28 March 2025

တအာင်းစာပေအဖွဲ့ -TLAမှ မြို့နယ် (၂)ခုအတွင်းရှိ ကျေးရွာ (၆)ရွာကို အခြေခံတအာင်းရုံးသုံးစာသင်တန်းဖွင့်လှစ်ပြီးစီး

တအာင်းပြည်၊ မတ်လ ၂၈ရက်

တအာင်းပြည်၊ နမ့်ဆန်နှင့် မိုင်းငေါ့မြို့နယ်တို့တွင် တအာင်းစာပေအဖွဲ့-TLA မှ ကျေးရွာပေါင်း (၆)ရွာကို အခြေခံတအာင်းရုံးသုံးစာသင်တန်း ဖွင့်လှစ်သင်ကြားပေးပြီးသင်တန်းဆင်းပွဲ ပြုလုပ်ကျင်းပခဲ့သည်။

အဆိုပါ အခြေခံတအာင်းရုံးသုံးစာသင်တန်းဆင်းပွဲအား ပြီးခဲ့သည့် မတ်လ ၂၅ ရက်တွင် အားရမ်းကျေးရွာနှင့် နမ့်ဆန်မြို့ (၂)နေရာတွင်လည်းကောင်း၊ မတ်လ (၂၆)ရက်တွင် ဟူးခင်းကျေးရွာ၌ လည်းကောင်း တအာင်းစာပေအဖွဲ့-TLAမှ ဦးဆောင်ပြီး သင်တန်းဆင်းပွဲပြုလုပ်ခဲ့သည်။

အလားတူ မတ်လ ၂၁ရက်တွင် မိုင်းငေါ့မြို့နယ် ကွမ်းစလန်းကျေးရွာနှင့် မတ်လ ၂၂ရက်နေ့ ပိန်းကိုင်တော်ကျေးရွာတွင်လည်း ကျင်းပခဲ့သည်။

ယင်း အခြေခံတအာင်းရုံးသုံးစာ သင်တန်းကို မြို့နယ် (၂)ခုနှင့် ကျေးရွာ(၆)ရွာတို့မှ ကျောင်းသူ/သား ဦးရေ (၂၄၆)ဦး တက်ရောက်အောင်မြင်စွာပြီးစီးကြောင်း သင်တန်းဆင်းလက်မှတ် (Certificates)များ ချီးမြှင့်ပေးအပ်ခဲ့သည်။

အခြေခံတအာင်းရုံးသုံးစာသင်တန်း ဖွင့်လှစ်ရသည့် ရည်ရွယ်ချက်သည် တအာင်းရုံးသုံးစာ/ စကားပြန့်ပွားရေး၊ တအာင်းမျိုးနွယ်စုများ စကားလုံးအသုံးနှုန်း ဝေါဟာရတူညီခြင်း၊ တအာင်းပညာရေးဌာနဆိုင်ရာ တအာင်းစာပေ ထည့်သွင်းသင်ကြားနိုင်ခြင်း၊ တအာင်းမိခင်ဘာသာစကား မပပျောက်ခြင်း၊ တအာင်းအဖွဲ့အစည်း ဌာနဆိုင်ရာဝန်ထမ်းများနှင့် ရုံးဌာနတိုင်း တအာင်းရုံးသုံးစာဘာသာဖြင့် အသုံးပြုနိုင်ခြင်း၊ တအာင်းစာအုပ်စာပေ ပုံနှိပ်မဂ္ဂဇင်းစာအုပ်များ ထုတ်ဝေနိုင်ခြင်း၊ တအာင်းပညာရေးကျောင်းအတွင်း တအာင်းစာပေဘာသာရပ်များ ပို့ချပေးရန်အတွက် ဆရာ/မဝန်ထမ်းများ မွေးထုတ်နိုင်ရန် ရည်ရွယ်ပြီး ဖွင့်လှစ်သင်ကြားပေးခဲ့ခြင်းဖြစ်သည်။


#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်