01 March 2025

ဖေဖော်ဝါရီလအတွင်း စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်မှုကြောင့် ပြည်သူလူထု (၁၃)ဦး သေဆုံး၊ (၃၆)ဦး ထိခိုက်ဒဏ်ရာရ

တအာင်းပြည်၊ မတ်လ ၁ရက်

ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်သော မြို့နယ်များကို ဖေဖော်ဝါရီလ တစ်လအတွင်း စစ်ကောင်စီတပ်မှ တိုက်ပွဲဖြစ်ပွားခြင်းမရှိဘဲ လေကြောင်းကိုအသုံးပြုကာ ဗုံးကြဲတိုက်ခိုက်မှုကြောင့် ပြည်သူလူထု (၁၃)ဦး သေဆုံးခဲ့ပြီး (၃၆)ဦး ထိခိုက်ဒဏ်ရာရရှိခဲ့ပါသည်။

ပြီးခဲ့သည့် ဖေဖော်ဝါရီလ ၆ရက် နောင်ချိုမြို့ သပြေတောင်ရပ်ကွက်တွင် စစ်ကောင်စီတပ်မှ ဗုံး (၁)လုံး ကြဲချတိုက်ခိုက်မှုကြောင့် ပြည်သူလူထု (၁)ဦး ဒဏ်ရာရရှိပြီး နေအိမ် (၅)လုံး ပျက်စီးခဲ့သည်။

ဖေဖော်ဝါရီလ ၁၀ရက်လည်း စစ်ကောင်စီတပ်သည် မိုးကုတ်မြို့အနောက်ပိုင်း ဝန်းထရံရပ်ကွက်အတွင်း လေကြောင်းကိုအသုံးပြုပြီး ဗုံး (၂၀)လုံး လာရောက်ကြဲချမှုကြောင့် ပြည်သူလူထု (၅)ဦး သေဆုံးခဲ့ပြီး (၁၉)ဦး ဒဏ်ရာရရှိကာ နေအိမ် ( ၅)လုံး ပျက်စီးသွားခဲ့သည်။

ပြီးခဲ့သည့် ဖေဖော်ဝါရီလ ၂၀ရက်လည်း ဘူတာရပ်ကွက်နှင့် နောင်ချိုပြည်သူ့ဆေးရုံပေါ် ဗုံး (၂)လုံး လာရောက်ကြဲချတိုက်ခိုက်မှုကြောင့် ပြည်သူလူထု (၃)ဦး သေဆုံးခဲ့ရပြီး (၄)ဦး ထိခိုက်ဒဏ်ရာရရှိခဲ့သည်။

အလားတူ မိုးမိတ်မြို့နယ် ဝဲဘောင်းကျေးရွာကို လေကြောင်းဖြင့် ဗုံး (၂)လုံး လာရောက်ကြဲချမှုကြောင့် ပြည်သူလူထု (၃)ဦး သေဆုံးခဲ့ရပြီး (၇)ဦး ထိခိုက်ဒဏ်ရာရရှိကာ နေအိမ် (၅)လုံး ထိမှန်ပျက်စီးခဲ့ပါသည်။

ပြီးခဲ့သည့် ဖေဖော်ဝါရီလ ၂၀ရက်လည်း နောင်ချိုမြို့နယ် လောက်ဖန်းကျေးရွာကို စစ်ကောင်စီတပ်မှ ဗုံးကြဲတိုက်ခိုက်မှုကြောင့် ပြည်သူလူထု (၁)ဦး သေဆုံးခဲ့ပြီး ကလေးငယ်အပါအဝင် (၄)ဦး ထိခိုက်ဒဏ်ရာရရှိခဲ့သည့်အပြင် နေအိမ် (၆)လုံး ထိခိုက်ပျက်စီးသွားခဲ့သည်။

ထို့နောက် ဖေဖော်ဝါရီလ ၂၂ရက်လည်း ရွှေမုဠောကျေးရွာနှင့် တောင်ရှည်ကျေးရွာကို ဗုံး (၃၂)လုံး လာရောက်ကြဲချတိုက်ခိုက်မှုကြောင့် ပြည်သူလူထု (၁)ဦး သေဆုံးသွားခဲ့သည်။

စစ်ကောင်စီတပ်သည် ပြီးခဲ့သည့် ဖေဖော်ဝါရီလ ၂၃ရက် တောင်ရှည်နှင့် မန်မော်ကျေးရွာကြားဖြစ်ပွားခဲ့သည့် တိုက်ပွဲအတွင်း အဆိပ်ငွေ့ဗုံးကို အသုံးပြုတိုက်ခိုက်မှုကြောင့် မိမိတို့ TNLAတပ်သား (၁၀)ဦး ထိခိုက်ဒဏ်ရာရရှိခဲ့ပြီး (၄)ဦး ဒဏ်ရာပြင်းထန်ရရှိခဲ့သည်။

ယမန်နေ့ ဖေဖော်ဝါရီလ ၂၈ရက်လည်း စစ်ကောင်စီတပ်မှ လေကြောင်းဖြင့် ဗုံး (၃)လုံး လာရောက်ကြဲချမှုကြောင့် မယ်သီလရှင် (၁)ပါး ထိခိုက်ဒဏ်ရာရရှိခဲ့ပြီး နေအိမ် (၅)လုံးနှင့် ဘုန်းကြီးကျောင်း (၁)ကျောင်း ထိမှန်ပျက်စီးသွားခဲ့သည်။

#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်