ဘည်မိုႈအ်ုန် ဘံန်ဟောည်ႇဒေဲႈ ကျံရ်အူကိူရ် ဆငည်း(20)ဒိူန် အခိင်ရဆံန်(2:30)နြီ ပရဝ်ကယားဒါင်း၊ ဇံင်(4) ပဂါင်ဂေါည် တာအထူး ငံရ်ဝါယာပဲန်ဆျှောတ် ပဲန်ငံရ်က္လိုႇဟာဝ်းဂါင်၊ ဂေါႇပဲန်ငံရ်က္လိုႇဂါင်ဘည်ဒီန် ဆဲင်ကယ်(1)ကြောင်၊ စဲတ်ဘိင်(2)ကြောင်၊ ဂြိုခြီုင်အီဂေါည်ခေဲင်ဂါင်ဂဲ ကဆူမ်းဟာဝ်းဒိုႇ ကစုကပိုမ်ငေါႈခံန်အ်ုန်မိုႈ (70)ဆဲန်ဘျာအောႏ။

ကျံရ်အူကိူရ် ဆငည်း(21) အခိင်ရဆံန်(2:58)မိနေတ်ဒိူန် အာဝ်မိူဝ်ပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ဒီပါင်ပ္လေဖူဆယ် ဇံင်ကာန့်တော၊ ပလှံင်မိုဂူႈ။

ကျံရ်အူကိူရ် ဆငည်းအဒိူဝ် အခိင်ခီညှာ(8:10)မိနေတ်ဒိူန် ဆီုက်ဘြာန်ဇေဝ်ဂဲ ရောတ်ဒေဲႈပဴင် ပ္လေဘျုင် ထာန်ဇံန်(500) (2)ပိုင်း ရဝ်ဟိုမိူင်၊ ပလှံင်အိုမ်ယ်ုရ်၊ လံက်ဟာဝ်း လိုည်းဆာန်ဒါဝူန်း အဆာက်(15)ဆန်ုမ်၊ လိုည်းဆပဲညူတ် အဆာက်(15)ဆန်ုမ် ကာည်း တားကူန်နောည် အဆာက်(55)ဆန်ုမ် ဂဲအိုည်အီး ယံမ်းဟာဝ်းပွံတ်အ်ုန်ဒီး။

ကျံရ်အူကိူရ် ဆငည်းအဒိူဝ်(17) အခိင် ခီညှာ(8:28)မိနေတ်ဒိူန် ဆီုက်ဘြာန်ဇေဝ်ဂဲ ကယေင်တေဲင်ကူန်ရဝ်မာဂါင်ဂဲ ဒါယာင်ပ်ုရ် ရောတ်ဒေဲႈပဴင်ထဲင်ပ္လေဘျုင် ထာန်ဇံန်(250) (2)ပိုင်း တပြောကျောင် အ.ထ.က(1) လှံင်အိုမ်ငျံရ်၊ လံက်ဟာဝ်း ကောန်အီပ်ုန်(4)အီး ကတူႈဘာတ်၊ ကျောင်ပနောဘေဲႇ (2)ကျောင် ကာည်း ဂါင်ကူန်ရဝ်မာဂါင်ဂဲ လူလှဲဝ်ႏဟာဝ်း။

အရာင်ဆဒါင်နီန် မိုႈ ဘည်တိူရ်ႈလိူရ်ႈယိူဝ်း ဘံန်ဟောည်ႇဒေဲႈ ကျံရ်အူကိူရ် ဆငည်း(7) အခိင်ရဆံန်(12:30)နြီဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ‌ပ္လေႈပ္လေဘျုင် ဘည်လံက်လူလှဲဝ်ႏဟာဝ်း ဒီဂေါည်ကူန်ရဝ်မာဂါင်ဂဲ ခေဲင်ရဝ်မာန်ဟိုင်း၊ ခမိုနံမ်ခိုမ်၊ လှံင်မိူင်လိုင် ခေဲင်ကုင်တအာင်း။

ဘည်မိုႈဘည်ဘာည်းအ်ုန် ကျံရ်တီမ် ဆငည်း(26) အခိင်ခီညှာ(11:28)မိနေတ်ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါဒရိုင်းရောတ်ဒေဲႈပဴင်ပ္လေဘျုင် ပပါပိုက် လံက်အီမာည်း အဆာက်(61)ဆန်ုမ် ယံမ်းဟာဝ်းပွံတ်ကဆီုဝ်ဒီန် ကာည်း ဂါင်ဂေါည်(1)ဂါင် လူလှဲဝ်ႏ။