ဆငည်းပ္လေါည်လေႈဝါဒိူန် ဂေါႇဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဘိုးပ္လေဘျုင် ပလှံင်ဆဘော လံက်တောပ်ကောန်ဒဲႇ(1)အီး ကူန်ရဝ်မာဂါင်ဂဲ(3)အီး ကတူႈဖေးဘာတ်
08 October 2025
ဆငည်းပ္လေါည်လေႈဝါဒိူန် ဂေါႇဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဘိုးပ္လေဘျုင် ပလှံင်ဆဘော လံက်တောပ်ကောန်ဒဲႇ(1)အီး ကူန်ရဝ်မာဂါင်ဂဲ(3)အီး ကတူႈဖေးဘာတ်
ဆဘော၊ ကျံရ်အူကိူရ် ဆငည်း(8)
ဆဒါင်ကုင်တအာင်း
ခေဲင်ကုင်တအာင်း၊ အိူင်မာဝ်းႎံင်း၊ ဆငည်းပ္လေါည်လေႈဝါဒိူန် ဂေါႇဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဘိုးပ္လေဘျုင် ပလှံင်ဆဘော လံက်တောပ်ကောန်ဒဲႇ(1)အီး ကူန်ရဝ်မာဂါင်ဂဲ(3)အီး ကတူႈဖေးဘာတ်အောႏ။
ကျံရ်အူကိူရ် ဆငည်း(6) အခိင်ခီညှာ(7:42)မိနေတ်ဒိူန် ဂေါဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(1)ပိုင်း ခေဲင်လံပ်ကတူည်ႇ(မိုက်ခရိုဝေ့ပ်) လှံင်ဆဘော လံက်ဟာဝ်း ကောန်ဒဲႇမံင်ခန့်ညာထူန်း အဆာက်(1)ဆန်ုမ်၊ တာသောန အဆာက်(23)ဆန်ုမ်ကာည်း တာပတူး ကဲ(3)အီး ကတူႈဖေးဘာတ်၊ ဆဲႈဒါႇဒီန် ဂေါႇပ္လေဘျုင်ဇောႈပဒူဟာဝ်းဘည်ဒီန် ဂါင်ႎါႈမိုက်ခရိုဝေ့ပ်ကာည်း ဂါင်ကူန်ရဝ်မာဂါင်ဂဲ (1)ဂါင် လူလှဲဝ်ႏ။
မိုႈဘိုး ဆငည်းဒီန် အခိင်(7:45)မိနေတ်ဒိူန်မာ် ဂေါႇဆီုက်ဘြာန်ဇေဝ်ဂဲ ဒါနောႈကယေင် တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ပဇံင်က္လာႈ(2) လံက်ဟာဝ်း ဂါင်ကူန်ရဝ်မာဂါင်ဂဲ (6)ဂါင် လူလှဲဝ်ႏ။
ဆဲႈဒီန် ကျံရ်အူကိူရ် ဆငည်း(4)ဒိူန် ခေဲင်အူဆငည်းဒီန် ဆီုက်ဘြာန်ဇေဝ်ဂဲ ဒါယာင်ပ်ုရ် ပဴင်ပ္လေဘျုင် ပရဝ်မာန်ဟဲကာည်း ရဝ်အုံမု လှံင်ဆဘော အာရ်လိူဝ်ႈ၊ ဝါည်ဒီန် အခိင်စူန်အံပ်ဒိူန်မာ် ဂဲရောတ်ဒေဲႈပဴင်ဘိုး ပဇံင်ဆဲတ်ဆု ကာည်း ရဝ်စိန်တီ အာရ်လိူဝ်ႈ၊ ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ဘည်ဒီန် လံက်ကူန်ရဝ်မာဂါင်ဂဲ ရဝ်စိန်တီ(2)အီးယံမ်း၊ (3)အီး ကတူႈဖေးဘာတ်၊ ဆဲဒီန် လံက်ဟာဝ်းဘိုး ကျောင်စဝ်ကာည်း ကျောင်ပနောဘေဲႇ တောပ်ဘိုး ဂါင်ကူန်ရဝ်မာဂါင်ဂဲ (13)ဂါင် လူလှဲဝ်ႏဟာဝ်းအောႏ။
ဂေါႇဆီုက်ဘြာန်ဇေဝ်ဂဲ ဂီုည်လည်ဒေပဴင်ဟာဝ်း ပ္လေဘျုင်ဘည်နီန် ဘည်ကဆီုဝ်ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လံပ်ဆီုက်နာန်းနီန်း၊ ယာင်ပ်ုရ်ကာည်း ဒရိုင်းပဴင်ဆီုက်ဘြာန်ဇေဝ်ဂဲ လိုရေဲန်အူန်းမိူဝ်ႈ ရဒေင်ဒီဒံန်ခြဲ၊ ကနာည်နံင်ဒဝ်းလောတ် ဘိုန်းဒါႇယာင်ပ်ုရ်ပဴင် ဆီုက်ဘြာန်ဇေဝ်ဂဲနီန်အောႏ။
ဆီုက်ဘြာန်ဇေဝ်ဂဲနီန် အာဝ်ႎါ်န်းလိူည် ခေဲင်ကုင်တအာင်းနီန် ဒီမိုႈ ပ်ုန်ဖုင်ကောန်တီုင်ကုင် အီးဘားလာက်နာတ်ဂဲကာည်း ဖုင်ယိူဝ်ႇတီုက်ႎှီုန်းဂဲ တီုက်ဘိူန်းဆီမ်းဟာဝ်း ဒီလှံင်ကဲနီန်မာ်၊ ဂဲဒါ ယာင်ပ်ုရ်၊ ပ္လေဒါင်း၊ ဒရိုင်းကဲနီန်လည်ဒေပဴင် ပ္လေဲဝ်လူည်ႇဟာဝ်း အီုင်ဂ္လံတ်ဆီုက် တေဲင်ကူန်ရဝ်မာဂါင်ဂဲ ဘည်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists