ကျံရ်အာရ်၊ ဆငည်း(12) အခိင်ရမှိဝ်(7:30)နြီ ဖုင်ပလိက်ကုင်တအာင်းဂဲ ဘိူန်းဆဒါင် ဒါ်ႈ တာဝူန်စော ဘိူန်းအဆာက်(36)ဆန်ုမ် မိူဝ်ႈခံင်ယိူည်ႇႎံင် (4)ထုတ်၊ ထုတ်ဒဲ့(22)ထုတ် ကစုကပိုမ် ထာန်ဇံန်(1462.6)ဂရမ် ကာည်း ပယာယီမွှေး ခံင်ယိူည်ႇလူည် ဂေါည် (126.4)ဂရမ် တောပ် ကအာင်ယာမ(113.6)ဂရမ်) ဘိူန်းတိုည်းဟာဝ်းအောႏ။
ဒီရ်;ကဇေန်နီး
ကုင်တအာင်း၊ လှံင်ကိုက်ခည်း၊ လှံင်အိုမ်ငျံရ်၊ လှံင်အေဲမ်ခြီရ် ကာည်း လှံင်မိုဂူႈ ခေဲင်ကျံရ်ဖံန်နီန်း ပဲန်ငံရ်က္လိုႇ(5)လိူဝ်ႈ၊ ကဆူမ်းဟာဝ်းရိူန်း(641)ဆဲန်လှိူဝ်း။
ခေဲင်ကျံရ်ဖံန်ဒိူန် ဆီုက်ဘြာန်ဇေဝ်ဂဲ ဘည်ဒါႈဇံင်းအူန်း ကတီုက်ကပဴင်မာ် ဂဲဒါယာင်ပ်ုရ် ရောတ်ဒေဲႈပဴင်ဟာဝ်း ပ္လေဘျုင် ပလှံင်နောင်ချှို၊ မိုဂူႈ၊ မာဝ်းဓံင်း၊ ကုင်ငှေါ၊ မိူင်လိုင် ကာည်း ရူကော (26)လိူဝ်ႈ၊ ဒါပ္လေဒါင်း ပဴင်(776)ပိုင်၊ ဒါဒရိုန်း ပဴင် (329)ပိုင် ကာည်း ဒါပ္လေဘျုင်မိူဝ်ႈကောင် (114)ပိုင်၊ ဂေါႇပ္လေဘျုင်ပဴင်ဆီုက်ဘြာန်ဂဲ ကူန်ရဝ်မာဂါင် အီယံမ်းဟာဝ်း ဂေါည်(8)အီး ၊ အီကတူႈဖေးဘာတ် ဂေါည်(18)အီး ဂါင်မာ် မိူဝ်ႈအီလူလှဲဝ်ဟာဝ်းဂီုန်း။
ကုင်တအာင်း၊ ခေဲင်ကျံရ်ဖံန်နီန်း ဂေါႇမဴင်ပ်ုန်ဓီရ်ဆီုက်ဘြာန်ဂဲ ကူန်ရဝ်မာဂါင် ယံမ်းဟာာဝ်း(2)အီး၊ (3)အီး ကတူႈဘာတ်ဒါင်း။
ခေဲင်ကုင်တအာင်း၊ ပ်ုန်ကယေင်ရေဲန်ပ္လေါည်ႎိူဝ်ႈထီ လိူဝ်ႈ(24)နီန်း ကညားအီဘိူန်းဟာဝ်း ဆုဒါင်း (500)ဆဲန် မိုႈ လိုည်းအီစာမည်(မ်ု) ဂေါည်ဇံင်(8) လှံင်ကိုက်ခည်း ။
ခေဲင်ကျံရ်ဖံန်နီန် ဖုင်ဘေဲႇတအာင်း -TLAဂဲ ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း ခေဲင်ကုင်တအာင်း ရဝ်(7)ရဝ်။
ဖုင်ဘေဲႇတအာင်း-TLAဂဲ ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း ပရဝ်ပြိန်းအင်၊ လှံင်မိူင်လိုင်၊ ခေဲင်ကုင်တအာင်း။
အာဝ်မိူဝ်ႈမ ပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(500) (2)ပိုင်း ပကုမ္မဏီသတ္တုရှဲဆံန် လှံင်နောင်ချှို၊ ခေဲင်ကုင်တအာင်း။
ပ်ုန်ဒီရ်;ဂီုန်း
