ဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကောင် ပဴင် ပလှံင်နောင်ချေဝ်
25 February 2025
ဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကောင် ပဴင် ပလှံင်နောင်ချေဝ်
လှံင်နောင်ချေဝ်၊ ကျံရ်အာရ်၊ ဆငည်း(24)
ဆဒါင်ကုင်တအာင်း
ကျံရ်အာရ် ဆငည်း(23)ဒိူန် ဆီုက်ဘြာန်ဇေဝ်ဂဲ ကာည်း တံပ်နာန်းတအာင်း (TNLA) ပဲန်ကတီုက်ကပဴင်ဘ္လောမ် ခနားရဝ်တောင်ရှည် ကာည်း ရဝ်မန်မော် ၊ ဒီအိုမ်ဘြည်ကတာည်း တီုင်တံပ်ဒါင်း(2) ပလှံင်နောင်ချေဝ် ခေဲင်ကုင်တအာင်း။
အခိင်ပဲန်ကတီုက်ကပဴင် ရဆံန်(1:30)နြီဒိူန် ဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကောင် ပဴင်၊ ဂေါႇဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကော်င်ပဴင်ဘည်ဒီန် ကောန်ဆီုက်(TNLA) (10)အီး ကတူႈဖေးဘာတ်၊ (4)အီး ကတူႈဖေးဘာတ်ဒါင်း။
ကောန်ဆီုက်(TNLA) ဂဲဒီန် ဂဲကတူႈခါမ်ဇာဝေဒနာ ဘည်ကိင်မံဝ်း၊ ဘည်တိုႈဖိူမ်ချာ်န်း၊ ဘည်တိုပိုင်း ဂေါည်ဒည်း၊ ဘည်နောႈဖိူမ်ချာ်န်း၊ ဘည်မောည် ကာည်း ဘည်အောက်ဆီဂျင်ဇာ်ႈဟာဝ်းကဲနီန်၊ ကဇေန်နီး ကဲဆနံမ်အူန်းတိုဂဲ ပယုင်ဆနံမ်အောႏ။
ခေဲင်ပဲန်ကတီုက်ကပဴင် ဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကောင်ပဴင် ပ်ုန်ကုင်ကံမ်ဖာဂဲအာဝ်ခွါင်း ပ္လေဲဝ်လူည်ႇဟာဝ်း ဇရာဝတ်မှုဆီုက်ဘည်နီန်။
ဆဲႈဒီန် ခေဲင်ကျံရ်နီန် ဂေါႇဆီုက်ဘြာန်ဇေဝ်ဂဲ ပ်ုန်ကယေင်တေဲင် ကူန်ရဝ်မာဂါင်ဂဲ ဒါပ္လေဒါင်း ကာည်း ယာန်ပ်ုရ်ပဴင်ပ္လေဘျုင်ဘည်နီန် တောန်ဆငည်း တောပ်ဘိုးကောန်ဒဲႇ ကူန်ရဝ်မာဂါင်ဂဲ(7)အီးယံမ်း၊ (15)အီးကတူႈဖေးဘာတ်။ ယုင်ဆနံမ်ပလှံင်နောင်ချေဝ်၊ ကျောင်စဝ် ကာည်း ဂါင်ဂေါည်ကူန်ရဝ်မာဂါင်ဂဲ (11)ဂါင်မာ် ကဆူမ်းလူလှဲဝ်ႏဟာဝ်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists