ကုင်တအာင်း၊ အိူင်အိုမ်ယ်ုရ်၊ ပလှံင်မိူင်လိုင်၊ အခိင်ဖုင်ပလိက်ကုင်တအာင်း ရေဲန်ဇီုင်းကာန်စေတ်ဆေး အရေးခံင်ယိူည်ႇ ဒီဒေင်ကကာႈပရဝ်ပါင်ခေါဒိူန် ကနာည်တိုအီးကဇိူရ်ႈကယံင်းခံင်ယိူည်ႇ ကာည်း တိုအီးဒါခံင်ယိူည်ႇ မောကံပ်ဟြာည်ကမာ်ႈ ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ(1)အီး ကာည်း တိုအီးဒါခံင်ယိူည်ႇ(2)အီး။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ကျံရ်ပူရ်၊ ဆငည်း(9) ပရဝ်ရဝ်ခ်ုရ် ပ်ုန်ကယေင် ဖုင်ရေဲန်ယံင်းမျံမ်တအာင်းဂဲ ရေဲန်ပါင်ကတူႈကငျား တောပ်ကညားအီ‌ရေဲန်ဇီုင်းကာန်မျံမ် လောင်ဇီုင်းကာန်မျံမ်ကတာႈဒါင်းဇာရ်ဒါႇခူနီန်၊ ကနာည်နှာင်းဘိူန်းငေါ်ႈခံန်ဒါင်း၊ ကနာည်နံင်ဘယ်ရိူရ်ႈလေႈမျံမ်ပေန်၊ ကမိုန်ဟာဝ်းလောင်ဇီုင်းကာန်မျံမ်တောန်နဲ။

ကုင်တအာင်း၊ အိူင်အိုမ်ယ်ုရ်၊ ပလှံင်မိူင်လိုင် ပ်ုန်ကယေင်မောကံပ် ကူန်ရဝ်မာဂါင်အယ်ဂဲ ႎီရ်ဘိူန်းဇိုဇာတ်ပြီမ်ဂဲ ပ်ုန်ဖုင်ပလိက်လှံင်ဂဲဘိူန်းတိုည်းထိင်အူန်း တိုအီးဒါခံင်ယိူည်ႇအီမာည်း(5)အီးကဲနီန် ဟောည်ႇႎီရ်ဘြဲဆားဒဲႈအကျံင်ဂဲ လှေင်(6)ကျံရ် ႎီရ်အာပ်ဒဲႈဟာဝ်း တရဟောမ်ရမာ။

တံပ်အွံရ်ပ်ုန်လောတ်ကပီုန်တအာင်း-PSLF/TNLA ကာည်း ကူန်ရဝ်မာဂါင်ဂဲ ကစုကပိုမ်ဒေ ရေဲန်ဟာဝ်းဆပဲဆငါး ခေဲင်ရဝ်ပါင်လိုင် ကာည်း ရဝ်မာန်လီ ဘဲဆြာဟာဝ်းဘိုဒေအ်ုန်လူလှဲဝ်ႏ ရဝ်မာဝ်လူည် ကာည်း ရဝ်ရဝ်ခ်ုရ် နှာင်းအိုမ်အာဝ်ဘိူန်းရောတ်ခေဲင်ဒေမာ် ကိူဝ်ႈဟာဝ်းအိုမ်ရောင် ကဲပ်ညျှိူဝ်၊ တံင်ဟေအီလာက်ရီမ်းဒေ။

တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ ဆီုပ်ရေဲန်ပါင်ကတူႈကငျားတောပ် ကူန်ရဝ်မာဂါင်ဂဲ အီကဆီုဝ်ကဆဲင်ဇီုင်းကာန်တီုက်ယာႈအရေးခံင်ယိူည်ႇ ပလှံင်မိူင်လိုင် ကာည်း လှံင်မိူင်ဘော် ခေဲင်ကုင်တအာင်း။