ကျံရ်အူကိူရ် ဆငည်းအဒိူဝ်နီး(16) အခိင်(7:30)နြီဒိူန် အာဝ်မိူဝ်ႈပဲန်ကတီုက်ကပဴင်မာ် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်ညောင်ကိုင်း(ဂိုရ်) လံက်လူလှဲဝ်ႏဟာဝ်း ပလိုင်းဒီဟျံင်အျံရ်အောႏ။

ဘံန်ဟောည်ႇဒေဲႈ ကျံရ်အူကိူရ်၊ ဆငည်း( 7 ) ဒိူန် အခိင် ဖုင်ပလိက်ကုင်တအာင်းဂဲ စေဲတ်မေန်း စီဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ တာစိုးသူရ ဘိူန်းအဆာက်( 34 )ဆန်ုမ်၊ ယာသူဆာဝူန်း ဘိူန်းအဆာက်( 33 )ဆန်ုမ်။ ဘိူန်းတိုည်းအဂေါပ်တောပ် ကအာင်ယာမ ( 21 ) ထူပ်၊ ကအာင်ဆနံမ်( 20 )ကအာင်၊ ဖိင်လူည်း ဟံပ်အူန်းခေဲင်တော်ကဘဲဝ်အိုမ်ငါမ်း ( 10 )တော်အောႏ။

ကျံရ်အူကိူရ် ဆငည်း(14) အခိင်ခီညှာ(7:30)နြီဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် (11)ပိုင်း လံက်ဟာဝ်း လိုည်းတီန်တီန်နောည် အဆာက်(16)ဆန်ုမ် ယံမ်းပွံတ်ကဆီုဝ်ဒီန်။

ကျံရ်အူကိူရ် ဆငည်း(12) အခိင်စူန်အံပ် (5:08)မိနေတ်ဒိူန် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် (250)(1)ပိုင်း ပရဝ်လယ်ဇီး။ မိုႈဘိုး အခိင်စူန်အံပ်(5:11)မိနေတ်ဒိူန် ဂဲရောတ်ဒေဲႈပဴင်ဘိုး ပ္လေဘျုင် ထာန်ဇံန်(250)(2)ပိုင်း ခေဲင်ရဝ်ပဆီး လံက်ဟာဝ်း ဂါင်ကူန်ရဝ်မာဂါင်ဂဲ(4)ဂါင်လူလှဲဝ်ႏ။

ကုင်တအာင်း၊ အိူင်မိုဂူႈ၊ လှံင်မိူင်လိုင် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဘိုးပ္လေဘျုင် ထာန်ဇံန်(250)(2)ပိုင်း ပရဝ်ကဒေါဆံင်း လံက်ဟာဝ်းဂါင်ဂေါည်(2)ဂါင် လူလှဲဝ်ႏ။

ကျံရ်အကိူရ် ဆငည်း(10) အခိင်ရဆံန်(1:30)နြီ ဆီုက်ဘြာန်ဇေဝ်ဂဲ ဒါပ္လေဘျုင် ထာန်ဇံန်(250)(2)ပိုင်းကာည်း ပ္လေဒါင်း(ရော့ကဒ်)(6)ပိုင်း ရောတ်ဒေဲႈပဴင်ဘိုး တပြောရဝ်အော်င်မျေ လှံင်မှိူမ်မီုတ်။

ကုင်တအာင်း၊ အိူင်မိုဂူႈ၊ လှံင်မှိူမ်မီုတ်၊ ကျံရ်အူကိူရ် ဆငည်း(9) အခိင်ခီမှိူဝ်(7)နြီထာန်နီး ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ပရဝ်ဝဲဘောင် လံက်ကူန်ရဝ်မာဂါင်ဂဲ(7)အီးယံမ်း ခေဲင်ဒီန်အ်ုန်တောပ်(2)အီး၊ ဒါႇခူဒီန် ကူန်ရဝ်မာဂါင်ဂဲ(8)အီး ကတူႈဟာဝ်းဖေးဘာတ်။

ကပီုက်နံမ်မာန်ဒီန် လီပ်တီုက်နာန်း1027 ဒေါန်အူဒိူန်မာ် အူလိူဝ်ႈ ဆီုက်ဘြာန်ဇေဝ်ဂဲ ဟောည်ႇပ်ုန်လူလှဲဝ်ႏ ဒေါန်အာရ်နီးမာ် ဆီုက်ဘြာန်ဇေဝ်ဂဲ ပ်ုန်လူလှဲဝ်ႈဘိုး ကပီုက်နံမ်မာန်အောႏ။

ကျံရ်အူကိူရ် ဆငည်း(8) အခိင်ခီညှာ (11:05)မိနေတ်ဒိူန် ဆီုက်ဘြာန်ဇေဝ်ဂဲ ဒါယာင်ပ်ုရ် ဒေဲႈပဴင်ပ္လေဘျုင် ထာန်ဇံန်(250) ရအာည်ႇလူမ်ပလိက် ရဝ်မာန်လိုင် (2)ပိုင်း၊ ဂဲဒါဘိုး ရော့ကဒ် ပဴင်ပ္လေဘျုင် ပဇံင်က္လာႈ(2)ပိုင်းကာည်း ပဇံင်တာလိုင်(2) ပိုင်း။