တအာင်းပြည်၊ မန်တုံခရိုင်၊ မန်တုံနှင့် နမ့်လန်းကျေးရွာကြားရှိ လမ်းမကြီးတစ်လျှောက်တွင် လမ်းဘေးရှိ မြက်ပင်၊ ခြုံပင်များ ခုတ်ထွင်ရှင်းလင်းခြင်းလုပ်ငန်းများကို မြို့နယ်အထွေထွေအုပ်ချုပ်ရေးဌာနနှင့် ပြည်သူလူထုများက စုပေါင်း၍ ပြုလုပ်ဆောင်ရွက်ခဲ့ပါသည်။

တအာင်းပြည်၊ မန်တုံ၊ နမ့်ခမ်း၊ မိုင်းလုံနှင့် နမ့်ဆန်မြို့နယ်တို့တွင် ဇူလိုင်လတစ်လအတွင်း တအာင်းပြည် မြို့နယ်ရဲတပ်ဖွဲ့မှ မူးယစ်ဆေးဝါးတိုက်ဖျက်ရေးလုပ်ငန်းများ ဆောင်ရွက်နေစဉ် မူးယစ်ဆေးဝါးရောင်းဝယ်သူ (၃) ဦးနှင့် သုံးစွဲသူ (၁၆) ဦး ဖမ်းဆီးအရေးယူနိုင်ခဲ့သည်။

တအာင်းပြည်အတွင်း ရောဂါစောင့်ကြည့်ရေးလုပ်ငန်းများ ပိုမိုအားကောင်းလာစေရန်နှင့် ကိုယ်ဝန်ဆောင်မိခင်များ၊ နို့တိုက်မိခင်များနှင့် အသက် (၂) နှစ်အောက် ကလေးငယ်များ၏ အာဟာရနှင့် ကျန်းမာရေးအခြေအနေ တိုးတက်ကောင်းမွန်လာစေရန် ရည်ရွယ်၍ တအာင်းပြည်ကျန်းမာရေးကောင်စီမှ ၂၀၂၆ ခုနှစ် ဇူလိုင်လအတွင်း ကျေးရွာပေါင်း (၉) ရွာ၌ ရောဂါစောင့်ကြည့်ရေးနှင့် ကျန်းမာရေးစောင့်ရှောက်မှုလုပ်ငန်းများကို ကွင်းဆင်းဆောင်ရွက်ခဲ့သည်။

ပလောင်ပြည်နယ်လွတ်မြောက်ရေးတပ်ဦး PSLF/TNLA ၏ အမျိုးသမီးဖွံ့ဖြိုးတိုးတက်ရေးဌာနသည် ၂၀၂၆ ခုနှစ် ဇူလိုင်လအတွင်း တအာင်းပြည်၊ မြို့နယ် (၇) မြို့နယ်ရှိ ကျေးရွာပေါင်း (၄၄) ရွာမှ ပြည်သူလူထု စုစုပေါင်း (၂,၉၉၁) ဦးအား အမျိုးသမီးအခွင့်အရေး၊ မျိုးဆက်ပွားကျန်းမာရေးနှင့် မိသားစုဘဝဖွံ့ဖြိုးရေးဆိုင်ရာ အသိပညာပေး ကွင်းဆင်းလုပ်ငန်းများ ဆောင်ရွက်နိုင်ခဲ့သည်။

တအာင်းပြည်၊ ကွတ်ခိုင်မြို့နယ်ရှိ ရွှေကမ္ဘာအေးပရိယတ္တိစာသင်တိုက်၌ တအာင်းစာပေနှင့် သာသနာရေးဆိုင်ရာ အသိပညာမြှင့်တင်ရေးအတွက် ဖွင့်လှစ်ခဲ့သည့် အပတ်စဉ် (၂) သင်တန်းဆင်းပွဲအခမ်းအနားကို ဇူလိုင်လ (၂၂) ရက်နေ့တွင် တအာင်းသံဃာတော်အဖွဲ့မှ ဦးဆောင်ကျင်းပပြုလုပ်ခဲ့သည်။