တံပ်အွံရ်ပ်ုန်လောတ်ကပီုန်တအာင်းPSLF/TNLA ဖုင်ပလီတ်ကုင်တအာင်းဂဲ ဘိူန်း‌ဒေတိုည်း တိုအီးဒါခံင်ယိူည်ႇ (5)အီး ပလှံင်အိုမ်ငျံရ်။

တံပ်အွံရ်ပ်ုန်လောတ်ကပီုန်တအာင်းPSLF/TNLA ပလီတ်ကုင်တအာင်း ကျံရ်အိုည်၊ ဆငည်း (21) အခိင်ခီညှာ လီပ်စေတ်မေန်း ခေဲင်က္လာႈအိုမ်ငျံရ် ဂြိုခြီုင်ပ်ုန်ဟောမ်ပ်ုန်ဒါ လှေအ်ုန်အီးExpired Dateဒိုည်ႇ။

ကုင်တအာင်း၊ အိူင်မိုဂူႈ ၊ ပလှံင်မိုဂူႈ၊ တံပ်အွံရ်ပ်ုန်လောတ်ကပီုန်တအာင်း PSLF/TNLA တီုင်ဘြောင်ချှာင် ရေဲန်ပ္လေါည်ကတူႈကငျားတောပ် ကူန်ရဝ်မာဂါင်ဂဲပလှံင်မိုဂူႈ။

ကုင်တအာင်း၊ အိူင်အိုမ်ယ်ုရ်၊ ပလှံင်ဆဘော၊ ကောန်အီမာည်း (1)အီး အခိင်ဟာဝ်းတမာ စီငျားဒေညဲ့ မဴင်အ်ုန်ဒါ့ကီုတ်အူန်း ပ်ုန်တီႇဆီုက်ဘြာန်ဇေဝ်ဂဲ စီပဒူႈလံက်ဟာဝ်းယံမ်းပွံတ်ကဆီုဝ်ဒီန်။

ကုင်တအာင်း ၊ အိူင်မာဝ်းဝံင်း၊ ပလှံင်မာဝ်းဝံင်း ၊ ဆိုရ်အင်ကြင် ဇူႈပတံက်အူန်းတေန် ခေဲင်စှါင်းကျောင်ဝစ် စီပဲန်ငံရ်က္လိုႇဟာဝ်း ကျောင်စဝ် (1)ကျောင်ဒီန်အောႊ။

တံပ်အွရ်ပ်ုန်လောတ်ကပီုန်းတအာင်း PSLF/TNLA တာမ်တားတီုင်အွံရ်အူ တာမ်ခူန်ချုဒါင်း တားဇိုက်ဇာရ် ဆာ်အွံရ်ရေဲန်ဟာဝ်း ပ္လေါည်ဒဲႈဆု လှိူပ်ဂုင်တဂဲ အီထာမ်းဟောည်ႇဇီုင်းတီုက်ႎှီူန်းကနာည်းခြိူဝ်း ယာမ်မိုႈပါန် PNF ကာည်း PSLO/PSLA ဂဲနီး။

ကျံရ်အာရ် ဆငည်း(23)ဒိူန် ဆီုက်ဘြာန်ဇေဝ်ဂဲ ကာည်း တံပ်နာန်းတအာင်း (TNLA) ပဲန်ကတီုက်ကပဴင်ဘ္လောမ် ခနားရဝ်တောင်ရှည် ကာည်း ရဝ်မန်မော် ၊ ဒီအိုမ်ဘြည်ကတာည်း တီုင်တံပ်ဒါင်း(2) ပလှံင်နောင်ချေဝ် ခေဲင်ကုင်တအာင်း။

ဖုင်တီုင်ဒံန်ခြဲတြားဥပဒေဂဲ ဘိူန်းဒေတိုည်း တိုအီးအီဒါခံင်မံဝ် ခေဲင်အိူင်မာဝ်းဓံင်းဒီန် (38)အီး ကာည်း အီကဇိူရ်ႈကယံင်း (4)အီး ခေဲင်ဒီန်အ်ုန်တောပ် ကအာင်ယာမ (1276)ထူက်၊ ဆာ်မိုႈ ခေဲင်အိူင်မိုဂူႈ စီဘိူန်းဒေတိုည်း အီဒါခံင်မံဝ် (11)အီး ကာည်း အီကဇိူရ်ႈကယံင်း (2)အီး။

ဘည်မိုဘည်ဘာည်းအ်ုန် ကျံရ်အာရ် ဆငည်း(6) စူမ်အံပ်(5:30)နြီဒိူန် နှာရိူဝ်ႇလှံင် ဒီဂေါည်ဆခါန်း ဆီုက်ဘြာန်ဇေဝ်ဂဲ အာည်ႇနီန် တပြောကျောင်စဝ်မျဆျှိုည်ဂူ အီမာည်းအူအီး ယိူဝ်းမဴင်အူပိုင်း အခိင်အ်ုန်တိူဝ်ႈကနိုက် မဴင်စီပဒူႈဟာဝ်း။