02 April 2025

နောင်ချိုတွင် စစ်ကောင်စီတပ်မှ ဒရုန်းဖြင့်ထပ်မံလာရောက်ဗုံးကြဲတိုက်ခိုက်မှုကြောင့် ဒေသခံတစ်ဦးသေဆုံး

နောင်ချို၊ ဧပြီလ ၂ရက်
တအာင်းပြည်သတင်း

စစ်ကောင်စီတပ်သည် နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက် သတ်မှတ်ကြေညာသော်လည်း  ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်သော နောင်ချိုမြို့နယ်၊ ဆမ္မဆယ်ရွာကို ဒရုန်းဖြင့် ထပ်မံလာရောက်ဗုံးကြဲတိုက်ခိုက်မှုကြောင့် ဒေသခံတစ်ဦး သေဆုံးသွားခဲ့သည်။

ဖြစ်စဉ်တွင်  ဧပြီလ (၁)ရက် ညနေ (၄း၂၀) နာရီ၀န်းကျင်တွင် စစ်ကောင်စီတပ်သည် သဲခေါ်ကျေးရွာမှနေပြီး ဆမ္မဆယ်ကျေးရွာကို ဒရုန်းဖြင့် (၁)ကြိမ် လာရောက်ကြဲချတိုက်ခိုက်ခဲ့သည်။ ထိုဗုံးကျရောက်ပေါက်ကွဲမှုကြောင့် ဒေသခံတစ်ဦး သေဆုံးသွားခဲ့ပြီး နေအိမ်တစ်လုံးလည်း ထိမှန်ပျက်စီးခဲ့သည်။

ပြီးခဲ့သည့်  မတ်လ (၃၁)ရက်လည်း စစ်ကောင်စီတပ်မှ (၁၂၀)မမ ဗုံးသီးသယ်ဆောင်လာသည့်ဒရုန်းဖြင့် နောင်ချိုမြို့နယ် ကျောက်ကြမ်းကျေးရွာကို လာရောက်ဗုံးကြဲတိုက်ခိုက်ခဲ့သည်။

မြန်မာနိုင်ငံတွင် ပြင်းအား ၇.၇ရှိသည့် ငလျင်လှုပ်ခတ်ချိန် မတ်လ (၂၈)ရက် နေ့လယ် (၁း၀၅)နာရီအချိန်တွင် နောင်လင်ကျေးရွာအတွင်း စစ်ကောင်စီတပ်မှ ဂျက်ဖိုက်တာဖြင့် ပေါင် (၂၅၀)ဗုံး (၂)လုံး လာရောက်ကြဲချမှုကြောင့် ဒေသခံနေအိမ် (၃)လုံးနှင့် စာသင်ကျောင်း (၂)ကျောင်း ထိမှန်ပျက်စီးခဲ့သည်။

မြန်မာနိုင်ငံတွင် ငလျင်နောက်ဆက်တွဲ ကယ်ဆယ်ရေးလုပ်ငန်းများ အမြန်ဆုံးထိရောက်စွာ ဆောင်ရွက်နိုင်ရန်နှင့် တိုက်ပွဲဖြစ်ပွားလျက်ရှိသောနေရာများတွင် ထိုးစစ်များကို ပြုလုပ်မည်မဟုတ်ဘဲ တစ်လတာ တစ်ဖက်သတ် အပစ်ရပ်ကြောင်း ညီနောင်မဟာမိတ် (၃)ဖွဲ့ဖြစ်သည့်  AA/ TNLA/ MNDAA တို့မှ ဧပြီလ ၁ရက်နေ့တွင် ထုတ်ပြန်ကြေညာခဲ့ပြီးဖြစ်သည်။

ထို့အပြင် မြန်မာနိုင်ငံတွင် ငလျင်ဒဏ်သင့်နေချိန် လူသားချင်း စာနာထောက်ထားသောအားဖြင့် ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်သော ခရိုင် (၅)ခုအတွင်းရှိသည့်မြို့နယ်များတွင် ပျော်ပွဲရွှင်ပွဲနှင့် သင်္ကြန်ပွဲတော် မကျင်းပရန် PSLF/TNLA ဗဟိုအုပ်ချုပ်ရေးဌာနမှ စာထုတ်ပြန် ညွှန်ကြားခဲ့ပြီးဖြစ်သည်။

#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်