28 March 2025

ပလှံင်နောင်ချှို ဂေါႇဆီုက်ဘြာန်ဇေဝ်ဂဲ ဒါယာန်ပ်ုရ်လီလာပဴင် လံက်ဟာဝ်း ကူန်ရဝ်မာဂါင်(4)အီးယံမ်း၊ (4)အီးကတူႈဘာတ်

နောင်ချှို။ ကျံရ်(3)၊ ဆငည်း(28)၊ ဆဒါင်ကုင်တအာင်း

ဆီုက်ဘြာန်ဇေဝ်ဂဲ မိူဝ်ႈနောႈကယေင်တဲင် ကူန်ရဝ်မာဂါင်ခည်းခည်း  အာဝ်မိူဝ်ႈပဲန်ကတီုက်ကပဴင်မာ် တောန်လှံင် တောန်ရဝ် ‌ ဒါယာန်ပ်ုရ်လီလာပဴင် လံက်ဟာဝ်း ကူန်ရဝ်မာဂါင်(4)အီးယံမ်း၊ (4)အီးကတူႈဘာတ် ပလှံင်နောင်ချှိုအောႏ။

ဆီုင်ခည်းအမှိူဝ်ဒီူန် ကျံရ်(3)၊ ဆငည်း(26)၊ အခိင်ရမှိူဝ်(6:00)နြီ  ဆီုက်ဘြာန်ဂဲ ဒါယာန်ပ်ုရ်ပဴင်ဟာဝ်း ‌ပ္လေဘျုင်(2)ပိုင် (5)လိူဝ်ႈ ကဒါႇ ရဝ်အုမ္မခါး၊ ရဝ်အိုည်ကိူရ် ကာည်း ဆျှိူည်ညာင်ပင်အောႏ။

ဂေါႇဆီုက်ဘြာန်ဂဲ လီလာပဴင်ဘည်ဒီန် လံက်ဟာဝ်းတိုအီးရဝ်အိုည်ကိူရ် ကောန်အီမာည်း(2)အီး ကာည်း ကောန်အီပ်ုန်(2)အီး ယံမ်းပွံတ်အောႏ။ တိုအီးရဝ်အုမ္မခါးမာ် (4)အီးကတူႈဘာတ်ဒါင်းအောႏ။ ဆဲႈဒီန် လံက်ဟာဝ်းဘို ဂါင်ဂေါည်ဂီုန်းလည်းအောႏ။

ဘံန်ဟောည်ႇဒေဲႈ ကျံရ်(3)၊ ဆငည်း(16)၊ အခိင်စူန်မှိူဝ်(5:30)ဒိူန် ဆီုက်ဘြာန်ဇေဝ်ရောတ်ဒေပဴင်ဘို ပ္လေဘျုင် ပလှံင်နောင်ချှို ကျောင်ပနောစိန်ရတနာပရိယတ္တိ လံက်ဟာဝ်း စဝ် ကာည်း တိုအီးရဝ် ကစုကပိုမ်ဂေါည် (9)အီးယံမ်း၊ (17)အီးကတူႈဘာတ်အောႏ။

ဆီုက်ဘြာန်ဇေဝ်းဂဲဒီန် အာဝ်မိူဝ်ႈပဲန်ကတီုက်ကပဴင် မိူဝ်ႈနောႈကယေင်ဒါင်းဒါင်းတဲင်ကူန်ရဝ်မာဂါင်ဂဲ။ ဆဲႈဒီန် ဆာ်မိုႈကူန်ရဝ်မာဂါင်မာ် လိုဂေါည်ဆဒိ ၊ လိုတောပ်ခေါပ်ပြာႇပ်ုန်ထုတ်လေႈ ဘည်လိုဒံန်ခြဲယာန်ပ်ုရ်အောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း