တအာင်းပြည်၊ နမ့်ဆန်မြို့နယ်၊ မန်လုံးကျေးရွာတွင် အောက်တိုဘာလ ၄ ရက်နေ့ နံနက် ၆:၀၀ နာရီခန့်က မီးကြိုးရှော့ခ်ဖြစ်ပွားရာမှ ဦးအိုက်ရွှေ၏ နေအိမ် မီးလောင်ကျွမ်းခဲ့ပြီး ရွှေ၊ ကျောက်မျက်ရတနာများ၊ ငွေသားကျပ်သိန်း ၃၀ နှင့် အိမ်သုံးပစ္စည်းများ မီးလောင်ဆုံးရှုံးခဲ့သည်။ ကျေးရွာတာဝန်ရှိသူများနှင့် ပြည်သူများ ပူးပေါင်းမီးငြှိမ်းသတ်ခဲ့ရာ နံနက် ၇:၃၀ နာရီတွင် မီးငြိမ်းသတ်နိုင်ခဲ့သည်။

တအာင်းပြည် နမ့်ဆန်မြို့ရှိ အ.ထ.က (၁) အခြေခံပညာအထက်တန်းကျောင်းနှင့် တအာင်းပညာရေးအကယ်ဒမီ (TEA) တို့တွင် တအာင်းပြည် ပညာရေးကောင်စီ (TLEC) ဦးဆောင်၍ အောက်တိုဘာ ၅ ရက်တွင် ကမ္ဘာ့ဆရာများနေ့ အခမ်းအနားများကို ကျင်းပခဲ့ပြီး ဆရာ၊ ဆရာမများ၏ ပညာရေးကဏ္ဍအပေါ် ပံ့ပိုးမှုနှင့် အရေးပါသော အခန်းကဏ္ဍများကို ဂုဏ်ပြုမှတ်တမ်းတင်ခဲ့ကာ ကျောင်းသား၊ ကျောင်းသူများနှင့် ဆရာ၊ ဆရာမများက အမှတ်တရစကားများ၊ ဖျော်ဖြေမှုများနှင့် အမှတ်တရလက်ဆောင်များဖြင့် ပါဝင်ဆင်နွှဲခဲ့ကြသည်။

နမ့်ခမ်းမြို့တွင် မူးယစ်ဆေးဝါးတိုက်ဖျက်ရေး စစ်ဆေးမှုများအတွင်း ဘိန်းဖြူနှင့် ယာမဆေးပြားများ လက်ဝယ်တွေ့ရှိသူ ၃ ဦးကို ဖမ်းဆီးရမိခဲ့ပြီး ဥပဒေနှင့်အညီ ဆက်လက်အရေးယူမည်ဖြစ်သည်။