ဆငည်းအမှိူဝ် အခိင် ရဆံန် (12:30)ထာန်နီး ဆီုက်ဘြာန်ဇေဝ်ဂဲ ရောတ်ဒေပ္လေႈပ္လေဘျုင်(250) (2)ပိုင်ဘည်ဒီန် ဂေါႇပ္လေဘျုင်ပဴင်ဆီုက်ဘြာန်ဇေဝ်ဂဲ တာအိုက်ဆာန် ဘိူန်းအဆာက် (37)ဆန်ုမ်၊ တာစံန်ပွင့် ဘိူန်းအဆာက်(35)ဆန်ုမ်၊ တာဆဲင်အံင်ဆာ ဘိူန်းအဆာက်(29)ဆန်ုမ်၊ တာအိုက်ထဲက် ဘိူန်းအဆာက် (27)ဆန်ုမ်၊ ယာအုင်ခီန် ဘိူန်းအဆာက် (45)ဆန်ုမ်၊ ယာလှစိင် ဘိူန်းအဆာက်(25)ဆန်ုမ်၊ယာအေမေ ဘိူန်းအဆာက် (39)ဆန်ုမ်၊ ယာခီန်ပ ဘိူန်းအဆာက် (29)ဆန်ုမ်၊ ယာအေတိတ် ကာည်း မာည်းအိုက်အူ ဘိူန်းအဆာက် (2)ဆန်ုမ် လံက်ယံမ်းဟာဝ်း ကူန်ရဝ်မာဂါင် (3)အီးမာ် ကတူႈဘာတ်ဒါင်းဟာဝ်း ဆဲႈဒီန် ဂါင်ဂေါည် (6)ဂါင်လူလှဲဝ်ႏဟာဝ်းအောႏ။

ကျံရ်အူကိူရ် ဆငည်း(7) အခိင်ခီညှာ(7:33)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါနောကယေင် တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဘိုး ပ္လေဘျုင်ထာန်ဇံန်(250)(2)ပိုင်း ပဇံင်(8) လှံင်အိုမ်ငျံရ်၊ ဂေါႇပ္လေဘျုင်ဇောႈပဒူႈဘည်ဒီန် လံက်ဟာဝ်း ကျောင်စဝ်ပုဗ္ဗာရုံ(4)ကျောင် လူလှဲဝ်ႏ။

ကျံရ်အူကိူရ် ဆငည်း(6) အခိင်ခီညှာ(7:42)မိနေတ်ဒိူန် ဂေါဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(1)ပိုင်း ခေဲင်လံပ်ကတူည်ႇ(မိုက်ခရိုဝေ့ပ်) လှံင်ဆဘော လံက်ဟာဝ်း ကောန်ဒဲႇမံင်ခန့်ညာထူန်း အဆာက်(1)ဆန်ုမ်၊ တာသောန အဆာက်(23)ဆန်ုမ်ကာည်း တာပတူး ကဲ(3)အီး ကတူႈဖေးဘာတ်၊ ဆဲႈဒါႇဒီန် ဂေါႇပ္လေဘျုင်ဇောႈပဒူဟာဝ်းဘည်ဒီန် ဂါင်ႎါႈမိုက်ခရိုဝေ့ပ်ကာည်း ဂါင်ကူန်ရဝ်မာဂါင်ဂဲ (1)ဂါင် လူလှဲဝ်ႏ။

ကျံရ်အူကိူရ် အမှိူဝ်ဆငည်း(6) အခိင်(7:30)ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဲဒေဲႈပဴင်ပ္လေဘျုင် ပဇံင်က္လာႈ(2) လှံင်အိုမ်ငျံရ်။ဂေါႇပ္လေဘျုင်ဇောႈပဒူႈဘည်ဒီန် လံက်ဟာဝ်းဂါင်(6)ဂါင်လူလှဲဝ်ႏ။

ကျံရ်အူကိူရ် ဆငည်း(4) အခိင်ရမှိူဝ်(8:30)နြီဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250) ပဇံင်ဆဲတ်ဆု(1)ပိုင်း၊ ကျောင်အ.ထ.က(2) (1)ပိုင်းကာည်း ပရဝ်ကျောင်ဆု(2)ပိုင်း ကစုကပိုမ်(4)ပိုင်း။

ကုင်တအာင်း၊ အိုမ်ယ်ုရ်၊ အိုမ်ငျံရ်၊ ရူကော၊ ဆဘော၊ အေဲမ်ခြီရ် ကာည်း မူစယ် ခေဲင်ကျံရ်တီမ်ဒိူန် ဖုင်ပလိက်ကုင်တအာင်းဂဲ ဘိူန်းဒေတိုည်း တိုအီးကဇိူရ်ႈကယံင်းခံင်ယိူည်ႇ(6)အီး ကာည်း တိုအီးဒါခံင်ယိူည်ႇ(43)အီး။

ဆငည်း(4)အမှိူဝ်ဒိူန် အခိင်ရဆံန်(12:28)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ပရဝ်တီုင်ဟျော လှံင်အိုမ်ယ်ုရ် လံက်ဟာဝ်း ကောန်ဒဲႇ မံင်ဆေယျအံင် အဆာက်(10)ဆန်ုမ်ကာည်း မံင်ထူန်းမျိုးအံင် အဆာက်(13)ဆန်ုမ်ယံမ်း၊ လံက်ဟာဝ်းဘိုး မမျဲတ်ဝူန်းချှဲယ် အဆာက်(10)ဆန်ုမ်၊ မခီန်ယုမေ အဆာက်(12)ဆန်ုမ်၊ မသန္တာဆိုး အဆာက်(9)ဆန်ုမ် မခီန်လပျေ့နှီင်း အဆာက်(12)ဆန်ုမ်၊ မထိုည်းယီ အဆာက်(13)ဆန်ုမ်၊ မံင်ခန့်သူရိုန်မီန်း အဆာက်(14)ဆန်ုမ်ကာည်း တာတောင်တာန်း အဆာက်(40)ဆန်ုမ်၊ တာဖိုးဆျှံန်း အဆာက်(60)ဆန်ုမ်ကာည်း တာပံန်စာန်း အဆာက်(60)ဆန်ုမ် ကဲ (9)အီး ကတူဖေးဘာတ်၊ ဒါႇခူဒီန် ဂါင်ဂေါည်ကူန်ရဝ်မာဂါင်ဂဲ (16)ဂါင်မာ် လံက်လူလှဲဝ်ႏဟာဝ်း။

ဘံန်ဟောည်ႇဒေဲႈ ကျံရ်အူကိူရ် ဆငည်း(2) အခိင်စူန်အံပ်(3)နြီဒိူန် ကဝ်အီဇီုဝ် မဆျှိုည်ညေင် အဆာက်(8)ဆန်ုမ် ဂေါည်ခေဲင်ဇံင်(8) အခိင်ဝီရ်ဒေဲႈ ပ‌ကျောင်ရောတ်တဒေင်ဂေါက်ကွင်း (ဒီငါ်ႈဂေါက်)ဒိူန် မိူဝ်ႈအီမာည်းအူအီး တောႇဟာဝ်းအ်ုန်ခေဲင်ယူပ် ပ္လေဲဝ်လူည်ႇအမှုငံန် ပယံမ်းဟာဝ်းအ်ုန်ဘည်ဒီန်အောႏ။

ကျံရ်အူကိူရ် ဆငည်း(4) အခိင်ခီညှာ(7:49)မိနေတ်ဒိူန် ဆီုက်ဘြာန်ဇေဝ် ဒါဇဲတ်ႎှည်တာ ရောတ်ဒေဲႈပဴင်ဘိုး ပ္လေဘျုင် ထာန်ဇံန်(250)(2)ပိုင်း ခေဲင်တံပ်ဆခါန်းပြီမ်ဂေါည်ဂဲအာည်ႇနီန် ပရဝ်မာန်ဟဲ။