ကုင်တအာင်း၊ ခေဲင်အူကျံရ်ကိူရ်နီန်း ဂေါႇဆီုက်ဘြာန်ဇေဝ်ဂဲ ဒါယာန်ပ်ုရ်ကာည်းဒရိုင်း ပဴင်ပ္လေဘျုင် လံက်ဟာဝ်း စဝ်ဆာင်ခါ(2)ပါး၊ ကောန်ဒဲႇ(10)အီး၊ ကောန်အီမာည်း(16)အီး ကာည်း ကောန်အီပ်ုန်(21)အီးယံမ်း၊ စဝ်ဆာင်ခါ (6)ပါး၊ ကောန်ဒဲႇ(26)အီး၊ ကောန်အီမာည်း(20)အီးကာည်း ကောန်အီပ်ုန်(19)အီး ကတူႈဘာတ်၊ လံက်လူလှဲဝ်ႏဟာဝ်းဘိုး ဂါင်ဂေါည်(173)ဂါင်၊ ကျောင်ပနောဘေဲႇ(5)ကျောင်၊ ကျောင်စဝ်(7)ကျောင်၊ ႎှါင်းကျောင်(9)ႎှါင်း၊ ဂါင်ႎါႈ(6)လှေ၊ လိုင်းဒီဟျံင်အျံရ်(2)လိုင်း၊ ဆဴင်ခါန်း(5)ခါန်း၊ ယုင်စာက်မျံမ်(1)ယုင်၊ ဆဲင်ကယ်(4)ကြောင်ကာည်း ကား(10)ကြောင် လူလှဲဝ်ႏ။

ပါင်ကမိုန်ကတူႈကငျားလိူဝ်ႈ(9)နီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်အီအွံရ်က်ုန်ရံရ် တာမ်ခူန်ချုဒါင်း တားဇိုက်ဇာရ်ကာည်း အီအွံရ်က်ုန်ရံရ်ကဒါႇဘြာန်(NSPNC) တာမ်ခူန်ချုဒါင်း တားကိုကိုအူးကဲ ခည်မိုႈ ဆန်ုမ် 2025၊ ကျံရ်အူကိူရ် ဆငည်း(27-28)ဒိူန် ဂေါႇမိုႈဘည်ချှာင်ဒဲႈ မစ္စတာတိန့်ရှီကျွင်း အီအွံရ်က်ုန်ရံရ်ကုင်ခယ်ကဲ ကတူႈကငျားကမိုန် ဒါႈဇံင်းကတီုက်ကပဴင် ဂြီရ်ႈဟောည်ႇရောည်တည်း ကဲရေဲန်ဟာဝ်း ပလှံင်ကူမီန်း၊ ကပီုန်ယူနန်၊ ပကုင်ခယ်အောႏ။

တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပလိက်ကုင်တအာင်းဂဲ ဘိူန်းတိုည်း တိုအီးဒါခံင်ယိူည်ႇ(3)အီး ပလှံင်မိုဂူႈ၊ အိူင်မိုဂူႈ၊ ခေဲင်ကုင်တအာင်း။

ယာမ်မိုႈ ဆငည်း(25) အခိင် စူန်အံပ် (5)နြီဒိူန် ဂေါႇဆီုက်ဘြာန်ဇေဝ်ဂဲ ဒါဒရိုန်း ရောတ်ဒေဲႈပဴင်ပ္လေဘျုင် (5)ပိုင်း ပရဝ်မာန်လီ စီဇောႈပဒူႈလံက်ဟာဝ်း တေဲင်ဂါင်တားအဟိုင်ကာည်း ယာခံမ်းလီ ငံရ်က္လိုႇဟာဝ်းဂါင်ဘည်ဒီန်။

ဆငည်းအဒိူဝ်နီး အခိင် ရဆံန် (12:23)မေနဲတ် ဆီုက်ဘြာန်ဇေဝ်ဂဲ ရောတ်ဒေဲႈပဴင်ပ္လေဘျုင် ထာန်ဇံန် (500) အူပိုင်း ပရဝ်မာန်ကျည်းပင် ကာည်း ပ္လေထာန်ဇံန် (250)အူပိုင်း လံက်ဟာဝ်းဂါင်ဂေါည်ကူန်ရဝ်မာဂါင် အူဂါင် လူလှဲဝ်ႏဟာဝ်း။

ကျံရ်အူကိူရ် ဆငည်း(24) အခိင် ရမှိူဝ်း(8:49)မိနေတ်ဒိူန် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် အူလိူဝ်ႈ၊ အခိင် (8:50)အူလိူဝ်ႈ၊ အခိင် (8:53)အူလိူဝ်ႈ ကာည်း အခိင် (8:55)အူလိူဝ်ႈ ကစုကပိုမ် ‌ပ္လေဘျုင် ပဴင်ဆီုက်ဘြာန်ဂဲ(4)ပိုင်းထာန်နီန်။

ကျံရ်အူကိူရ် ဆငည်းအဒိူဝ် အခိင် ခီညှာ(1:33)မိနေတ်ဒိူန် ပလှံင်မိူင်လိုင်၊ ရဝ်ပါင်ဆာန် အာဝ်မိူဝ်ႈပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း။

ဘည်မိုႈအ်ုန် ဆငည်း(20) အခိင်ရမှိူဝ်း(8:03)မနေတ်ဒိူန် ဆီုက်ဘြာန်‌ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(250)(2)ပိုင်း ပလှံင်ကုင်ငှေါ ၊ တပြောက္လာမျိုမ စီဇောႈပဒူႈလံက်ဟာဝ်း အီမာည်း(1)အီး၊ ကောန်အီပ်ုန်(1)အီးယံမ်း၊‌ ကောန်အီမာည်း(1)အီး ကာည်း အီပ်ုန်(1)အီး ကတူႈဘာတ်၊ ဂါင်(10)ဂါင် ၊ ဂါင်ဆဲင်(5)ဂါင် လူလှဲဝ်ႏဟာဝ်း။

ဘည်မိုႈအ်ုန် ဆငည်း(19) အခိင်ရဆံန် (2:06)မနေတ်ဒိူန် ဆီုက်ဘြာန်‌ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(250)(1)ပိုင်း ပလှံင်မိုဂူႈ စီဇောႈပဒူႈဟာဝ်း တေဲင်လိုင်းဒီဟျံင်အျံရ်။