04 April 2025

မူးယစ်ဆေးဝါးသုံးစွဲသူ (၈၅)ဦးအား PSLF/TNLAမှ အကျင့်စာရိတ္တပြုပြင်ပေးပြီး ပြန်လွှတ်ပေး

မိုးကုတ်၊ ဧပြီလ ၄ရက်
တအာင်းပြည်သတင်း

တအာင်းပြည်၊ တပ်မဟာ (၂)နယ်မြေ၊ မိုးကုတ်မြို့နယ်တွင်  မူးယစ်ဆေးဝါးသုံးစွဲသူ (၈၅)ဦးကို ပလောင်ပြည်နယ်လွတ်မြောက်ရေးတပ်ဦး PSLF/TNLAတပ်ဖွဲ့မှ အကျင့်စာရိတ္တပြုပြင်ပေးပြီး ပြန်လွှတ်ပေးခဲ့သည်။

၎င်းတို့ကို မိုးကုတ်အကျင့်စာရိတ္တပြုပြင်ရေးစခန်းတွင်  မူးယစ်ဆေးဝါးတိုက်ဖျက်ရေးအဖွဲ့မှ (၆)လကြာ အကျင့်စာရိတ္တပြုပြင်ပေးခဲ့ကာ ပြီးခဲ့သည့် မတ်လ ၃ရက်တွင် ပြန်လွှတ်ပေးခဲ့သည်။ 

အဆိုပါ မူးယစ်ဆေးဝါးသုံးစွဲသူများသည် တအာင်းပြည် မြို့နယ်ရဲတပ်ဖွဲ့မှ ဖမ်းဆီးခဲ့သူများရှိခဲ့သလို ၎င်းတို့၏ မိဘအုပ်ထိန်းသူကိုယ်တိုင် အကျင့်စာရိတ္တပြုပြင်ပေးရန် လာရောက်အပ်နှံသည့်သူများလည်း ရှိကြပါသည်။

မူးယစ်ဆေးဝါးသုံးစွဲသူများသည် ပထမအကြိမ် အကျင့်စာရိတ္တပြုပြင်ရေးစခန်းတွင် ပို့ဆောင်ခံရပါက (၆)လ ပြစ်မှုခံရမည်ဖြစ်ပြီး ဒုတိယအကြိမ် ထပ်မံသုံးစွဲပါက (၃)နှစ်ကြာ အကျင့်စာရိတ္တပြုပြင်ရေးစခန်းသို့ ပို့ဆောင်ခံရမည်ဖြစ်သည်။

ပြီးခဲ့သည့် မတ်လ (၂၆)ရက်လည်း မိုးမိတ်မြို့နယ်တွင် PSLF/TNLAတပ်ဖွဲ့မှ မူးယစ်ဆေးဝါးသုံးစွဲသူ (၃၅)ဦးကို အကျင့်စာရိတ္တပြုပြင်ပြီး ပြန်လွှတ်ပေးခဲ့ပါသည်။ 

အလားတူ ပြီးခဲ့သည့် ဖေဖော်ဝါရီလ (၂၅)ရက်တွင် မိုးကုတ်မြို့နယ်အတွင်း ဖမ်းဆီးရမိခဲ့သည့် မူးယစ်ဆေးဝါးသုံးစွဲသူ (၇၁)အား PSLF/TNLAမှ အကျင့်စာရိတ္တပြုပြင်ပေးပြီး ပြန်လွှတ်ပေးခဲ့သည်။

၁၀၂၇ စစ်ဆင်ရေးမတိုင်ခင်ထိ တအာင်းပြည်အတွင်း မူးယစ်ဆေးဝါးသုံးစွဲသူများပြားပြီး ယခု PSLF/TNLA အုပ်ချုပ်ပြီးနောက် တရားဥပဒေစိုးမိုးရေးလုပ်ငန်းများဆောင်ရွက်ကာ မူးယစ်ဆေးဝါးရောင်းဝယ်၊ သုံးစွဲသူများကို ထိရောက်စွာအရေးယူနိုင်ခဲ့သည်။

#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်