ဖုင်ပလိက်ကုင်တအာင်းဂဲ ဘိူန်းတိုည်း တိုအီးဒါခံင်ယိူည်ႇ ကာည်း ကဇိူရ်ႈကယံင်းခံင်ယိူည်ႇ (12)အီး ပလှံင်မာဝ်းႎံင်း ကာည်း လှံင်ကိုက်ခည်
27 March 2025
ဖုင်ပလိက်ကုင်တအာင်းဂဲ ဘိူန်းတိုည်း တိုအီးဒါခံင်ယိူည်ႇ ကာည်း ကဇိူရ်ႈကယံင်းခံင်ယိူည်ႇ (12)အီး ပလှံင်မာဝ်းႎံင်း ကာည်း လှံင်ကိုက်ခည်း
ဆဒါင်ကုင်တအာင်း၊ ကျံရ်(3)၊ ဆငည်း(27)
တံပ်အွံရ်ပ်ုန်လောတ်ကပီုန်တအာင်းPSLF/TNLA ဒီဘိူန်းဘြောင်ချှာင် လှံင်မာဝ်းႎံင်း ကာည်း လှံင်ကိုက်ခည်း ဖုင်ပလိက်ကုင်တအာင်းဂဲ ဘိူန်းတိုည်း တိုအီးဒါခံင်ယိူည်ႇ ကာည်း ကဇိူရ်ႈကယံင်းခံင်ယိူည်ႇ (12)အီးအောႏ။
ဘည်မိုႈဘာည်းဘည် ကျံရ်(3)၊ ဆငည်း(24)ဒိူန် လှံင်မာဝ်းႎံင်း၊ ယာတာန်တင် ဂေါည်ဇံင်(2) စိဘိူန်းဆဒါင် ဒါႈအ်ုန် ကဇိူရ်ႈကယံင်းခံင်ယိူည်ႇ ဖုင်ပလိက်ကုင်တအာင်းဂဲ စိဟာဝ်းစေတ်မေန်း ပဂါင်ဂေါည်အ်ုန် ယိူဝ်ႇခံင်ယိူည်ႇဂီုန်းပွံတ်အခည်း စိတိုည်းဟာဝ်းအောႏ။
ခံင်ယိူည်ႇဂေါည်ခေဲင်ဂါင်အ်ုန်ဒီန် မိုႈဒိုႇ စူမ် WY ကအာင်းဆနံမ်း ပဲန်နောႈဖိူမ် ကာည်း စူမ်ပ္လေပါင်တီး ကအာင်းဆနံမ်း ပဲန်နောႈဖိူမ် ကစုကပိုမ်ကအာင်း(29600)ကအာင်း ကာည်း ရိူန်း(110)ဆဲန် ဘိူန်းတိုည်းဟာဝ်းအောႏ။
ဆဲႈဒီန် အီဒေဲႈဇိူရ်ႈခံင်ယိူည်ႇဒါ ခေဲင်ဂါင် မံင်မျီတ်၊ ဝူန်ထူန်၊ မံင်မတ်၊ ဝူန်မီန်ထူန်း၊ နေစို၊ ထဲက်မျတ်စော်၊ နာနီ၊ အံင်နဲင်ဝူန် ကာည်း အိုက်စော် ဖုင်ပလိက်ကုင်တအာင်းဂဲ တိုည်းဟာဝ်းဒိုႇဒိုည်ႇအောႏ။
မိုႈဘို ပလှံင်ကိုက်ခည်းမာ် ရဝ်မော်ဟစ် ဘံန်ဟောည်ႇဒေဲႈ ကျံရ်(3)၊ ဆငည်း(22)ဒိူန် တာအံင်ခဲင် ဘိူန်းအဆာက်(30)ဆန်ုမ် ဘိူန်းတိုည်းခံင်ယိူည်ႇ တောပ်တိုအ်ုန် ကဘဲဝ်ပင်နယ်စလင်(4)ကဘဲဝ်အောႏ။
မိုႈဘို တိုအီရဝ်ဂဲဒီန် ဖုင်ပလိက်ကုင်တအာင်း ဘိူန်းတိုည်းဟာဝ်းဘို တာတာန်းလုမ် ကာည်း ကအာင်းဆနံမ်းပဲန်နောႈဖိူမ်(8)ကအာင်းအောႏ။
ဖုင်ပလိက်ကုင်တအာင်းဂဲ ပ်ုန်ဘိူန်းတိုည်းတိုအီဒီန် ဆာ်မိုႈ တိုအီကဇိူရ်ႈကယံင်းခံင်ယိူည်ႇ ကာည်း ဒါခံင်ယိူည်ႇနီန် နံင်လာည်းတာမ်ဂ္လံတ်ဘည်ဥပဒေအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists