ဆီုက်ဘြာန်ဇေဝ်ဂဲ ဒါယာန်ပ်ုရ်၊ ဒရုန်း ကာည်း ပ္လေဒါင်းဟောင်ဝေဇာပဴင် ပလှံင်နောင်ချှို
03 May 2025
ဆီုက်ဘြာန်ဇေဝ်ဂဲ ဒါယာန်ပ်ုရ်၊ ဒရုန်း ကာည်း ပ္လေဒါင်းဟောင်ဝေဇာပဴင် ပလှံင်နောင်ချှို
နောင်ချှို၊ ကျံရ်ဖံန် ဆငည်း(2)
ဆဒါင်ကုင်တအာင်း
ဆီုက်ဘြာန်ဇေဝ်ဂဲ ဒါယာန်ပ်ုရ်ပဴင်၊ ဆဲႈဒါႇဒီန် ဂဲဒါဘိုး ဒရုန်း ကာည်း ပ္လေဒါင်းဟောင်ဝေဇာပဴင် ပလှံင်နောင်ချှို ၊ အိူင်မာဝ်းႎံင်း၊ ခေဲင်ကုင်တအာင်း။
ကျံရ်ဖံန် ဆငည်း(1) အခိင်စူမ်အံပ်(6:45)မိနေတ်ဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် (2)ပိုင်း ပရဝ်လိုင်ခါန် လှံင်နောင်ချှို။
ဆဲႈဒါႇဒီန် ဆီုက်ဘြာန်ဇေဝ်ဂဲ ဂေါည်ဒါတံပ်ဆခါန်း (354)ဂဲ ဒါဒရုန်း ကာည်း ပ္လေဒါင်းဟောင်ဝေဇာပဴင်ဒေဲႈ ဒီဂေါည်တံပ်နာန်းတအာင်း TNLA ပရဝ်တော်င်ခံမ် လှံင်နောင်ချှို။
မိုးဘိုး ကျံရ်ဖိုန် ဆငည်း(30) အခိင်ရမှိူဝ်(8:30)နြီဒိူန်မာ် ဆီုက်ဘြာန်ဇေဝ်ဂဲ ဒါပ္လေဘျုင် ထာန်ဇံန်(250)(2)ပိုင်း ရောတ်ဒေဲႈပဴင် ကဒါႇလံပ်က်ြုမ်(အနောက်ပိုင်း)၊ တီတ်ဆေက်ကိုင်း(သစ်စိမ့်ကုန်း) ကာည်း ခနားရဝ်စောက်ပိုက်(ကျောက်ပုတ်) ပလှံင်မိုဂူႈ။
ဘံန်ဟောည်ႇဒေဲႈ ကျံရ်ဖိုန်ဒိူန် ဆီုက်ဘြာန်ဇေဝ်ဂဲ ဒါယာန်ပ်ုရ် ပဴင်ပ္လေဘျုင်(32)ပိုင်း၊ တောပ်ဘိုး ပ္လေဘျုင်မိူဝ်ႈကော်င်(37)ပိုင်း ကာည်း ပ္လေဒါင်း(26)ပိုင်း ပဴင်ဟာဝ်း ပလှံင်နောင်ချှို။
ဆီုက်ဘြာန်ဇေဝ်ဂဲနီန်း ဖဘိုးရဲင်ဘ္လောမ်ဆီုက်ဂဲ၊ ထီမ်းဟိုက်ဒီဘြောင်ချှာင် ကုင်လှံင် တံပ်အွံရ်ပ်ုန်လောတ်ကပီုန်တအာင်း PSLF/TNLA၊ ဆဲႈဒါႇဒီန် ဒီမိူဝ်ႈပဲန်ကတီုက်ကပဴင်ဂဲဒိူန်မာ် ဂဲပ်ုန်ကယေင်တေဲင် ကူန်ရဝ်မာဂါင်ဂဲ လှည်ဒေပဴင်ပ္လေဘျုင်ဘည်နီန်။
ဂေါႇဘည်ဒီန် ဘည်ကဆီုဝ်ကူန်ရဝ်မာဂါင်အယ်ဂဲ ကနာည်နံင်ဒဝ်လောတ်ဖေး ဘိူန်ဒါႇ ဆီုက်ဘြာန်ဇေဝ်ဂဲ ပဴင်ပ္လေဘျုင်နီန်း အယ်လိုအူန်းမိူဝ်ႈဆဒိ လံပ်ဆီုက်နာန်းနီန်း၊ အယ်လိုဘ်ုပ်ရေဲန်ဟာဝ်းတောပ် ရဒေင်ဘည်လိုဒံန်ခြဲ ယာန်ပ်ုရ်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists