ကုင်တအာင်း၊ ခေဲင်ကျံရ်ကိူရ်အူနီန်း ဖုင်ပလိက်ကုင်တအာင်းဂဲ ဘိူန်းတိုည်း တိုအီး ကရိူရ်ႈကယံင်းခံင်ယိူည်ႇ(9)အီး ကာည်း တိုအီး ဒါခံင်ယိူည်ႇ(30)အီးဒီန် လှံင်ကိုက်ခည်း၊ လှံင်မိုဂူႈ၊ လှံင်မိူင်းလိုင် ကာည်း လှံင်ရူကော။

ကုင်တအာင်း၊ အိူင်မိုဂူႈ၊ လှံင်မိူင်လိုင်၊ ပရဝ်ကော်ပေါင် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် လံက် စဝ်ဒါင်းအီအံက်ခေဲင်ကျောင် လောန်ဟာဝ်း ၊ စဝ်ဆာင်ခါ(5)ပါး၊ ကောန်ဒဲႇအူအီး ကာည်း တာဂံတ်(1)အီး ကတူႈဘာတ်။

တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပလိက်ကုင်တအာင်းဂဲ ဘိူန်းတိုည်းတိုအီး ကဇိူရ်ႈကယံင်းခံင်ယိူည်ႇအူအီး ပလှံင်မိူင်လိုင်၊ အိူင်မိုဂူႈ၊ ခေဲင်ကုင်တအာင်း။

ဘည်မိုႈအ်ုန် ဘံန်ဟောည်ႇဒေဲႈ ကျံရ်အူကိူရ် ဆငည်း(20)ဒိူန် အခိင်ရဆံန်(2:30)နြီ ပရဝ်ကယားဒါင်း၊ ဇံင်(4) ပဂါင်ဂေါည် တာအထူး ငံရ်ဝါယာပဲန်ဆျှောတ် ပဲန်ငံရ်က္လိုႇဟာဝ်းဂါင်၊ ဂေါႇပဲန်ငံရ်က္လိုႇဂါင်ဘည်ဒီန် ဆဲင်ကယ်(1)ကြောင်၊ စဲတ်ဘိင်(2)ကြောင်၊ ဂြိုခြီုင်အီဂေါည်ခေဲင်ဂါင်ဂဲ ကဆူမ်းဟာဝ်းဒိုႇ ကစုကပိုမ်ငေါႈခံန်အ်ုန်မိုႈ (70)ဆဲန်ဘျာအောႏ။

ကျံရ်အူကိူရ် ဆငည်း(21) အခိင်ရဆံန်(2:58)မိနေတ်ဒိူန် အာဝ်မိူဝ်ပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ဒီပါင်ပ္လေဖူဆယ် ဇံင်ကာန့်တော၊ ပလှံင်မိုဂူႈ။