ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်တီုင်ဟျော လှံင်အိုမ်ယ်ုရ် လံက်ကောန်ဒဲႇ(2)အီးယံမ်း၊ တောပ်ဘိုးကောန်ဒဲႇ(6)အီး၊ ကူန်ရဝ်မာဂါင်ဂဲ (9)အီး ကတူႈဖေးဘာတ်
05 October 2025
ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်တီုင်ဟျော လှံင်အိုမ်ယ်ုရ် လံက်ကောန်ဒဲႇ(2)အီးယံမ်း၊ တောပ်ဘိုးကောန်ဒဲႇ(6)အီး၊ ကူန်ရဝ်မာဂါင်ဂဲ (9)အီး ကတူႈဖေးဘာတ်
လှံင်အိုမ်ယ်ုရ်၊ ကျံရ်အူကိူရ် ဆငည်း(5)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ ပလှံင်အိုမ်ယ်ုရ် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်တီုင်ဟျော လံက်ကောန်ဒဲႇ(2)အီးယံမ်း၊ တောပ်ဘိုးကောန်ဒဲႇ(6)အီး ၊ ကူန်ရဝ်မာဂါင်ဂဲ (9)အီး ကတူႈဖေးဘာတ်။
ဆငည်း(4)အမှိူဝ်ဒိူန် အခိင်ရဆံန်(12:28)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ပရဝ်တီုင်ဟျော လှံင်အိုမ်ယ်ုရ် လံက်ဟာဝ်း ကောန်ဒဲႇ မံင်ဆေယျအံင် အဆာက်(10)ဆန်ုမ်ကာည်း မံင်ထူန်းမျိုးအံင် အဆာက်(13)ဆန်ုမ်ယံမ်း၊ လံက်ဟာဝ်းဘိုး မမျဲတ်ဝူန်းချှဲယ် အဆာက်(10)ဆန်ုမ်၊ မခီန်ယုမေ အဆာက်(12)ဆန်ုမ်၊ မသန္တာဆိုး အဆာက်(9)ဆန်ုမ် မခီန်လပျေ့နှီင်း အဆာက်(12)ဆန်ုမ်၊ မထိုည်းယီ အဆာက်(13)ဆန်ုမ်၊ မံင်ခန့်သူရိုန်မီန်း အဆာက်(14)ဆန်ုမ်ကာည်း တာတောင်တာန်း အဆာက်(40)ဆန်ုမ်၊ တာဖိုးဆျှံန်း အဆာက်(60)ဆန်ုမ်ကာည်း တာပံန်စာန်း အဆာက်(60)ဆန်ုမ် ကဲ (9)အီး ကတူဖေးဘာတ်၊ ဒါႇခူဒီန် ဂါင်ဂေါည်ကူန်ရဝ်မာဂါင်ဂဲ (16)ဂါင်မာ် လံက်လူလှဲဝ်ႏဟာဝ်း။
မိုႈဘိုး ကျံရ်အူကိူရ် ဆငည်း(4)ဒိူန် ခေဲင်အူဆငည်းဒီန် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်မာန်ဟဲ လှံင်ဆဘော (1)လိူဝ်ႈ ကာည်း ရဝ်အုံမု(1)လိူဝ်ႈ။
ကျံရ်အူကိူရ် ဆငည်း(2)ဒိူန်မာ် ဂေါႇဆီုက်ဘြာန်ဇေဝ်ဂဲ ဒါကနောႈကယေင် တေဲင်ကူန်ရဝ်မာဂါင်ဂဲ ရောတ်ဒေဲႈပဴင်ပ္လေဘျုင် ထာန်ဇံန်(500)(2)ပိုင်း ဟော်တယ်ကုမုဒြာ ရဝ်ဆာန်ဖေက် လှံင်ဆဘော လံက်ဟာဝ်းဂါင်ႎါႈ(1)ဂါင် လူလှဲဝ်ႏ။
ဆဲႈဒါႇဒီန် ကျံရ်အူကိူရ် ဆငည်း(2)ဒိူန် အာဝ်မိူဝ်ႈပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(500)(1)ပိုင်း ခေဲင်လှံင်အိုမ်ငျံရ် လံက်ကူန်ရဝ်မာဂါင်ဂဲ အီႎဲ့ဖေးနာန်း (3)အီးယံမ်း၊ (6)အီး ကတူဖေးဘာတ်၊ မိုႈဘိုး ဂါင်ဂေါည်(8)ဂါင်မာ် လူလှဲဝ်ႏဟာဝ်း။
ဂေါႇဆီုက်ဘြာန်ဇေဝ်ဂဲ ဂီုည်လည်ဒေပဴင်ဟာဝ်း ပ္လေဘျုင်ဘည်နီန် ဘည်ကဆီုဝ်ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လံပ်ဆီုက်နာန်းနီန်း၊ ယာင်ပ်ုရ်ကာည်း ဒရိုင်းပဴင်ဆီုက်ဘြာန်ဇေဝ်ဂဲ လိုရေဲန်အူန်းမိူဝ်ႈ ရဒေင်ဒီဒံန်ခြဲ၊ ကနာည်နံင်ဒဝ်းလောတ် ဘိုန်းဒါႇယာင်ပ်ုရ်ပဴင် ဆီုက်ဘြာန်ဇေဝ်ဂဲနီန်အောႏ။
ဆီုက်ဘြာန်ဇေဝ်ဂဲနီန် အာဝ်ႎါ်န်းလိူည် ခေဲင်ကုင်တအာင်းနီန် ဒီမိုႈ ဖုင်ကောန်တီုင်ကုင် အီးဘားလာက်နာတ်ဂဲကာည်း ပ်ုန်ဖုင်ယိူဝ်ႇတီုက်ႎှီုန်းဂဲ တီုက်ဘိူန်းဆီမ်းဟာဝ်း ဒီလှံင်ကဲနီန်မာ်၊ ဂဲဒါ ယာင်ပ်ုရ်၊ ပ္လေဒါင်း၊ ဒရိုင်းကဲနီန်လည်ဒေပဴင် ပ္လေဲဝ်လူည်ႇဟာဝ်း အီုင်ဂ္လံတ်ဆီုက် တေဲင်ကူန်ရဝ်မာဂါင်ဂဲ ဘည်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists