30 August 2025

(၅၃)နှစ်ပြည့် တအာင်းစာပေနေ့အထိမ်းအမှတ်ကို တအာင်းစာအဖွဲ့ မှ ဦးစီးကျင်းပ

နမ့်ခမ်း၊ သြဂုတ် ၃၀ရက်
တအာင်းပြည်သတင်း

၂၀၂၅ခုနှစ်၊ သြဂုတ်လ (၃၀)ရက်နေ့တွင် ကျရောက်သည့် (၅၃)နှစ်မြောက် တအာင်းစာပေနေ့ကို တအာင်းပြည်၊ တပ်မဟာ (၉)နယ်မြေ၊ နမ့်ခမ်းမြို့ နယ်တွင် တအာင်းစာအဖွဲ့မှ ဦးစီးကျင်းပပြုလုပ်ခဲ့သည်။

အဆိုပါအခမ်းအနားကို ပလောင်ပြည်နယ်လွတ်မြောက်ရေးတပ်ဦး- PSLF/TNLA ဒု-ဥက္ကဌ ဒုဗိုလ်ချုပ်ကြီး တားဂျိုတ်ဂျား၊ ဗိုလ်မှူးချုပ် တားဂူ;ဂျားတို့နှင့်အတူ တအာင်းစာအဖွဲ့ချုပ် ဦးလှအောင်တို့မှ တအာင်းစာနှင့်ပတ်သက်၍ အဖွင့်အမှာစကားပြောကြားခဲ့သည်။

ယခုနှစ် တအာင်းစာပေနေ့တွင် တအာင်းမျိုးနွယ်စုများအားလုံး တမူတည်းသောစာ ရုံးသုံးစာပေ/ဘာသာစကား တိုးတက်ပြန့်ပွားစေရန် ယခင်တအာင်းစာပေအဖွဲ့အစည်းများမှ စုပေါင်း၍ တအာင်းစာပေအဖွဲ့ (TLA) ကို ဖွဲ့စည်းနိုင်ခဲ့သည်။ TLA သည် တအာင်းစာပေနှင့် ယဉ်ကျေးမှုအဖွဲ့၊ တအာင်းစာသင်ကြားရေးအဖွဲ့(TLTA)နှင့် PSLF/TNLA တအာင်းရုံးသုံးစာအဖွဲ့တို့မှ စုပေါင်း၍ ဖွဲ့စည်းထားသည်။

တအာင်းလူမျိုးများသည် မျိုးနွယ်စုများစွာရှိပြီး မတူညီသော (သရ)လေသံများကိုစုစည်းကာ မျိုးနွယ်စုများမှ အများဆုံးတူညီသည့် ဝေါဟာရ စကားလုံးများအား ရုံးသုံးဘာသာစာ/စကားအဖြစ် ရွေးချယ်သတ်မှတ်ခဲ့သည်။

ယနေ့ကျရောက်သည့် တအာင်းစာပေနေ့အတွက် တအာင်းစာပေအဖွဲ့ -TLAဦးဆောင်ပြီး  တအာင်းဘာသာရုံးသုံးစာဖြင့် ဆောင်းပါး၊ ကဗျာ၊ ကာတွန်း၊ ဘာသာပြန်ဆောင်းပါး၊ ဝတ္ထုတိုများနှင့်ဆိုင်သောပြိုင်ပွဲများ ရေးသားယှဥ်ပြိုင်ခဲ့ပြီး ဆုရရှိသူများကိုလည်း ချီးမြှင့်ပေးအပ်ခဲ့ပါသည်။

အခမ်းအနားကို  PSLF/TNLA ခေါင်းဆောင်ကြီးများ၊ အရာရှိအရာခံများ၊ တအာင်းစာပေနှင့် ယဉ်ကျေးမှုကော်မတီအဖွဲ့ဝင်များ၊ တအာင်းစာသင်ကြားရေးအဖွဲ့နှင့် မိဘပြည်သူများ (၂၀၀)နီးပါး ပါဝင်ဆင်နွှဲတက်ရောက်လာကြပြီး တက်ရောက်လာသည့် ပြည်သူလူထုများကိုတအာင်းအကယ်ဒမီကျောင်းသူ/သားများ၊ ကျေးရွာအတွင်းရှိလူငယ်များနှင့် တအာင်းစာအဖွဲ့အကမောင်မယ်များမှ ကပြဖျော်ဖြေခဲ့သည်။

#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်