08 October 2025

ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ဘိုး ပ္လေဘျုင် ပလှံင်အိုမ်ငျံရ် လံက်ဟာဝ်း ကျောင်စဝ်ပုဗ္ဗာရုံ(4)ကျောင် လူလှဲဝ်ႏ

အိုမ်ငျံရ်၊ ကျံရ်အူကိူရ် ဆငည်း(8)

ဆဒါင်ကုင်တအာင်း

ကုင်တအာင်း၊ အိူင်အိုမ်ယ်ုရ်၊ ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ဘိုး ပ္လေဘျုင် ပလှံင်အိုမ်ငျံရ် လံက်ဟာဝ်းကျောင်စဝ်ပုဗ္ဗာရုံ(4)ကျောင် လူလှဲဝ်ႏအောႏ။

ကျံရ်အူကိူရ် ဆငည်း(7) အခိင်ခီညှာ(7:33)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါနောကယေင် တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဘိုး ပ္လေဘျုင်ထာန်ဇံန်(250)(2)ပိုင်း ပဇံင်(8) လှံင်အိုမ်ငျံရ်၊ ဂေါႇပ္လေဘျုင်ဇောႈပဒူႈဘည်ဒီန် လံက်ဟာဝ်း ကျောင်စဝ်ပုဗ္ဗာရုံ(4)ကျောင် လူလှဲဝ်ႏ။ 

မိုႈဘိုး ဆငည်းပ္လေါည်လေႈဝါ ကျံရ်အူကိူရ် ဆငည်း(6)ဒိူန်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်‌ဒေဲႈပဴင်ပ္လေဘျုင်   ပဇံင်(2) လှံင်အိုမ်ငျံရ် လံက်ဂါင်ကူန်ရဝ်မာဂါင်ဂဲ(6)ဂါင်လူလှဲဝ်ႏ၊   မိုႈဘိုး ဆငည်းဒီန် ဂဲဒါဇဲတ်ႎှည်တာ  ရောတ်ဒေဲႈပဴင်ပ္လေဘျုင် ပလံပ်ကတူည်ႇ ခေဲင်လှံင်ဆဘော   လံက်ဟာဝ်းတောပ်ကောန်ဒဲႇ(1)အီး ကူန်ရဝ်မာဂါင်ဂဲ (3)အီး ကတူႈဖေးဘာတ်။  

ဂေါႇဆီုက်ဘြာန်ဇေဝ်ဂဲ ဂီုည်လည်ဒေပဴင်ဟာဝ်း ပ္လေဘျုင်ဘည်နီန် ဘည်ကဆီုဝ်ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လံပ်ဆီုက်နာန်းနီန်း၊ ယာင်ပ်ုရ်ကာည်း ဒရိုင်းပဴင်ဆီုက်ဘြာန်ဇေဝ်ဂဲ လိုရေဲန်အူန်းမိူဝ်ႈ ရဒေင်ဒီဒံန်ခြဲ၊ ကနာည်နံင်ဒဝ်းလောတ် ဘိုန်းဒါႇယာင်ပ်ုရ်ပဴင် ဆီုက်ဘြာန်ဇေဝ်ဂဲနီန်အောႏ။

ဆီုက်ဘြာန်ဇေဝ်ဂဲနီန် အာဝ်ႎါ်န်းလိူည် ခေဲင်ကုင်တအာင်းနီန် ဒီမိုႈ ပ်ုန်ဖုင်ကောန်တီုင်ကုင် အီးဘားလာက်နာတ်ဂဲကာည်း ဖုင်ယိူဝ်ႇတီုက်ႎှီုန်းဂဲ တီုက်ဘိူန်းဆီမ်းဟာဝ်း ဒီလှံင်ကဲနီန်မာ်၊ ဂဲဒါ ယာင်ပ်ုရ်၊ ပ္လေဒါင်း၊  ဒရိုင်းကဲနီန်လည်ဒေပဴင် ပ္လေဲဝ်လူည်ႇဟာဝ်း အီုင်ဂ္လံတ်ဆီုက် တေဲင်ကူန်ရဝ်မာဂါင်ဂဲ ဘည်နီန်အောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း