ဖုင်ပလိက်ကုင်တအာင်းဂဲ ဘိူန်းတိုည်း တိုအီးစိုန်ကား(Hijet-ဂျက်မော်) ပလှံင်အိုမ်ယ်ုရ်
04 July 2026
ဖုင်ပလိက်ကုင်တအာင်းဂဲ ဘိူန်းတိုည်း တိုအီးစိုန်ကား(Hijet-ဂျက်မော်) ပလှံင်အိုမ်ယ်ုရ်
အိုမ်ယ်ုရ်၊ ကျံရ်ပူရ်၊ ဆငည်း(4)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ ဖုင်ပလိက်ကုင်တအာင်းဂဲ ဘိူန်းတိုည်း တိုအီးစိုန်ကား(Hijet-ဂျက်မော်) ကဂေါပ်တောပ်ဆံက်ဆေ ပဂါင်ဒီဘြဲဆာကား ပလှံင်အိုမ်ယ်ုရ်။
ဘည်မိုႈဘာည်းဘည်အ်ုန် ဘံန်ဟာည်ႇဒေဲႈ ကျံရ်တောရ်၊ ဆငည်း(29)၊ အခိင်စူမ်အံပ်(4:30)နြီ တာအံင်ကျော်အူး ဘိူန်းအဆာက်(29)ဆန်ုမ် စိုန်ဟာဝ်းကားဇံင်တောပ်ကဆော ပဂါင်ဒီဘြဲဆာကားဖြာဒါင်း ပလှံင်အိုမ်ယ်ုရ်၊ အ်ုန်စိုန်ကားလေႈဟာဝ်းပွံတ် ကဒါႇလှံင်ဆဘော။
ဆဲႈဒီန် ကညားအီကတူႈစိုန်ကားဒီန် ဟာဝ်းတိုန်းဆဒါင် တဖုင်ပလိက်ကုင်တအာင်းဂဲ က္လာင်းဟာဝ်းဘည်မိုႈဘည်အ်ုန် နှဲတောပ်ဆံက်ဆေ။ ကဇေန်းနီး ဖုင်ပလိက်ကုင်တအာင်းဂဲ ဟောည်ႇဘိူန်းဒေတိုည်း ကညားအီစိုန်ကားဒီန်အောႏ။
တေဲင်စေတ်မေန်ယိူဝ်း ကညားအီစိုန်ဟာဝ်း ကား(Hijet-ဂျက်မော်)ဒီန် အ်ုန်လေႈယံင်းကဒါႇ လှံင်ဆဘော ရိူန်းဘြာန် ဆဲန်(230)ဘျာ။ ဘံန်ရောတ် ကျံရ်တောရ်၊ ဆငည်း(30) ဘိူန်းတိုည်းတောပ်ရိူန်း အခိင်အ်ုန် ယိူဝ်ႇကဒါႇလှံင်ဆဘော ႎီရ်ပလှံင်အိုမ်ယ်ုရ်။
ဆာ်မိုႈ ကောန်အီမာည်းဒီန် ဖုင်ပလိက်ကုင်တအာင်းဂဲ တိုည်းထိင်ခြဲအူန်း နှာင်းတိူဝ်ႈဟာဝ်းအရေး တောပ်ဘည်ဥပဒေအ်ုန်အောႏ။
မိုႈဘို ဘံန်ဟောည်ႇဒေဲႈ ဆန်ုမ်2025၊ ကျံရ်ကိူရ်အူ၊ ဆငည်း(16) ဖုင်ပလိက်ကုင်တအာင်းဂဲ ဘယ်တိူဝ်ႇလာည်အရေး တတိုအီစိုန်ဆဲင်ကယ် ကောန်အီမာည်း အာရ်အီး ပလှံင်မိူင်းလိုင်။
ကဆီုဝ်ကူန်ရဝ်မာဂါင်အယ်ဂဲမာ် ဆာ်အယ်ဇံင်အူန်းကားအယ် လိုတိူဝ်ႈအူန်းကဆော၊ ကနာည်ထိင်ခြဲ နှာင်းကံပ်အာဝ်မိူဝ်ႈတိုအီစိုန်ဂဲနီန် ကူန်ရဝ်မာဂါင်ဂဲ လိုကဖြောမ်ကရောမ်ရေဲန်ဟာဝ်းဇီုင်းကာန်။ ဆာ်ယိူဝ်းပ်ုန်ထံင်နောႈလိုတိုန်းဟိုက်ဆဒါင် ချာ်န်းချာ်န်း။
#PSLF/TNLA
#တီုင်ပ္လေႈလေႈဆဒါင်
Comment Lists