယ်ထိင် ဘံန်နံင်ဒေဲႈ(အနာဂတ်) ကောန်တဘိုက်ဂဲ ကာည်း ဇီုင်းကာန်ဘ္လီုက်လှူပ်တြားဥပဒေ၊ ဆီုပ်ရေဲန်ဟာဝ်း မောကံပ်ဘယ်ပဇာရ်ဒဲႈ ဇိုဇာတ်တိုအီးအယ် မိူဝ်ႈလံပ်ကတ်ုမ် ဘိူန်းဂေါည်လံပ်ယေင်ငံင်။
မိုႈဘိုး ဘံန်ဟောည်ႇဒေဲႈ ကျံရ်တောရ် ဆငည်း(30)ဒိူန်မာ် လှံင်အေဲမ်ခြီရ်၊ ပရဝ်နံမ်မ အခိင်ဖုင်ပလိက်လှံင်ဂဲ ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးဒါခံင်ယိူည်ႇ အီမာည်း(5)အီးအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists